الجزء الخامس





هيه وصلنننننا
التفت نجود لجهت النافذه وشافت هلا تدق عليها وهي تكلمها .. استوعبت انهم وصلوا.. ولانها كانت سرحانه وتفكر فما حست ان السياره واقفه من فتره ... انحرجت كثير ... خصوصا ان سعود ينتظرها تنزل .. فتحت الباب وطلعت من السياره وهى خلاص تتمنى الارض تنشق وتبلعها ...
هلا: هههههه ايش فيك ؟؟
نجود بصوت واطى: مادرى ما حسيت اننا وصلنا
هلا: المهم يالله خل ندخل..
وبصوت عالى شوي: مشكور خالووووو
سعود وهو يفتح نافذه السياره ويكلم هلا: بنت تراك بالشارع عيب لا ترفعين صوتك.. واذا شفتى صقر خليه يدق علي
هلا: اوكيك ... بقوله ..
سعود: ياالله مع السلامه وسلمى على اختى
هلا وهى تدخل ووتاشر بايدها لخالها: يوصل
سعود بعصبيه: قلت لك لا تصارخين انتى بالشارع
دخلت هلا وهى تضحك.. اليوم هى مسبوطه ماتدرى ليه .. نجود يوم شافت هلا .تكلم خالها سبقتها ودخلت للبيت ...
................

مزون ما كان عندها لاب .. ولانها لاحظت ان جواهر من اول ما جات الجامعه اليوم وهي متضايق .. ماحبت تطلع الا بعد ما تتكلم معها .. خصوصا انهم من الصبح وهم محاضره ورى محاضره ...جلست مزون بالكرسى الى بالكافتيريا وقبالها جواهر
مزون: والحين امنيات بتقولين لى ايش فيك بالضبط .. وليه العيون المنتفخه والدوائر السود تحتها
جواهر:..تعبانه مزون من القهر الي فيني والله مو مني
مزون وخافت: شفيك تكلمي
جواهر: السالفه الى تصير كل مره ... تعبت مزون .. تعبت من اهلى ... تقولين عانس او طايح رزقى .. الا يبون يزوجونى ... قال ايش قالوا ما يبون يتركون حرمتين وحدهم بالبيت .. من غير رجال ... وياليت الى يجيبونهم يسوون ... يا يكون كبير او متزوج ... والله حرام عليهم ..
سكتت جواهر وحست مزون انها شوي وتصيح ...
مزون: متى تقدم لك؟؟
جواهر: قبل اسبوع
مزون: يوووووه امنيات ليه ما قلتى لى .. ليه توك تتكلمين
جواهر: وانتى ناقصه مزون.. ما بغيت ازيد همك ..
مزون: افا جواهر ما توقعتك كذا.. هذي اخرت صداقتى معك
جواهر: والله مزون مو قصدى .. بس انتى بعد مليانه هموم
مزون: ولاننا صديقات لازم نتشارك بهمومنا .. والا ايش رايك
ابتسمت لها جواهر: اكيييد
مزون بعد ما تنهدت: طيب ايش بتسووين انتى؟؟
جواهر: مادرى.. امس كله ما قدرت انام ... الكل كان يحاول يقنعنى
مزون: وامك؟؟؟
جواهر: هى بعد بدت تقتنع تقول على الاقل لو تزوجت بيوقفون تدخل بحياتنا
مزون: لا امنيات لا توافقين
جواهر : طيب ايش اسوي.. الكل ضدى
مزون: لازلتى بموقف القوه ... ومادامت هالقوه بايدك لا ترضخين .. لا تتزوجين واحد اكبر منك .. وتدفنين حياتك معه .. ولا تتزوجين واحد متزوج .. ويخليك على العتبه وبالدرجه الثانيه
جواهر: اااااه مزون .. الى يسمعك يقول الحين حياتى سعيده
مزون تبتسم بمواساه: جواهر .. وين الامانى الى دايما تتمنيها
جواهر: لازلت اتمنى .. بس شكلها ابدا ماراح تتحقق..
مزون: تمسكى فيها .. وانشالله بتتحقق لك ... تدرين ايش رايك ارجع اليوم معك واتكلم مع امك .. عشان توقف معك مثل دايما
جواهر والفرحه بدت ترتسم على وجهها: ياليت مزون ... اصلا امى تحبك ودايما تسالنى عنك .. تدرين من زمان ما جيتى لى
مزون وهى تبتسم : خلاص الحين ادق على صقر واقول له انى برجع معك للبيت
جواهر: ايييه تكفين..خل ننبسط شوي

دقت مزون على صقر .. وشافت جواله مغلق.. قررت تدق عليه بعد شوي .. وجلست تكمل سوالف مع جواهر
.....................

صقر كان باجتماع بخصوص مشروعه الجديد .. ولانه ما يبي ازعاج فضل يغلق جواله .. بعد 3 ساعات من الاجتماع طلع وهو مبسوط .. كل اموره تمام .. وشكل المشروع بينجح باذن الله .. بس يبي له وقت وجهد .. الى الحين كل شي مثل ما يبى ...
ركب السياره وهو لازال يبتسم .. فتح جواله .. الا يوصله مسج كان من هلا اخته
" وينك صقر.. امى ميته خوف عليك .. وخالى سعود يبيك ضرورى "
عبس بوجهه ايش صاير .. ايش فيهم .. عسى ما يكون صاير شي... دق على البيت وترد عليه امه
صقر: السلام عليكم
ام صقر: صقر... وينك فيه؟؟
صقر: هلا يمه .. انا بالشغل.. ايش فيك هلا تقول انك تبينى
ام صقر بعصبيه: انت الحين ليه ما ترد علينا ومقفل جوالك
صقر: يمه عندى اجتماع.. ليه صاير شي
ام صقر بعد ما ارتاحت: لا سلامتك .. خفت عليك .. محد كان عارف انت وين
صقر: يمه كلها 3 ساعات وانا مقفله .. ماهى اول مره
ام صقر: الحمد لله على كل حال.. بس كنت خايفه
صقر وهو يبتسم: تسلمين لى يالغاليه .. وانت يمه الله يهديك مو كل مره تحاتينا وتخافين علينا ...عيالك كبروا يام صقر
ام صقر: الام طول عمرها تشوف عيالها صغار..وبتحاتيهم حتى لو شيبوا
صقر: ههههههههههههههههههههه..ربي ما يحرمنا منك يالغاليه ....طيب يمه ما بطول عليك .. سعود يبينى وبدق عليه الحين
ام صقر:ما قلت لي يتجي عالغدا
صقر: ماظن .. لو بجي بدق وبقول لك
ام صقر: الله يحفظك .. ولا تتاخر يابوي
صقر: ههههه.. انشالله يمه
وسكر صقر من امه وهو يضحك .. الى الحين لازم امه تختم كل مكالمه بلا تتاخر.. يا حليلك يا امي والله يحفظك لنا ......
دق على سعود الى كان معصب عليه مرره وواصل .. وعشان يراضيه مر عليه بالبيت وبالمره يسلم على خاله ابراهيم...
.........................

امل كانت جالسه بغرفتها .. دق الباب ودخلت مرت اخوها ابراهيم نوره ...
نوره: السلام عليكم امل
قامت امل من على السرير: وعليكم السلام هلا نوره
نوره جلست بالكنب الى بالغرفه: وينك امول ما نزلتى اليوم ابد
امل ابتسمت: مادرى اليوم حاسه بكسل ومالى خلق اقوم من على الفراش
نوره: ليكون تعبانه
امل: لا انشالله مو وقته .. بكره العزيمه وما ودى تفوتنى
نوره: ههههههه.. ايه صح شخبار عروس صقر انشالله حليوه
امل: ايه والله الى الحين ماشالله عليها ...
نوره: الله يوفقهم ...
امل: امييين..
نوره: جيت اقول لك انى بروح بيت اهلى اليوم ما تبين تجين معى..
امل باستغراب: ليه؟؟
نوره: امى تسال عنك كثييير
امل: ما تقصر خالتى والله .. ادرى انى مقصره بحقها
نوره: طيب تعالى
امل: لا نوره اعذرينى .. بوقت ثاني
نوره بعتاب: امل بيت اهلى قبل لا يكون بيت زوجك هو بعد بيت عمك ولهم حق
امل: ادرى نوره.. بس
نوره وهى تقوم: بكيفك ماراح اجبرك ..
وطلعت من الغرفه
امل وهي تنادينها: نوووره
التفت عليها نوره
امل وهو عاقده حواجبها: زعلتى؟؟؟
نوره ابتسمت لها: انتى تعرفينى اموول.. مستحيل ازعل منك انتى بالذات مهما صااار
امل ردت الابتسامه
.........................

صقر:ههههههههههههههه.. سعود الله يهداك شوى شوى عليك
سعود معصب: والله مالى خلقك انت ...
صقر لا زال يضحك: شسوى يا خوي مبسوط
سعود باستهزاء: واااضح
صقر: ههههههه طيب شوف انا ايش ذنبي اذا انت سويت لى فيها ذوق وما رديت امى
سعود: ذنبك انك ثور
صقر:هههههههههههههههههههههههههههههههههه
سعود: جد خلاص صقر بس ضحك ترى الموضوع تافه وما يسوى
صقر: والحين مين مكبره هاه
سعود: يا شيخ انحرجت رحت بكشتى وشكلى هذا
صقر وهو رافع حاجب: واذا؟؟
قطع كلامهم جوال صقر .. الى دق وكانت مزون هى المتصله عليه
صقر: دقيقه سعود ..
ورد على التليفون وهو يبتسم بوجهه خاله المعصب
صقر: هلا مزون
مزون: اهلين صقر شلونك
صقر: تمام وانتى؟؟
مزون: انا بخير .. اقول صقر انت بتتغدى اليوم بالبيت
صقر: لا بتغدى مع سعود
مزون: اوكى .. صقر ممكن اطلبك طلب
صقر ومتفاجئ لانها اول مره تطلبه: تفضلي
مزون:صديقتي جواهر تعبانه برجع معها من الجامعه وبجلس ساعه بس
صقر: وليه ...توك شفتيها بالجامعه
مزون: ايه بس هى تعبانه وابي اروح معها
سكت صقر ثواني وقال بعدها: ضروري تروحين ...
مزون وانقهرت: صقر جواهر صديقتي من الابتدائي واهلي يعرفونها وكنت اروح لها دائما لكن اذا ماتحب مو مشكله
صقر: يعني اذا قلت لا عاادي عندك
مزون وعصبت من الخاطر وحاولت ماتوضح: من حقك عموما ماصار شئ يالله فمان الله
صقر:الله معك

قفلت مزون واعتذرت لجواهر الي قدرت موقفها بسبب رفض صقر ..
صقر بعد ما قفل من مزون: ها بو عبدالعزيز نطلع نتغدى
سعود: يا شيخ مالى نفس
صقر: وانت مالك نفس لاي شي... اكيد اللوحه .. خلصتها؟؟
سعود: باقى صقر...
صقر: المهم بلا كابه وخل نطلع .. انا عازمك اليوم
سعود: ايه من قدك امورك ماشيه تمام
صقر: هههههه .. انشالله تستمر.. ويالله خل نمشى .. هيه مو بهالشكل .. روح بدل هالثوب .. ومشط هالكشه
سعود شافه بنظره وهو متنرفز .... بعدين ما قدر يقاوم وقام يضحك هو وصقر
................................

اول ما انتهى العشا راحت فوق لغرفتها.. مع ان الكل كان موجود.. حتى امل جات تعشت معهم .. اما هى كانت تحس بضيقه صدر.. وحبت تنفرد بنفسها .. دخلت للغرفه ومن غير ما تفتح النور سكرت الباب وراحت للسرير.. انسدحت عليه وهى تفكر .. تفكر بحالها وحياتها .. ياترى ربي ايش كاتب لى .. وين بكون السنه الجايه .. والا بكره .. افكار كثيره كانت تراودها .. عن حياتها وعيشتها هنا بيت ام صقر.. هم صح مو مقصرين معها.. بس هي تحس بشي ناقص بحياتها .. تحس بفراااغ كبير.. شعور غريب متملك قلبها وساكنه .. مشتاقه لك يامي .. ولهانه لضمتك ووجودك حولى .. للحنانك ورقتك ..لصارخك وهواشك .. لكل ذره فيك... اشتقت لحوارات مزون مع ابوي.. وجدالهم الى ما ينتهى .. الى فيه كل واحد منهم يبي يقنع الثاني بوجهت نظره .. اااااااه يا يبه ... ااااااااه يا يمه .. ليه رحتوا وتركتونا .. من لنا غيركم ... والا مين لى انا غيركم .. مزون خلاص تزوجت .. وارتبطت بعيله تحبها وشايلتها فوق راسها .. انا مالى مكان بينهم .. وجودى غلط .. عاله عليهم .. وانتى يا هلا مسكينه ...حرمتك من خصوصيتك وقديت حريتك .... لمتى بتصبرين على هذا الحال... لمتى بتتحملين وجودي ... اكيد بجي اليوم بتحسين بالثقل الى مسببته .. وبوقتها وين اروح ... انا خلاص مالى احد .. حتى مزون ارتبطت ... مهما كان مستحيل ترجع مثل .. انا ما الومهم .. ياربي ليه انا بالذات ليه انا الى يصير لى هالشي.. افقد ابوي .. وماتمر السنه الا افقد امى .. وبعد شهور افقد اختى ... ليييييه ياربي لييييييييه ... استغفر الله العظيم .. ابيش افكر انا .. اعوذ بالله من الشيطان ومن وسوسته .. بس مقدر .. والله مقدر .. مقدر اعيش هالعيشه ...
وقبضت يدها بقوه على المخده بنفس الوقت .. نزلت دمعه حاره على خدها ولامست يدها المقبوضه ..كانت هاللحظه بدايه سيل من الدموع
انفتح الباب وطلع خط نور انعكس على وجهها.. خلاها تلفه للجهه الثانيه ...
هلا بصوت واطى: نجود ..!!!
حاولت نجود تمسك نفسها وتخفض شهقاتها عشان ما تحس فيها هلا ..
رجعت هلا وسكرت الباب .. وتناهى صوتها لنجود وهى تقول
هلا: مزون نجود نايمه تبين اقومها..
بدى صوت هلا يخف لين اختفى ...ونجود على حالها

..........................

وقف صقر سيارته ...ولتفت على سعود قبل لا ينزل

صقر: ايش رايك ترجع معى ونشب الجمر ونسهر بالخيمه
سعود: لا يا شيخ .. الله عليك مواعيد
صقر وشكله متضايق: مالي خلق مشاكل تعالي ارجع معى
سعود ومعقد حواجبه: مشاكل مع مين
صقر باابتسامه باهته: مع حرمنا
سعود: هههههههههههههههه بديت ليه ايش سويت لها ... اعرفك؟؟
صقر: المهم بتجى ..او لا
سعود:هههههههههه لا طبعا.. بس لا تخاف بسهر هنا انتظرك يمكن تنطرد
صقر: بعد هذا الي ناقص
سعود: كل شئ بوقتنا جايز لاتستبعد شئ يالله مع السلامه
صقر : الله معك
ونزل سعود وهو يضحك ...

وصل صقر للبيت ودخله ما حصل ... اخذ نفس وطلع لغرفته فتح الباب وكانت مزون تكلم ومعطيته ظهرها ولاحست فيه

مزون: امنيات لاتضيعين حياتك طالما معك كرت رابح لاتستسلمين ابدا هذا مستقبلك حلمك انتبهي توافقين وتربطين مصيرك مع شايب

صقر : احم السلام عليكم
التفت له مزون: وعليكم السلام
رجعت تكلم: بحاول جواهر اجى بس ما اوعدك ..
مزون: ياشيخه مو مهم الاجازه يالله مع السلامه
قفلت مزون وهى تشوف صقر وهو يرمى شماغه على السرير وينسدح عليه بكل تعب وهو مابعد يبدل ..
مزون: تحب احط لك اكل او تأخذ دش اول
صقر وهو يتنهد : لا مو مشتهي شئ بس الله لايهينك عطيني كاس مويه
حاولت مزون ماتخاف بس ماقدرت شكل صقر مايطمن اعطته الكاس وجلست وسألته..
مزون: صقر فيك شئ تعبان??
هز صقر راسه وقام بتكاسل وراح يأخذ دش
نزلت مزون وجابت له شاهي وحطته .. طلع صقر من الحمام .. وشافها جالسه .. جلس جنبها .. ظلوا الاثنين ساكتين .. صقر كان متوقع مزون تكون متضايقه منه و ينتظرها تنفجر بوجه لانه ما وافق تروح بيت صديقتها .. اما مزون فضلت تسكت .. ما عرفت كيف تتناقش معه .. هي صح اخذت على خاطرها منه .. بس خلاص ما عاد تهتم بشي... لو بتركز على كل شي ما قدرت تعيش من القهر ....
قرر صقر يبدا الحوار:ما وريتينى ايش شريتى للعزيمه
مزون وهى تناوله بياله الشاي: ماعندي مانع بس شكلك تعبان
صقر ويتنهد: لا مو تعبان
قامت مزون وهي تقول: طيب الحين اجيبه
مسكها صقر من يدها قبل لا تبعد .. التفت عليه مزون بستغراب ...
صقر: بالاول ابي اعرف .. انتى تضايقتى منى اليوم
مزون وهى مسويه نفسها مو فاهمه: بايش
تنهد صقر: يعنى متضايقه ... طيب ممكن تجلسين ونتكلم ..
ارجعت مزون لمكانها و رفعت حاجبها: تفضل
صقر: تحبين نبدأ من موضوع النقاب او الرفض
مزون: ما يفرق الي يريحك
صقر: اوكي نبدأ من الاخير مزون انا قبل مااقول اثق فيك واكون مبالغ جدا بكلامي بقول لك اني اعرف عمي عبدالله اعرف كيف اسلوبه وتعامله اعرف تربيته لبناته فلا تتوقعين الرفض من هالباب ..
مزون: طيب طالما تثق بتربية ابوي الله يرحمه ليه رفضت
صقر: لاني صقر مو عبدالله ابو مزون الله يرحمه... مزون افهميني كون عمي يرضى على شئ مايعني اني اقبله... مو معنى كلامى انى مااقدر قرارات عمي.... لا ابدا لان صقر له شخصيته وقناعاته واسلوبه وبعد لاتتوقعين اني افرض رائي لا... لكن اعطيني وقت اتعرف عليك بالاول احاول افهمك بعدها صدقيني مابيكون فيه مشكله صعب جدا تطلبين تروحين لصديقتك واوفق مزون وانا اليوم اول مره اسمع باسمها .. لو ما تعنين لى ما اهتميت ورفضت
مزون: اوكي ماصار شئ
صقر: لا يامزون تكلمي قولي اذا كلامي مااقنعك
سكتت مزون وصقر ينتظرها
مزون: شاهيك بيبرد .. مو شاربه
صقر: مو مناقشتنى ؟؟؟
مزون: صقر قناعتي مو مهمه .. فليه اناقشك فيها
صقر باابتسامه: افا يابنت عبدالله ايش هالكلام تعودنا بكلامنا مع ابو مزون الله يرحمه اقنعني واتنازل... صح والا انا غلطان؟؟
ابتسمت مزون : ايه الله يرحمه... صقر كلامك نوعا ما مقنع... يمكن معك حق لكن اعذرني انسانه وقفت معي بااشد واصعب المواقف ولما احتاجتني مااقدر.... كان صعب لو كنت ببيت عمي قلت اوكي لكن هنا ماتوقعت هالشي
صقر: مزون كل شئ بيتعدل لكن نحتاج وقت لنا
مزون: ان شاء الله
صقر: موضوع النقاب يامزون يطول الكلام فيه لكن بقول لك كلمتين اكره شئ بحياتي النقاب ولااحب اشوف احد من اهلي يلبسه
مزون: طيب لييه .... شلون اشتري مااشوف
صقر: نظرك اوكي ماتلبسين نظاره ولاعدسات اذا مو غلطان
مزون: حتى ما اقدر.. انت جربه وشوف
صقر: مزون اذا الوحده تلبسه حتى تشوف الي تشتريه تقدر تتحكم فيه تغطيه وتفتشه
مزون: شغله .. يعنى بجلس كل مااطلع من محل اغطي واذا شفت شي كشفت
رفع صقر حاجبه ولاقال شئ واستحت مزون
مزون: عطني وقت اتعود .. وانا بحاول ...
صقر: طيب المهم انا تعباان بنام
مزون: والعشاء ؟؟؟
صقر: شبعان
مزون ومعصبه: تعشيت بعد برا
صقر وهو معطيها ظهره ورايح لغرفة النوم: لا بس شبعت من شوفة الزين
سكتت مزون واستحت واحتارت ياترى يقصدها او يقصد احد ثاني ولو كان يقصدها ليه قالها بهالاسلوب وحتى مانظرها


فتحت عيونها على صوت الماى بالحمام ... حست بالسرير فاضى .. التفت على الجهة الثانيه تشوف الساعه .. كانت سبع ونص الصبح .. ايش عنده قايم بدري...
طلع صقر من الحمام وهو حاط الفوطه على كتوفه .. وينشف وجهه .. وشعره لازال مبلل .. نزل الفوطه وشاف مزون تشوفه وهي بالسرير ابتسم لها ..
صقر: قومتك من النوم
مزون وهى تتعدل بجلستها: لا ما ازعجتنى .. انا خلاص قمت
راح صقر للتسريحه وظهره لمزون .. واخذ المشط يمشط شعره وهو يشوف مزون بالمرايا
مزون: شكلك بتطلع
صقر: ايه عندى كذا غرض
مزون: بس اليوم العزيمه
صقر ابتسم ابتسامه عريضه اظهرت خطوط بزاويا عيونه اول مره تلاحظهم
صقر: عزيمه بالصبح...
عضت مزون على شفتها التحتيه .. عرف صقر من هل الحركه انه احرجها .. قام ضحك
صقر: بس ولا يهمك مو متاخر
قامت مزون : طيب انتظر لا تطلع الا وانت فاطر
صقر: قهوة تكفي
مزون وهى تبتسم: ماجربت بانكيك مزون
صقر: ههههه... نجربه بس لو صار لى شي انتى المسؤوله
مزون: اوكى دقايق وانزل واسوى لك الفطور
............................................

دخلت ام صقر لغرفة هلا .. الى كانت نايمه هى ونجود ...
ام صقر وهى تفتح النور: بنات يالله قوموا ..
غطت هلا نفسها بالفراش بسبب النور الى انفتح فجاه ..
هلا: يمممه .. اليوم الخميس ايش يقومنى بدرى
ام صقر: أي بدرى الساعه 11 الظهر .. مرت اخوك قايمه من 8 ؟؟؟خلاص قوموا تراكم خستوا نوم
هلا: يمممه .. طيب تو الناس بقوم 1
ام صقر: لا قومى الحين .. وابيك تنزلين تسوين حلا عشان الليله
هلا طلعت راسها من تحت الفراش وهى فاتحه نص عيونها
هلا: يمه .. مو طالبين بوفيه من المطعم
ام صقر: ايه طالبين ..
هلا: ليه طيب ما طلبوا حلى بعد العشا
ام صقر: طلبنا تشيز كيك وام على بس .. والباقي انتى تسوينه... وخالتك امل بعد بتسوى نوع ثانى
هلا: مو تقولين مزون قايمه .. خليها هى تسوى
ام صقر: والله البنت مو مقصر من الصبح وهى تساعدنى ما كان العزيمه لها .. مو حلوه اطلب منها .. يالله انتى قومى وسويه
هلا: يمه ايش اسوى .. والله ماعرف
ام صقر: ايه هذا الى فالحه فيه الاكل بس .. اما الشغل ماعرف اسوى ومادري ايش...قومى هذا كتاب الطبخ عندك .. خذي منه الوصفه
هلا: يوووه يمه طيب ..
ورمت الفراش وقامت ..
ام صقر وهى طالعه من الغرفه : قومى بنت عمك وانزلوا
هلا بتذمر بعد ما سكرت الباب امها: اوووف حتى الخميس نقوم بدري..
سمعت صوت من جهة نجود ..قامت رفعت الفراش من على نجود شافتها تضحك
هلا باستغراب: ايش عندك تضحكين
جلست نجود على السرير وهى تضحك: هههههه ..
هلا رمت المخده على نجود: شف هذي انا معصبه وهى تضحك ... اقووووووول قومى انتى وكشتك خل ننزل لامى
بدت تعدل نجود شعرها باصابعها وقامت من الفراش.
نجود: هههههه اضحك على تحلطمك ..
هلا: يعنى ايش رايك .... اليوم الخميس .. وانا انتظره بفارغ الصبر
نجود: جد هلا ماعندك سالفه 11 وتقولين بدري
هلا: والله انا الى سهرت امس مو انتى من الساعه 9 نايمه
نجود:ليه متى نمتى امس
هلا: وحده ونص
نجود: ههههههههههههههههههههههههه قسم بالله انتى خطيره ..يالله انا حاجزه الحمام قبلك
هلا وهى تلحقها: ما يصير ...انا قايمه قبلك
دخلت نجود الحمام وهى تضحك وسكرت الباب عليها
نجود: هههههه روحى حمام ثانى
هلا: طييييب تشوفين...اووف ابي انام

....................


الكل كان مستعد للعزيمه ... فيلة ام صقر ماهى كبيره مرره ..بس ورى البيت فيه حوش مرره كبير وفيه خيمه ومسبح وبعد مساحه فاضيه ..رتبوا فيها طاولات وكراسى ... اما البوفيه حطوه جهة المسبح .. وشغلوا الفلاشات .. كان منظر انعكاس النور على سطح البركه معطيه لمسحه حلوه .. بالبدايه بيضيفون الحريم بالمجلس .... واذا جا وقت العشا بيطلعون برى عند البوفيه ...خصوصا ان الجو هالايام حلو ربيعى
عشان كذا البيت كله كان مشغول.. العمال برى مع صقر يوجهم وين يحطون الطاولات ويرتبون المكان .. وامل جاتهم من الصبح تساعدهم .. والبنات بالمطبخ ما بقى وصفه الا جربوها .. يعنى الحماس مشتغل عالاخر ...
هلا: الحين كم كاس طحين كاتبين
نجود وهى تدور بالكتاب: مادرى ضاعت الصفحه
هلا: ياربي .. بسرعه ابي ارفع هالخصله من وجهى مزعجتنى يدي كلها طحين
نجود: هههه شكلك تحفه
هلا وهى تنفخ تحاول تطيرها: ادرى .. انتى دوريها بس
نجود: ايه مكتوب كاسين طحين .. تعااالى ليكون حطيتى بيض
هلا وهى عابسه: ايه ليه
نجود وهى تبتسم : مو هذا الحلا الى فيه .. سورى قريت الوصفه الخطا
هلا صرت على اسنانها: اااااااه ...
وحطت بقوه الكاس الى بيدها على الطاوله ..
نجود: شوى عن ينكسر
هلا وهي تكع على وجهها : مالت على هالخشه .. حنا وجهنا وجهه طبخ ..
نجود: تدرين خل ننادى مزون تساعدنا
هلا: امى محلفتنى ما اقول لها شي.. تقول خلوها اليوم كافى سوت الفطور لهم ..
نجود: المشكله مزون هى راعيه المطبخ بالبيت وهى الى تعرف انواع الحلا
مررت هلا ظهر كفها على خدها ترفع الخصله المضايقتها
هلا: اوووف هالشعر بقصه
نجود: ههههههه... كل خدك طحين
هلا: احسن .. تدرين ماراح اسوى شي .. خل نروح المزواق وناخذ لنا كيك
نجود: لا فشيله امك ايش بتقول
هلا بياس: ما اتشوفين ما نعرف نسوى شي
نجود: شوفى هذي شكلها سهله خل نسويها ..
هلا:اذا فيها بيض مابي ..ريحته ما اواطنها ... يالله قدرت اتحمل ريحة هذي .. والى يقهرانها مافيها بيض بالاساس
نجود: طيب خل نعيدها
هلا بجد: لا خلاص انا كرهتها
نجود: هههههههههههههههههههه احلفى بس.. تكفين حبيها
هلا: تتطنزين انتى وجهك ..تدرين نجود ايش رايك انا الى اقول لك المقادير وانتى الى تسوينها
نجود: لا.. ماحب المس الطحين
هلا وهى ترفع حواجبها وتنزلها: لا تتهربين عندنا قفاز
نجود: تدرين انا وانتى نسوى ..
دخلت عليهم امل
امل: ها سويتوا شي
هلا: تخيلي امول بعد ما حطينا كل المقادير طلع اننا خالطين بين وصفتين وحطينا بيض معهم بالغلط
امل ضحكت: والله هذا من قل الدبره
هلا: اقول امووول .. ايش رايك تساعدينا
امل: اوكى جيبوا الكتاب خل نختار منه نوع .. بس بشرط تساعدونى
نجود وهلا براحه : اكيد ..

........................


خالد كان بالطريق جاي من ابها .. كان عارف بالعزيمه .. اول ما وصل البيت شاف الحوسه والزحمه .. سلم على امه وجلس معها شوي ولان امه كانت مشغوله طلع .. وهو طالع شافه صقر الى لازال برى مع الرجال
صقر: تعال خالد وين رايح
التفت له خالد وشاف: هلا صقر كيفك
سلم عليه صقر: بخير .. متى جيت
خالد: من ساعه تقريبا .. انت الى وينك
صقر وهو ياشر على الرجال: جالس معهم لين يرتبون كل شي
خالد: ههههههه الله يعينك .. اشوف كل البيت مشغول للعزيمه
صقر: شفت كيف
خالد: وليه الرجال ما لهم
صقر: امى قالت لى نسوى لهم بالاستراحه ... بس انا ما وافقت ... قلت لها ماله داعى ..
خالد: هههههههههه صراحه انت خطير لا عرس ولا عزيمه
صقر: تاركهم لك
خالد: انشالله
صقر: هههههههههه.. اشوف الفكره داخله بالك
ضحك خالد: ليه لا
صقر: الله الله تطورات جديده .. ومين سعيدة الحظ
خالد: هاهاى ذا بعدك ... مو قايل
صقر: افا هذا وانا اخوك الوحيد
خالد: هههههه ومين قال انك اخوي الوحيد والا ناسى بدر
صقر باحتقار: هذا تعتبره اخو .. تصدق حتى مبروك ما قالها لى
خالد: مراهق وطايش لا تهتم فيه
صقر: ولو .. لو ابوي ما اهتم فيه بيضيع .. وبيكون مصيره يا السجن يا مستشفى الامل
خالد: هيه صقر خير ايش تقول انت تراه اخوك
صقر بقرف: ما تشوفه .. تصدق اتنفشل منه
خالد: ماعلينا .. ابوه اومه موجودين وهم يعرفون يوجهونه.. المهم الليله ايش الترتيب
صقر عقد حواجبه: أي ترتيب
خالد: البيت بيكون مشغول .. وحنا ماعندنا شغل .. انت وين ناوي تروح
صقر: مادري خل اخلص من هالعمال بالاول
خالد: خلاص انا بروح لسعود الحين واتفق معه على ترتيب معين وبنعطيك خبر
صقر: ههههه ايش عندك على كلمه ترتيب انت بعد
خالد ابتسم ابتسامه برئيه: مادرى عاجبتنى
صقر: ههههه .. طيب ليه ما نجلس فوق الدور الثانى بيكون فاضى
خالد: ياخى انا جاي من شغل وملل عشان اتونس تبينى احبس نفسي بالبيت..
صقر: خلاص اذا اتفقت مع سعود عطنى خبر وانا بجي لكم اول ما اخلص
خالد وهو طالع: تم
............................

ما خلصوا العمال من ترتيب وتركيب اناره وفلاشات الا الساعه 6 المغرب ... اول ما انتهى منهم صقر راح لغرفته وهو تعبان .. من قومه الصبح ما ارتاح .. بعد ماطلع بدرى رجع تغدى وبعدها قابل العمال ... دخل الغرفه يبي ياخذ له شور .. شاف الحمام مشغول ... انسدح على السرير شوي عشان يريح عضلاته ..على ما تطلع مزون

مزون راحت غرفتها بدرى عشان تبدل وتلبس.. ماتدرى متى المعازيم بيجون .. ام صقر قالت لها بعد صلاة العشا .. بس خافت وحده مو القرايب مره تجي ابكر .. فما حبت تقابلهم الا وهي لابسه .. امل اقترحت عليها تروح الكوفيرا عشان تسوى شعرها .. ولان مزون شعرها ناعم وما يحتاج حتى استشوار..... وميكاج الكوفير ما يعجبها لانه يكون ثقيل وكثير .. ما حبت تروح ...
يوم جات الساعه خمس العصر راحت فوق عشان تلبس .. طلعت الفستان البسيط الى شرته من السوق .. كانت محتاره بين اثنين .. وبعد عدة مرات تبديل ... وساعه واقفه قدام المرايا .. استقر قرارها على فستانها التركواز .. ماهو كله تركواز فيه تموجات الوان كثره بس غالب عليها اللون التركواز .. كان طويل مره ولازم تلبس معه كعب عشان ما يلامس الارض.. وجاى معاه شال ماهو عريض .. حطته على رقبتها بحيث ذيول الشال طايحه ورى على ظهرها .. عشان كذا ما لبست قلاده .. اكتفت بجود الشال‎ ‎حول رقبتها ...
ولان انارة الغرفه صفرى وضعيفه اما الحمام انارته بيضا .. ففضلت تحط ميكاج فيه .. حطت لها روج بيج وفوقه قلوس .. وكحلها على داخل مع ماسكرا وبودرا.. كان مكياجها مرره بيسط ....الشي الغامق الوحيد هو الشدو .. عشان يناسب عزيمه بالليل .. بعد ما انتهت من المكياح طلعت من الحمام وشافت صقر منسدح نصه على السرير بالعرض .. ورجوله تلامس الارض .. ومغمض عيونه ... راحت لعند التسريحه وعدلت شعرها
صقر وهو لازال مغمض عيونه: خلصتى
مزون : ايه ..
فتح عيونه وقام وهو حاس انه يحتاج لدوش ينشطه شوي .. كان ظهر مزون مقابله .. شاف شعرها طايح وواصل لتحت كتوبها بشوي .. ظل واقف يتامل انعكاس صورتها بالمرايا..
مزون كانت تحط عطر .. لاحظت وقفت صقر وراها .. التفت عليه .. كان يشوفها بنظرات غريبه .. وعلى وجهه علامات الصدمه ..
مزون وهي خايفه: صقر ايش فيك..
التقت عيون صقر بعيون مزون .. وبعدها قامت تتجول على قسمات وجهها .. من عيونها الكبار الى شعرها الى قاصته بشكل مدرج اقصر خصله توصل لنص خدها واطولها تلامس كتوفها .. كان طايح بعفويه على كتوفها ومعطيه منظر رقيق مرره .. اقل نسمه هوى اكيد بتطيره ... بعدها نزل على فستانها .. وقام يشوفها من فوق لتحت وهو يقيمها .. ومزون واقفه مستغربه ...
مزون مره ثانيه: صقر ايش فيك
رفع صقر راسه لوجهه مزون من جديد ..
صقر: مافينى شي؟؟
مزون وهى عاقده حواجبها: طيب ليه تناظرنى كذا ووكانى كائن فضائي
ابتسم صقر: مصدوم
زادت العقده بين الحواجب وبخوف: ليه فستانى مو حلو .. شكلى غلط
اتسعت ابتسامه صقر : اذا شكلك غلط شلون يكون الشكل الصح .. بالعكس فستانك مرره حلو ولابق عليك كانه مفصل خصيصا لك
مزون: طيب ليه تشوفنى كذا دام الفستان زين
هالمره صقر ما ابتسم وبجد : اول مره اعرف انك حلوه لهالدرجه
احمر وجهه مزون وحست انه يحترق .. مع انه الى قاله كلمه عاديه .. بس اثرها على مزون كان قوى ..
مزون تبي تضيع السالفه : بتطلع صح
صقرابتسم لانه فهم عليها : ايه بروح للاستراحه .. الربع عاده يجتمعون بالوقت..
مزون: طيب انا بنزل بشوف اذا خالتى تبي شي..
وطلعت من غير ما تنتظر رده ... اول مره يناظرها صقر بهالنظرات .. او يقول لها هالكلام الحلو بهالشكل المباشر .. وهالشي لانها مو متعوده عليه احرجها كثير ..
صقر ظل فتره يتامل المكان الى كانت مزون واقفه عليه .. مع انها خلاص راحت .. ما كان يتوقعها بهالجمال والرقه .. طول الفتره الى عرفها فيها كانت دايما ترفع شعرها بكلّب .. واذا كان مفتوح يكون بسبب نومه ووتطيح البكله(المشبك) وبمجرد ما تقوم تعدله .. كان يعرف ان شعرها لكتوفها وانه ناعم .. بس ما توقعت يكون بهالحلاة .. ولو كان اطول كان احلى .. من اليوم ورايح ماراح يرضى لهالشعر ينقص .. اما مكياجيها مع انه بسيط الا انه يعتبر كثير بالمقارنه مع الى كانت تحطه اول .. من جد صدمه شكلها .. ابتسم بسخريه ودخل ياخذ له شور
..................

نزلت مزون تحت شافت ام صقر لابسه الجلابيه ومبخره البيت وجالسه بالصاله .. اول ما شافتها ام صقر ابتسمت بوجهها ...
ام صقر: زين لبستى تو نوره مرت اخوي داقه تقول انها بالطريق
مزون وهي تجلس جنب ام صقر: نوره ام عبدالله
ام صقر: ايه .. الى شفتيها قبل يومين
مزون: يا حليلها بس ما شفت بناتها
ام صقر: نوره ما عندها بنات .. كل عيالها اولاد ..
مزون: الله يخليهم لها .. طيب البنات وينهم
ام صقر: مادري والله
امل دخلت وهي معصبه: والله سخيفات
ام صقر : مين؟؟
امل: البنات في غيرهم .. لعبو على بكلمتين وخلونى اسوى شغلهم
مزون: ههههههههه
امل تشوف مزون: الله مزون الفستان طالع عليك يجنن .. مرره يناسب.. تصدقين شكله عليك احلى من المحل بالف مره
مزون: تسلمين لى ..... وانتى ما لبستى
امل: بروح الحين .. الجميلات جلسوا يسولفون فوق راسى وانا اسوي كل شي .. حتى ادينهم ما توسخت .. وفجاه التفت ولا اشوفهم .. طلعوا رايحين يلبسون وتركوا كل شي فوق راسى ..
ام صقر: يالله انتى الكبيره
امل: حرام عليك .. مو لانى تزوجت وانا صغيره تعتبرونى كبيره..تونى خمس وعشرين
ام صقر:طيب لا تضيعين وقتك بالكلام وروحى البسى لك شي
امل وهى طالعه: بلبس بغرفتك مابي ادخل غرفه هلا ... مالى خلقهم
ام صقر: الى يريحك بس اخلصى قبل لا يجون الضيوف
امل وصلت عند الباب لفت وشافت مزون
امل: تدرين مزون خساره ليت صقر هنا عشان يشوفك بهالشكل
مزون بعفويه: الا هو فوق
امل وهى تغمز:هههههههه غريبه خلاك تنزلين
مزون انحرجت مرره من كلام امل ياربي ايش عندهم الناس اليوم جالسين يحرجونى ...
ام صقر: والله شكل المعازيم بيطلعون وانتى الى الحين ما بعد تلبسين
امل وهى تضحك: لا وبعد ازيدك من الشعر بيت .. باخذ لى شور
ام صقر: المهم لا تتاخرين عارفتك ساعه تلبسين ..
امل: هههههههه انشالله يالغاليه ماراح اتاخر
.............................


كانت حاطه على قناة الاغانى ورافعه الصوت للاخر.. وهى جالسه على الكنب .. وتقرى المجله .. وتركيزها ضايع بين المجله والمناظر الخالعه بالفيديوكليبات الجديده .... مر اخوها من عندها ..
حطت غاده المجله ونادته
غاده : بدر
بالبدايه ما سمع صوتها بسبب صوت التلفزيون .. ضغطت على ميوت وصرخت
غاده: بدر
رجع بدر ودخل للصاله .. ومن غير نفس
بدر: هاه
غاده: وين بتروح
بدر: بطلع بشم هوا .. عندك مانع
غاده وهى تنقز من الكنب :حلو .. جيت فوقتك ...
بدر وهو عابس: خير ايش عندك
غاده: بروح معك.. دقايق البس عبايتى
بدر: فاضى لك انا.... اقول روحى بس
غاده: يوووه بدر مرره زهقانه ماعندى شي
بدر: دقي على صديقاتك .. او اطلعى معهم
غاده: سوالفهم بايخه .. والطلوع ولا وحده منهم فاضيه ومو راضين
بدر بسخريه: طيب ايش اسوي لك
غاده: خذنى معك
بدر: امى راحت طالعه .... ليه مارحتى معها
غاده: كنت نايمه طول اليوم وما دريت انها بتروح
بدر: مو ذنبي دبري لك طلعه ... يالله تشاو
غاده: وجع مالت عليك يالقرد
بدر: مالقرد الا انتى يا بقره
بدر متعلم هالايام يعلق على غاده ويناديها بقره بسبب الخزامه الى بخشمها ...
غاده بعصبيه: انقلع بس
وطلع بدر وهو يضحك .. اما غاده رمت نفسها على الكنب وهى مرره منقهره .. مابقى وحده من صديقاتها الا ودقت عليها .. الى مشغوله .. والى عندها اختبار.. والى امها ما رضت لها تطلع .. الكل ما كان فاضى لها .. رجعت رفعت صوت التلفزيون .. ياربي حتى امى طلعت وتركتنى .. ليه ماقالت لى اروح معها .. وابوي مادري وينه .. كانى سمعت اامس امى تتكلم بالتليفون وتقول انه مسافر من يومين عشان بضاعه يبي يجيبها ... جلست فتره تقلب بقنوات التلفزيون .. بعدين سكرته .. وبصوت عالى
غاده: جيزيلااااااا
جات الخدامه من اول صرخه .. لانها عارفه اذا تاخرت ايش يجيها من غاده
جيزيلا: yes ghada
غاده: did mama tell u when she will be come?
جيزيلا: no sorry .. she didn't talk to me
غاده: اووف ok .. you can go
وتو جيزيلا بتطلع ..
غاده : ..ooh ya .. make apple juice for me .. I will be in my room
جيزيلا: alright.. do u wanna something else
غاده: no .. بس ابيك تنقلعين عن وجهي
جيزيلا وهى مو فاهمه :sorry .. what ?
غاده من غير نفس وبقرف: just go ..
طلعت جيزيلا خلاص تعودت على هالمعامله مو من غاده بس.. حتى ام بدر وبدر .. الكل بالبيت يزفها ويهاوشها .. الوحيده الى كانت طيبه معها مزون .. اما نجود ما احتكت فيها كانت طول الوقت بغرفتها .. مزون الايام القليله الى عاشتها بيت عمها .. حسست الخدامات بالفرق بين المعامله .. ومو لانهم خدامات عادى نصرخ بوجههم ونقرف منهم وما كانهم مخلوقات مثلنا حالنا حالهم .. الفرق ان الاحوال الماديه جبرتهم يخدمون الناس ويتغربون عن اهلهم .. راحت جيزيلا للمطعم تسوى لغاده الى تبي ..
اما غاده دخلت غرفتها ..
ياربي ايش هالمملل ايش هالزهق .. فتحت دولابها تطلع لها بيجاما عشان تنام مع انها قضت طول يومها بنوم .. بس بسبب الفراغ الواحد يلجا لاشياء غريبه .. فجاه طرت في بالها العزيمه .. عزيمه مزون .. هلا قالت لها تجي .. ليه ما تروح وتغير اكيد بتكون عزيمتهم ممله ومافيها شي.. بس ايش وراها .. خل تضحك شوي .. وباقل من ثانيه سكرت دولاب ملابس النوم وفتحت دولابها الثاني.. جلست تتفرج على ملابسها .. بعدين ابتسمت بخبث وهى تطلع لها بدله .. هى تعرف اهل ام صقر ..ناس ملتزمين ويخافون ربهم .. خل تشوف ردت فعلهم وايش بيسون اذا شافوها بهالبس ..

بعد ما لبست حطت جل بشعرها عشان توقفه بشكل اكبر .. وكثرت الميكاج بطريقه مرره ماهى حلوه .. وابتسم لصورتها بالمرايا وهى تتامل نفسها وراضيه بالشكل الى صارته ..دق الباب ودخلت الخدامه وهى حامله صينيه فيها عصير التفاح..
غاده من غير ما تناظرها اخذت شنطتها وطلعت من الغرفه: spill it
ونزلت تحت .. وجيزيلا واقفه بمكانها وتشوف ظهر غاده وهى تختفى عنها ..
.............................

ايش بتكون ردت فعل الموجودين بالحفل؟ لمنظر غاده؟؟ وكيف هو منظرها؟؟
هلا وام صقر.. كيف بيستقبلونها؟؟
والعزيمه بتمر بسلام والى بصير فيها شي يخرب كل شي؟؟
الوضع بين مزون وصقر بدى يستقر.. ؟؟ بس لمتى بيستمر هالشي؟؟ وايش الممكن يصير؟؟
نجود حالتها النفسه مو اوكى مع ان اهل ام صقر مو مقصرين معها؟؟ ممكن يتحسن هالوضع او لا؟؟
امل وسر زواجها .. متى راح ينكشف لنا ونعرف قصتها؟؟
سعود الى الحين ما تطرقنا له .. ياترى ايش صار بحياته وخلاه هالانسان المرهف المحطم؟؟
خالد بيظل عنصر ثانوي والا بيطرا جديد بحياته ؟؟
جواهر وماساتها.. متى بتنتهى وبيد مين؟؟

كل هذا بنعرفه اكيد بالجزء الجاي.. والاجزاء الى بعدها .....