@@@ هنا بداية النزف الثاني لقة مزون @@@

وقف صقر وهو معصب وقال..يبه بنت عمي مو قطعة اثاث تدخلها معي بمساومه
يقاطعه ابوه..اسمع وصلك الكلام يالله رح شف شغلك وافقت تعال نملك الخميس ماوافقت دبر نفسك
طلع صقر وهو معصب واتصل بسعود خاله وقال له يجي البيت واجتمع معه وامه
صقر بقمة توتره ..شفتي يمه ماقلت لك ابوي مابيعطيني
سعود..الحين وحده بيزوجك اياها الثانيه مجانا
صقر وعصب..سعود لاتتريق ارجوك مو وقته
سعود معصب..وانا صادق ابوك شلون يفكر يااخي بنات اخوه يرخصهم كذا
ام صقر..خلصت كلام انت وياه
استحى سعود وصقر انه يرفعون اصواتهم قدام ام صقر
سعود..تفضلي اختي
ام صقر..اسمعني لين اخلص كلامي وبعدها رد

صقر..تفضلي يمه
ام صقر..انت طال الزمان او قصر بتتزوج هذا اول شئ وبعدين ماانت صغير سنك مناسب وكبير بعد وغير كذا هذي بنت عمك ويتيمه اما اختها مابنعجز على سكنها معنا وعمك عبدالله وزوجته يستاهلون من يحشم بناتهم
صقر..يمه انا ماابي اتزوج ولاانا متهيئ الحين ولاتناسبني
ام صقر..كيفك انا قلت الي عندي ومزون من احسن البنات
صقر ويدور حجج ..يمه لسانها طويل
سعود ويضحك..هههههههههه هذا الي مضيق صدرك اصلا اذا تزوجتك مابتنطق ابدا خصوصا انك ماتحكي مع اي احد
صقر..احترت
ام صقر..صقر بنت عمك يتيمه لاتأخذها عشان تزيد عذابها
طلعت ام صقر وتركت صقر وسعود ودخل خالد وعرف بالموضوع
خالد..طيب ليه ماتوافق عمي عبدالله الله يرحمه كلنا نعرف تربيته لبناته يعني البنت ماعليها قصور
صقر..مو المشكله بالبنت المشكله اني انا مو متقبل الزواج بهالوقت وبصراحه البنت صار لي معها كم موقف ولااعرف مااحس انها تناسبني بعدين بين يوم وليله اتزوج هذا سلق بيض مو زواج
سعود..انت فكر الى بكرا واستخير والله يوفقك
خالد..بس تعال البنت تدري وموافقه
سعود..ههههههه طموح خالد تتوقع ابوك بيعطيها خبر
صقر..يصير خير احترت المشكله حتى لو بعت سيارتي وسيارتك مابيوفي المبلغ
خالد..عشان مره ثانيه تحسبها صح مو تدخل بمشروع وكل يوم طالع لنا بتكاليف زياده طيب اعطيك المبلغ الي عندي مايمشي امورك
صقر..يااخي قدر الله وماشاء فعل مايكفي يالله انا بطلع ارتاح
سعود..وانا بروح للبيت اكيد امل الحين طفشانه كالعاده
خالد..على فكره انا بعد يومين بسافر تعالوا اسهروا عندنا اليوم
سعود..اشوف يالله فمان الله
خالد..الله معك



مر الليل طويل على صقر الي كان نادر جدا مايجلس مع نفسه جلسة مصارحه يحاول يفسر مواقفه ويقيم تفعاله ..ظل يسأل نفسه هل زواجه من مزون بنت عمه عبدالله الي الكل يعمل له الف حساب حل صحيح او انانيه منه انه يضيع حياة بنت عمه لسبب ومصلحه تعود له بالاول والاخير ..احتار صقر ساعه يتوصل لقرار واحد مافيه غيره وهو الرفض وساعه يقول بنت عمه وزواجه منها مافيه اي اساءه لها احتار وظل يقول ويعيد بالاخير اجل كل شئ وحط راسه ونام ..


اما ام بدر كانت على اعصابها تنتظر موافقة صقر لانها على حسب كلامها راح ترتاح من هم كبير على قلبها وجود البنات رغم انهم منعزلين لكن كان يسبب لها حالة قلق شديده ..


الصباح عالفطور الكل كان موجود فتكلم خالد
خالد..هاصقر اتخذت قرار مامعك وقت وابوك تعرفه
هلا بحماس ..اي قرار
خالد..اللقافه ذابحه ناس
هلا وتلتفت على صقر..اي قرار صقر
ام صقر..بس اتركوا اخوكم والله يكتب له الي فيه الخير
صقر..امين يارب انا طالع الحين واتوقع اني اوافق لان ماعندي حل ثاني
ام صقر ..الله يوفقك
طلع صقر وجلست هلا تحن عليهم لحد ماعرفت الموضوع
هلا..هههههههههه الله صقر ومزون يعني بنكسر الروتين بيصير فيه مشاكل عندنا
ضربتها امها..شو هالكلام
خالد..ليه بنت عمك ماهي سهله
ام صقر..مزون مافيه مثلها بس ظروفها
هلا..يمكن لكن مااقدر اقول انها سهله يعني هي وصقر راح يحدث انفجارات
خالد..هههههههه كويس انيمو معكم
ام صقر..قم انت واختك عن وجهي اشوف
طلع خالد وهلا وتركوا امهم تفكر بحياة ولدها الجديده الي انفرضت عليه هل بيكون سعيد او لا ولما ماقدرت رفعت يدها لربها تدعيه انه يسعد ولدها ويوفقه بحياته ويرزقه الذريه الصالحه


بالسياره كان خالد وهلا يسولفون بطريقهم للجامعه لان خالد تبرع يوصلها اليوم
هلا ..طيب تتوقع مزون توافق
خالد ومبتسم..والله انك على نياتك على قولة سعود وعلى بالك ابوي بيشاورها بيزوجها وبس
هلا..الله يستر
خالد..تعالي احنا مو ناقصين مشاكل البنت كيف اخلاقها
هلا بااستغراب..خالد شفيك مزون ونجود بنات عمي عبدالله وتسأل عن اخلاقهم
خالد..عمي عبدالله الله يرحمه صح مااحد يقول بتربيته شئ بس اخاف تغيروا بعد ماتوفى
هلا..لا تطمن ماتغيروا بس الحزن والألم دخل حياتهم لكن نظرة الكبرياء مازالت بعيونهم رغم كل شئ
خالد مبتسم..قلتيها بنات عبدالله ماتهزهم ريح الله يوفقهم
هلا ..بس هنا خلاص بترجع تأخذني
خالد..كأني اعطيتك وجه زياده يالله مع السلامه
هلا وتضحك..مع السلامه


دخلت هلا للجامعه وراحت للقاعه والتفت كل البنات لكن ماحصلت نجود واستغربت لان نجود مستحيل تغيب عن الجامعه مو شطاره لكن لانها تهرب من البيت للجامعه ومثل ماتقول هي المتنفس الوحيد لها


مزون كانت مطنشه محاظرتها وجالسه تسولف مع اعز واغلى صديقاتها جواهر
مزون..المهم انتي قولي لي شو اخبارك
جواهر مبتسمه..تقدم لي واحد غني وبيحط لي سواق وسياره تحت امري وقصر بأسمي وخدامات من كل الجنسيات ومبلغ وقدره
مزون تقاطعها..الله من وين جاك هذا
جواهر..من وين من عمتي لا المهم هي تقول لامي عنده وعنده وامي تقول اهم شئ اخلاقه والا الفلوس ماتهم بالاخير طلع العلم الاكيد الرجال متزوج وعنده عيال ويبي يتزوجني بالسر
شهقت مزون وبعدين ضحكت بصوت عالي بالوقت الي وصلت لهم هلا واستغربت من زمان ماشافت مزون تضحك
هلا ..ان شاء الله دوم اولا السلام عليكم
مزون وجواهر..وعليكم السلام
هلا..وين نجود ليه ماحضرت
مزون..والله نجود مالها خلق ونامت قلت اتركها براحتها وتقول عندها رصيد غياب
هلا..لو قالت لي ماحضرت بس اوريك فيها
مزون..اجلسي هلا
هلا..لا بطلع مليت بطنش المحاظره الاخيره
مزون..معك بطاقة خروج
هلا..لا بس كلمت خالد وترجيته يجي يأخذني وبطلوع الروح وافق
جواهر..طيب طنشي واجلسي معنا
هلا وتفكر ..هي مو شينه بتصل
جلست هلا واتصلت بخالد اخوها
هلا..حيا الله هالصوت هلا خالي شلونك
سعود..بخير انتي شلونك وليه الشيخه مابتحضرين
هلا..هههههههه مااقدر مامعي احد اسولف معه
سعود..وين ربعك
هلا ..كلهم يجلسون بالاول الا نجود بنت عمي ولاحظرت اقول خالي وين خالد
سعود..معي احنا عندك
هلا..خساره كنت بهون واجلس مع البنات
سعود..اقول اطلعي لاانزل عليك مخليتنا نضرب مشوار بهالشمس وبعدين تقولين هونت
هلا..خلاص بطلع باي
سعود.مع السلامه


هلا..سوري بنات مثل ماسمعتوا يالله سلمي على نجود مزون
مزون..يبلغ سلمي على خالتي الله معك
راحت هلا والتفتت جواهر على مزون..طيبه كثير هلا
مزون..اعرف بس مشكلتي احيانا اني مااقدر اتكلم طبيعي معها اخاف اغلط على عمي وهو ابوها مهما كان
جواهر..ماعلينا الحين كم اخوانها
مزون وبتكشيره..اثنين صقر الي كلمتك عنه قبل وخالد ساكن باابها عشان شغله على حد علمي ضابط
جواهر..اها وخالها ساكن معهم
مزون..ماادري انا اعرف ان عندهم خالتهم امل وخالهم سعود ماتزوجوا دائما تحكي لي نجود عنهم مااعتقد انهم ساكنين معهم الا صح امل مطلقه على حد علمي
جواهر..المهم تعالي ندخل للمبنى احسن من هالشمس
مزون..يالله

عالغداء اجتمعوا وكانت عندهم خالتهم امل وسعود رجع مع خالد وهلا واجتمعوا كلهم
وقال لهم صقر قراره
صقر..كلمت ابوي وبلغته بموافقتي
الكل سكت والتفت له سعود..فكرت زين صقر
صقر ويتنهد..شوف سعود الموضوع له ايجابيات وله سلبيات خلينا نبدأ بالايجابيات اولها حل مشكلتي ثاني شئ بنت عمي وبكون ارحم عليها من ابوي وزوجته الشئ الثالث مااعتقد اني بحصل بنت احسن من بنات عمي عبدالله اوكي
سعود..حلو والسلبيات
صقر..الى الان وحده الي هي انا ماكنت مستعد ابدا لزواج بهالوقت ولااشوفها تناسبني لكن ممكن تكون ثنتين اذا بنت عمي كانت مجبوره علي
خالد..لاتتوقع صقر ابوي بيسألها حتى يعني بكلا الحالتين رأئيها مابيقدم او يأخر وكونك تشوفها ماتناسبك انت جبت العيد هذي مو سلبيه هذي فشل قبل البدايه
صقر..المهم اني وافقت والزواج ايجابياته اكثر لي ولها والمصلحه لنا احنا الاثنين بهالزواج
امل..كلامك حلو بس قبل مااقول مبروك بقول شئ واحد لاتحط ببالك انك تزوجتها غصب عنك حتى مايكون هذا مبرر وعذر لاي تقصير منك
ابتسم صقر لها..تعرفين ياامل يعجبني فيك فهمك للامور
هلا..احم والي بتتزوجها ماتقل عن امل بالفهم يعني مبدأها اقنعي او اقنعك
خالد ويضحك..مو بنت عمي عبدالله دائما بكلامه معنا يقول اقنعني وانا اتنازل عن قراري
صقر..اذا هي مثل عمي عبدالله الله يستر
سعود..المهم انا بروح امول بتجين معي
هلا..لا بسلامتك خلها عندنا
ام صقر وبعد صمت طويل ..وانت ياسعود مابتتزوج
تغير وجه سعود وقال..اذا الله كتب بتزوج عن اذنكم
التفت صقر على امه وكأنه يعاتبها بصمت..لكنها ردت عليه
ام صقر..الي راح مايرجع متى بيفهم
الكل سكت لانهم حسوا ان ام صقر معصبه حبت تغير هلا الجو
هلا..يمه ماسمعتك باركتي لصقر
صقر ويبتسم..لا ام صقر عرفت قبلكم وباركت لي وصاحت بعد
هلا..خساره ماشفتها
ام صقر..قومي اشوف شيلي الغداء
هلا..ياسلام والخدامات
ام صقر..وانتي شو شغلتك حركي رجولك
هلا وبحماس..انتي لو تعرفين المسافه من مبنى اربع الى مبى 24 كان قلت ارتاحي ولاتتحركين
خالد..هههههههه ايه جامعتكم حاره مو جامعه
امل..لا وبعد وشوارع كملت
خالد..هههههههههههه مافيه اشارات
هلا..تتمصخرون يالله بروح ارتاح
امل ..بروح معك واخلي ناس بعالمهم
ابتسم صقر وطلعوا البنات وام صقر راحت ترتاح شوي


اتصل صقر باابوه الصباح وقال له انه موافق وهالشئ اسعد ابوه وزوجته الا حددت موعد الملكه حتى تتخلص من هم على قبلها..وبسرعة البرق ازعجت زوجها حتى راح للبنات وبلغهم بالخبر وطلعت وتركهم


بغرفة مزون واختها كان السكون يعم الغرفه حالة الالم الجامد مسيطره..حالة الصراخ المكتوم تملئ الغرفه..حالة الدموع المنهمره تبكي القلوب ..
نجود بدموع..مزون ليه وافقتي حرام تضيعين حياتك تكلمي قولي لا
مزون وهي تحاول تمسح دموعها ..اقول لا وهو يقول ملكتك بعد يومين شوفي الااجراءات مع زوجته تبيني اقول لا وزوجته تقول خلاص مااقدر اتحملكم اكثر ارجوك نجود انا الحين مااملك الا اني ادعي الله يرحمني برحمته
نجود..وحلمك تتنازلين عنه بسهوله
مزون وتمسح دموعها وتوقف قبال اختها..من مات ابوي ضاعت احلامي احترقت بالاهانه المهم الحين خلينا نفكر بالعقل عيشتنا هنا والا عند ام صقر صح مااتمنى ولاواحد بس ام صقر تخاف الله ولابتظلمنا
نجود بدموع ..انتي زوجة صقر وانا طيب
مزون وبحده..انتي نجود بنت عبدالله خليك واثقه ان اسم ابوك يكفي عشان الناس تحطك على راسها لكن عمي غير ناكر وظالم وجاحد
نجود..ماقالت لي هلا شئ
مزون..ياشيخه طنشي احنا بنطلع من سجن لسجن اوسع شوي يعني كله محصل بعضه
نجود..ليه مو متضايقه
مزون ..زمان سمعت كلمه لشيخ نسيت اسمه قال فيه بعض الامور مالها حل الا الصبر يعني مهما عملت مابتغير شئ الا شئ واحد راح تتعب نفسك وهالكلام ينطبق علي مهما عملت مابغير شئ خليني اسكت وارضى احسن واكرم لي
نجود..طيب ماانتي زعلانه من كلام ام بدر عن صقر وانه اخذك لانه محتاج مبلغ من ابوه
مزون وتبتسم..عاادي وانا وافقت واقتنعت الحين لاني محتاجه اطلع من هنا يعني المصلحه له ولي المهم خلينا ننام وبكرا يصير خير
نجود..والجامعه
مزون..مابروح بطنش
نجود..وانا بعد تصبحين على خير
مزون..تلاقي الخير
ماقدرت مزون تنام ليلتها مهما انكرت وادعت موت حلمها ماتقدر حلمها من اول ايام مراهقتها حلمها بالشاب الي ترتبط فيه شكله اخلاقه تعليمه حياتها معه تفاصيل كثيره تحطمت بقرار من عمها الظالم..عمها الي بسهوله غير مسار حياتها من حياة العز الى الضيم والاهانه والحين رماها لمصير مجهول ماتعرف هل الصوره الوحيده الي تحملها لصقر كفيلها باانها ترسم لها مستقبل يعوضها عن حلمها.. صرخه مكبوته قالت لا والف لا..لا اسلوب صقر وتعامله معها بالمحل اعطاها اشاره ان حياتها بتكون معه حلوه بالعكس بتكون جحيم ولازم تبدأ بالاستعداد له بكل قوتها وعلمها ومنطقها وتنحي عاطفتها بفترة زواجها وتعطيها اجازه طويله مالها نهايه كان هذا قرار مزون قبل ماتنام ..


استغربت هلا من غياب بنات عمها وتوقعت انهم زعلانين على الي صار والمشكله انها ماتقدر تتصل تخاف ترد عليها زوجة ابوها ..