السلام عليكم
شلونكم عساكم طيبين
والله هالموضوع يقرقع في داخلي منذ مبطي
قلت خلن احطه لكم يالله نبدأ :
من خلال تجربتي المتواضعه في مقاعد الدراسه والتي تمتد لـ 11 سنه <<< توي صغير
جابهت الكثير من المدرسين ولكن في الغالب هم لا يخرجون عن هذه الانواع السته
النوع الاول
المدرس المخلص لعمله 
هذا المدرس من النوع الجيد لانه يجي من اول الحصه <<<< هذا عيبه الوحيد
ويخرطلك الكلام خرط طول الدرس وهو يتكلم
لا يسأل
ولا يقوم النايمين
واول ما يرن الجرس يمشي
...............................................................
النوع الثاني
المدرس النشبه 
هذا المدرس اللي يضيق الخلق
يجيك ويخليك غصب تسمع الدرس
لا نوم
لا سواليف
حتى هواجيس ما فيه
اول ما تهوجس يعطيك سؤال واذا ما جاوبت يوقفك
أسعد لحظة بحياة الطالب اذا انتهت حصته
يرفع ضغطي هالنوع
...............................................
النوع الثالث
المدرس المهايط 
هذا المدرس من ابغض الانواع
اول ما يدخل يجي وماله نفس
يقعد ينافخ ويهاوش
وكل يوم يطرد له طالب
ويضرب
اذا كانوا الطلاب صغار
لا وما توقف على كذا وبس
يقعد يتزقق على الطلاب بالاسئله ويعطيهم اسئلة
نــــــــــــــــــــــــــــــــــــــــــــار
بس هالنوع من المدرسين يضطر الى اصلاح كفرات سيارته
وقزاز سيارته
خصوصا ايام الاختبارات
وقد يصل الاذى اليه
يستاهل من قاله يهايط
.............................................................................
النوع الرابع
المدرس المطنش
هذا المدرس من افضل الانواع لجميع الطلاب
ما يجي للدرس الا بعد ربع ساعه
ويقعد ربع ساعه يسولف مع الطلاب
ويعلق عليم ويستهبل بهم تحس انه خويهم
واذا بقى ربع ساعه شرح خمس دقايق
واذا كان ما له خلق يقول للطلاب افتحوا الكتاب
ويالله حط خط على كذا وكذا وكذا
وآخر عشر دقايق يكلم بالجوال
هذا المدرس والا بلاش
......................................................
النوع الخامس
المدرس الاجنبي
هذا المدرس اللي ينرحم صدق
ينكرف كررررررررف وبآخر شي راتبه نص راتب السعودي
غير الاستهبال اللي يجيه من الطلاب
هذا اذا شاف احد نايم اذا كان قدام يقومه
واذا كان من اللي وراء يخليه
ولسان حاله يقول : ابعد عن الشر يا عمري وغنيله
وما يتابع الشرح معه الا ثنين بالكثير
والباقين يا ينامون
او يسولفون
او يستهبلون
هذا النوع لا ينطبق على الاجنبي لوحده
بل ينطبق على بعض السعوديين ;)
.........................................................................
خلاصة الموضوع :انك اذا كنت او صرت مدرس خلك من النوع المطنش
اريحلك واريح للطلاب وفي النهايه النتيجة واحده
الطلاب بينسون كل شي بعد الاختبارات
آسف عالاطاله
اخوكم ابراهيم 