الموضوع: )(نظره مفاجئه *_*)(
مشاهدة مشاركة بصفحة مستقلة
  #1  
قديم 03/07/2006, 08:01 AM
إنسان واقعي إنسان واقعي غير متواجد حالياً
زعيــم متواصــل
تاريخ التسجيل: 04/02/2006
مشاركات: 84
Talking
يووووه ياكحيلة ذكرتينا بما مضى الله يذكر أيام أول بخير

أما أنا فصارلي موقف ياهو موقف نحس من جد كلما أتذكره أقول أهل العقول براحه

موقف يدل دلاله واضحة على عمق الدلاخة وجذورها المتأصله فيني , ماودي أبرد السالفه راح أدخل دغري أقولها لكم بكل بساطه كنت نايم في وقت متأخر من الظهر وماقمت إلا تقريبا الساعه 6 ونص على عز المغرب موقت بالضبط للقهوة والسبه بطني يقرقعني مشتهي تمر هالحزه عالعموم قمت غسلت لكن يعلم الله أنا مايفيد فيني إلا السباحه حتى أصحصح ولا نص ساعه من القومه حتى أستجمع كامل قواي العقلية والجسميه ,
عالعموم كنت مستعجل مدري وش فيني هالمره مطفوق على القهوة وجمعة الأهل فنزلت تحت في الصاله وجلست وقبالي أهلي واللي يقولي منهم هش هش مدري شايفيني خاروف ولاماعز يهشوني ,
وأنا محذا أقول الحمد لله والشكر على نعمة العقل أضحك عليهم لا ومن البجاحة قلت لهم أشوفكم مسوين لوبي نساء وين أخواني والله إني على نياتي بلاي مادريت إلا أشوف أشكال غريبه جالسين أول مره أشوفهم عليهم سواد وأنا أقول في نفسي ياولد منهم هذولا ؟
والمشكله محذا أحاول أقز أعرف منهم ماعرفت الولد مستنكر اللي هو أنا طبعا ,
وأجيك أفرك عيوني فرك جاب أبوها مادريت أول ماوخرت يدي إلا وشوف إلا والله هذي خالتي وبجنبها بناتها الثلاثه , ياويلي وش ذي البلوى والله اني متمني مانزلت يدي من تفريكت عيوني من الموقف المحرج , عاد من زين الشكل شكل الوجه نايم وشعر منفوش وثوب نوم مانكوى

عاد هنا الموقف الأسطوري ومن لخمة الموقف تحسبوني شقيت بخفي حنين لا والله حتى تدرون بس إلى أي مدى وصلت دلاختي في ذلك الوقت فقط رحت أسلم على خالتي وأحب راسها بكل براءه ثمين طلعت :p ياعيني على الإحترام بس أذكر وقتها أن عيوني مدقره على بنات الخاله على قولة المثل شين وقوي عين

بس ياهو موقف لن أنساه , حتى الله يذكرها بالخير خالتي تقول مملوح لما طلعت أي مملوح معه ياكبرها والله من مجامله