| شي مشرف ان هالمنتخب العريق يطلب مواجهتنا وديا. وهالشي ان دل على شي فيدل على بحثهم عن المنتخب اللي يوازي مستواهم. ومن الطبيعي ان السويد راح تطلب منتخب قوي ومتمرس عشان يختبرون سلبيات وايجابيات لاعبيهم وقدرتهم على المنافسة في كأس العالم. وراح يكون حسابتهم في اختيار المنتخب اللي يقابلونه دقيقة جدا. لأن هاللقاء يعتبر بمثابة الإختبار لهم. فإذا اختاروا المنتخب الغير مناسب لهم راح تكون النتايج ايضا غير مناسبة ولا يستفيدون منها. وما جاء هالإختيار منهم إلا لأنهم يرون في المنتخب السعودي هالقوة والمستوى اللي يبغونه. وهذا طبعا راح يرفع سمعة المنتخب السعودي ويجعل بعض الفرق القوية تطمع في ملاقاته وديا اسوة بالسويد. وعلى حسب ماسمعت ان منتخب التشيك طلب مقابلة المنتخب السعودي أيضا.
لذلك اتمنى من ادارة المنتخب انها تنظر إلى هذا العرض وتدرجه ضمن لقاءاتها الودية اذا كان برنامجهم يسمح بذلك. لأن هاللقاء راح يخدم المنتخب بشكل جيد. وخصوصا ان السويد راح تستضيف المنتخب بين جماهيرها. فإذا كانت هالتجربة بين الجماهير السويدية فإن هذا سيخدم المنتخب لاحقا في مواجهة المنتخبات ذات الشعبية الكبيرة في المونديال القادم. وبرضه راح نفتك من استضافة الفرق على ملاعبنا ونضمن ان الفرق تلعب بلاعبينها الأساسيين.
عموما....
بالنسبة للقاءات الودية. اتمنى ان المنتخب يبعد عن حاجتين مهمتين:
-أولا: انه يتجنب اللعب مع الفرق العربية لأنه- مثل ما انتم شايفينهم- يتلقطون علينا اي شي يعيبنا. فثمانية المانيا لا زالت تردد على لسان كل عربي يقابل السعوديين. متناسين بذلك التأهل اربع مرات لكأس العالم وتعادلنا مع انجلترا على ارضها وبين جمهورها وفوزنا على منتخب بلجيكا وهو في كامل قوته وتسجيل اجمل اهداف ذاك المونديال من كابتنا سعيد العويران. وغير ذلك من الأنجازات. وطبعا متناسين مستويات منتخباتهم اللي ماترتقي لمستوى منتخبنا. ولعلكم تتذكرون يوم تأهلنا لألمانيا اللي نشر عندنا في الصحافة. عن تعرض طلاب سعوديين للضرب من اردنين بسبب انهم احتفلوا بتأهل منتخبهم====>عشان بس تشوفون وشلون حقدهم علينا.
ففوز احد المنتخبات العربية-لا سمح الله- علينا راح يسلط اضواء الإعلام العربي ضد منتخبنا. ويشكك في مقدرته على خوض النهائيات. ويعيد اسطوانة الثمانية الله لا يعيدها. وبكذا لن يكون الأثر النفسي على اللاعبين فقط!! بل سيكون اثر ذلك على الشارع السعودي كله!!!
-ثانيا: انه يبعد عن مواجهات الفرق المنافسة لنا (مثل كوريا , ايران اليابان وغيرهم) لسببين: أولهما ان هالفرق لن تضيف اي شي للمنتخب بصفة ان حنا تعودنا على طريقة لعبهم وعلى المستوى اللي نلعب معهم فيه. وراح تكون ودياتنا معهم كأنها تكمله للتصفيات. وبكذا ماراح نستفيد شي من الوديات!!! ولو انهزمنا مع احدهم راح يكون لهذا اثر سلبي كبير علينا. ويفسر من الإعلام الرياضي بإنه انحدار لمستوى المنتخب السعودي اللي طلع بدون اي هزيمة من التصفيات ثم انهزم من احد الفرق المنافسة.
وختاما....
اتمنى ان منتخبنا يظهر بالصورة اللائقة والمشرفة في لقاءاته المقبلة. وان يستفيد منها لكي يكون مستعدا استعدادا تاما لمونديال ألمانيا.  | 