ياجماعة صعبة ان المنتخب يبدأ مباراياته الودية مع فرق قوية مثل الإرجنتين والبرازيل!! الوضع يختلف بالنسبة لنا مقارنة بقطر والكويت. قطر والكويت يبغون هالمبارايات كشكل إعلامي واستثماري فقط. يعني عشان يدري الكل ان منتخب البرازيل جاء للكويت وعشان يجون الكويتيين ويشوفون نجوم السامبا على الطبيعة وياخذون تواقيعهم ويصورون جنبهم وبس!! لا أقل ولا أكثر!! أما المباراة اللي يبي يسوونها فهي عشان الجذب الجماهيري و لا يقصد بها التحضير لبطولة أو إعداد فريق.

وقطر يوم شافوا الكويت سووا هالشي. قلدوهم وجابو منتخب الإرجنتين وسووا نفس الترتيبات. و صارت الدعوى تحدي بينهم والكسبانين هم البرازيل والأرجنتين. لأنه راح تكون إستضافة هالمنتخبين اللي يملكون شعبية واسعة على مستوى العالم بقصد الإستثمار الإعلامي مكلفة جدا. وذولي اهم ماعليهم انهم يكشخون ويرزون انفسهم قدام الناس بإنهم استضافوا ابطال العالم وجابوهم لديرتهم.

لكن بالنسبة للمنتخب السعودي فهو راح يستضيفهم للأستعداد والتحضير. ماهو عشان الترزز والتميلح!!
لذلك أعتقد ان حنا لازم نبدأ على شوي شوي. وبالنسبة لمستوى غانا فهو مؤهل جدا انه يقابل منتخبنا وديا. لأن كلا المنتخبين يتزعمون مستوى قاراتهم اسيا و افريقيا. خصوصا ان القارتين مستوياتهم هي الأقرب لبعض بالمقارنة بباقي القارات. وترى حنا ما راح نقابل منتخبات اوروبا في كأس العالم وبس. راح تقابل ربما كل القارات وكل المدارس الكروية. فالتنويع في إختيار المدارس الكروية مع مراعاة البدء في الأسهل ثم التدرج للأصعب فالأصعب راح يعطي نتايج حلوة وجيدة. وراح يعطي المنتخب جرأة أكثر عند منازلة المنتخبات القوية لأنه في لحظتها راح يتكون عند اللاعبين خلفية عن جميع المنتخبات وراح يستفيد من خبرات جميع المدارس الكروية. وانا ماني ضد فكرة مقابلة منتخبات اوروبا! بس اني اقول اذا بغينا نقابل هالمنتخبات لازم نكون مستعدين لها.

اما انك من الباب للطاقة تجي للاعبين المنتخب وتقول لهم يالله هذا منتخب البرازيل تبي تقابلونه و انتم مطالبين بالفوز عليه! فأتوقع انك كذا تطلب منهم المستحيل!!