ياناس مهما صار. الإتحاد نادي سعودي منا وفينا لازم نوقف معه لأن البطولة راح تحسب سعودية.

-اللي يقولون ان الإتحاديين وقفوا ضدنا و هم تنكروا لنا أقول له ماهيب مشكلة. إذا خلصت بطولة آسيا و جاء الدوري لا تخلي شي في قلبك إلا وقله (المشفر والعادي) وحط حرتك كلها ولاتخلي أي إتحادي إلا وأنت واقف له شوكة في حلقة. بس إذا صارت المسألة فيها اسمك كسعودي تنتهي كل العدواة في سبيل إنه يرفع اسم بلدك. واذكرك إن هاللي شجعتهم (فريق العين) يبي يجونك بكره ولا هم مفرقين بين إتحادي وهلالي ونصراوي وأهلاوي ويبي يقولون هزأنكم يالسعوديين في ملعبكم وخذنا الكأس منكم وعلى أرضكم غصب على خشومكم . لأن هزيمتهم لنا تعتبر إنجاز لفريق ماحصل خارجيا إلا بطولة وحدة وبالطقاق بعد. وفوزهم على الكرة السعودية (بطلة آسيا والخليج) راح تعطيهم فرصه إنهم يعوضون نقصهم على أكتافك وأمجادك. وما أدراك؟ يمكن أول من يبي يتشمتون فيه حنا يالهلالين. يبي يقولون وين الزعامة اللي أنتم تقولونها؟ وفريقكم حق بطولات مال أول. وإنكانك ما صدقت هالكلام. رح وأفتح قنواتهم وشف حشهم فينا بنفسك. مير جماهيرهم عينك عينك (العين زعيم نصف الأرض)!!


-وبالنسبة للي يقولون إن الإتحاد تشادي أقول له إن الكأس الأسيوي بيقعد في السعودية ماهوب رايح للتشاد. يعني بنو تشاد يكرفون ويتعبون وانت يالسعودي قاعد وماعليك إلا تجيك البطولة وتحسب بإسم بلدك بعد وش تبي أحسن من كذا ياخي؟ ياخي ناظر قطر. نصف منتخبهم تشليح ماخذ من كل بلد لاعب وهذولي هم يشجعونه. لدرجة إن كوفي عنان يشجع معهم يقول هذا منتخب الأمم المتحدة. كل دول العالم لها فيه لاعب!! خل قطر وناظر فرنسا:الدفاع من افريقيا والوسط من الدول المغربية والهجوم مافيه الظاهر إلا فرنسي واحد!!


-واللي يقولون بلا وطنية وبلا خراط فاضي أقول له رح ناظر كل دوريات الكورة في العالم. يجي فيها هواش وتعصب وعداوة بس انهم قلب واحد إذا تعلقت المسألة ببلدهم. ولا تروح بعيد!! شف الدوري الإماراتي وناظر برنامج الجماهير في دبي الرياضية. وراح تشوف انواع التخلف في التشجيع والتعصب!! لدرجة إني الإسبوع اللي فات شايف جمهور يحذف فريقه و رئيس ناديه بالقوارير!! لو صار هالشي عندنا من أي فريق منافس لنا أسألك بالله ماراح تعتبره تخلف؟ ومع ذلك كلهم قلب واحد مع فريق العين.

-غير هذا كله. راح تنقل المباراة أكثر من 13 قناة وإذا شافوا السعوديين يشجعون العين في المدرجات راح نكون مضحكة عند العالم كلها. هذا للي يدري انك سعودي!! لكن اللي مايدري راح يقول بكل بساطة: اثبت نادي العين انه يملك قاعدة جماهيرية كبيرة حيث امتلأت المدرجات بجماهيره وبالمقابل لم يتواجد في استاد القطارة سوى اقل من 200 مشجع للأتحاد مما يدل على ان شعبية الكرة الإماراتية تفوقت على نظيرتها السعودية بمراحل عديدة. وفي كل الحالتين اللي قلتهن راح تكون كارثة!!!