إقتباس الرسالة الأصلية كتبت بواسطة ابوساري بلجيك ياصديقي مشكلة بعض الجماهير عندنا عاطفيين و قلبهم حنيّن .. و أنا شخصياً كنت مصاب بهذا الداء وهو إني أقول لا عطه فرصته مع إن اللاعب واضح ماعنده أي شيء يقدمه من أول مباراة .. خبرة سنين خلتني أعرف اللاعب من أول مباراة أو مباراتين .. إذا ماينفع خلاص قل ماينفع و أكلنا مقلب مايتناسب مع الدوري ورتمه .. بعض اللاعبين ماينفع إلا لمهام معينة و مع فرق محددة ينجح نجاح محدود ثم نجيبه حنا ونشرب المقلب مرة بعد مرة .. ويلهامسون على كثر ماقالوا الناس إننا صبرنا عليه إلا إني وكثير من الهلاليين شافوا منه لمسات بأول مباراة له .. يعني ماكان مفلس من ناحية الكنترول و التمرير و السرعة والمهارة .. كان فقط يحتاج اندماج مع المجموعة لأن لعبه كان فردي والشباب مافهموا له و هو مافهم لهم .. مع هذا كل ماجبنا مقلب .. قالوا اصبر شف ويلهامسون .. وأي شخص عنده اليوتيوب يروح يشوف أول مباراة لويلي و يشوف إنه كان لاعب داهية من أول المباريات .. لكن لاعب الباب قدامه فاضي ويضيع ! .. وش دخلها بالاندماج ؟ لاعب مايعرف يثبت كورة و تحركه بطيء وش علاقتها بإنه ماتأقلم؟ .. التأقلم يصير على الأشياء التكتيكية مهب الأشياء الجسدية و المهارية ! .. بعضكم يقول الجو حر و مايساعده .. ترا منتخباتهم تجي عندك توكلك عدد كبير من الأهداف وترجع و على أرضك .. ومثال قريب جدا .. بوناتيني .. كثير طالبوا إنه يجلس .. مع إنه مقلب يمغص البطن و كلاعب مايملك أي حلول .. غير إنه يضيع بالمباراة مليون هجمة و ماقدامه الا الحارس .. وراح لولفرهامبتون و لعب تقريبا 48 مباراة و سجل 12 هدف فقط ! .. ومازالت بعض الجماهير تقول إنه نجح ! إدواردو كم احتاج علشان يقنعنا؟ رادوي كم احتاج علشان يقنعنا؟ شف أي لاعب نجح مع الهلال كم احتاج علشان يقنعنا؟ بالمقابل كم لاعب صبرنا عليه و ضيعنا و رفع ضغطنا وجاب لنا السكر وبالأخير مشى؟ الوحيد اللي ندمت إنه مشى هو سيروتي .. لأنه بكل أمانة لاعب أظهر مهارات و جدية باللعب من أول مباراة .. و سجل و صنع .. ولو تواجد مهاجم غير ريفاس و خربين كان أصبح أفضل صانع لعب بالدوري من 4 مباريات فقط .. بالأخير .. خذها مني .. بوتيا لاعب ماراح يكون إضافة .. كاريلو ممكن يقدم مستوى .. لكن ماراح يكون أفضل من سالم و العابد .. الحبسي .. على أسطورية مسيرته و مستواه الجيد حالياً .. إلا إن فيه أفضل منه و كثير بعد .. فيه حرّاس ممكن يكونون سبب في كسب بطولات للهلال بعد الله .. ريفاس لاعب مفلس ولا راح يتعدل لو يسجل لك سوبر هاتريك المباراة الجاية بيجي عشر مباريات بعدها بيصير نقص .. خربين لاعب ممتاز و صغير لكن كآسيوي عندنا عمر عبدالرحمن وهو أفضل بمليون مرة من خربين من ناحية التأثير .. قوميز .. لاعب حده سنة وحدة هذا إن قدم شيء هالسنة لأن واضح اللاعب في نهاية مسيرته .. عندك فقط عموري و إدواردو .. الباقين زيادة عدد .. وراح يعاني الهلال من شح المهاجمين .. وراح يعاني الهلال من ضعف الحاسة التهديفية لأبرز لاعبيه اللي من ضمنهم سالم الدوسري .. لأن سالم لاعب يصنع الكورة أكثر من تسجيله .. لازم يتدارك الهلال الوضع ويضبط وضعه بالشتوية .. ويترك العواطف على جنب .. لو يجيب لاعبين من الدوري عندنا .. و يتعاقد مع هارون كمارا لأنه هو مستقبل الهجوم السعودي وراح يكتسب خبرة من لعبه الدولي مع المنتخب .. فلازم ياخذه الهلال قبل يرتفع سعره

اتفق معاك الاعب يبان من اول لمسة على قولتهم ( العود من اول ركزه )

واتفق معاك اننا ضحينا بسيروتي لكن كاريلو للان مستواه مطمئن لحد الان

الاعب اللي جد تمنيت يجي لاعب مثله للهلال لاعب الفقر نور الدين اول مره احسدهم على لاعب تقول مكينه ما يهجد مرمط ام الاندية اللي لعب امامهم

ع العموم لا بوتيا ولا ريفاس ينفعون الهلال بالعكس اشوفهم عبئ ع الهلال واي لاعب محلي راح يكون اضافه افضل منهم

يعطيك العافية