*



مورينهو خرّب الديربي ، مورينهو قاتل المتعة ، سمعناها كثير بعد نهاية المباريات الكبيرة بالتحديد .. والمشكلة يجهلون كمية التكتيك العالي اللي موجود طوال ال 90 دقيقة .. مورينهو مو مستعد يفتح ملعبه ويمتعك على حساب فريقه ؟ بالاخير انت مَ تلعب بالدوري البرازيلي عشان تبحث عن متعة وكمية اهداف هنا وهناك .. مَ اختلف معكم ان تشلسي يملك كمية عناصر هجومية ممكن يضرب فيها اي قوة دفاعية تقابله .. لكن بالمقابل دفاعك مفكك وراح يستقبل اهداف اكثر من انه يسجل! شفنا ها الشي قدام نيوكاسل ، فتحنا الملعب على مصراعيه وبالاخير لقمنا! ونيوكاسل بوقتها كان عشوائي قما بالك لما تقابل فريق منظم ومتصدر وعلى ارضه ويملك منظومة قوية بخط الوسط! طبيعي مَ راح تفكر تفتح ملعبك وطبيعي جداً انك مَ تروح وانت تبغى تتعادل او تخسر ، خصوصاً انك تلعب مباراة مفصلية و3 نقاط توديك للصدارة مع الليفر .. تقفيل مورينهو منطقي وتوقعت ها الشي ، انت نعاتي على مستوى المحور الدفاعي ، دفاعك اخر 3 مباريات او 4 ماهو بحالته الطبيعية ، اكلت في ظرف مبارتين 6 اهداف وحدة منها خسرتها .. ولا عندك المهاجمين اللي يبردون قلبك عشان تقول اي والله ابروح للامارات واهاجم! فوق كذا احسب حساب خسارتك انك بترجع من الثاني للخامس! أقل الايمان كان تعادل اذا مَ جا الفوز من مرتدة او خطأ دفاعي او كرات ثابتة .. ولو ترجع وتشوف الشوط الاول بالذات تتفاجئ انك انهيته ب 7 فرص عالمرمى وحدة منها بالعارضة مقابل 0 للارسنال! ويجونك ناس صاحيين بعد المباراة ويكتبون مورينهو قمطة! وهو مَ شاف لا احصائيات ولا مجريات المباراة حتى! ليه يتعب نفسه دامه حاط بذهنه مورينهو مكروه! تشلسي دخل المباراة بحذر ولعب على جزئيات بسيطة لو وُجد المهاجم الحاسم لها لكان حال تشلسي افضل بكثير ، مو شرط بهذه المباراة لكن في مباريات كثيرة! مباراة الامس تظهر لك تشلسي مَ عنده مشاكل حتى لو دخل مقفل 90 دقيقة .. بس مشكلتك دائماً وابداً في مهاجمك اللي ينهي لك انصاف الفرص ويستغل ربع فرصة تكون كفيلة بخروجك بثلاث نقاط ، بعناصر الارسنال على مستوى الوسط والسلاسة الموجودة عندهم والتحركات المزعجة الا ان تشلسي حدّ من هذا كله ولا شفنا للارسنال حسّ طوال المباراة سوا في لقطتين ظهر فيها جيرود .. مَ عدى ذلك تشلسي كانت فرصه اوفر واخطر ، ونرجع ونقول وهذا تشلسي كان مقفل! مَ فيه مدرب بالعالم مَ يطمح للفوز خصوصاً بهذا الموقف اللي بيهدي لك صدارة الدوري ، بس مزاجية مهاجم ممكن تنسف كل امالك بمجرد التفكير بثلاث نقاط .. مورينهو نزل بافضل تشكيلة ممكنة ، توفرت الفرص ، حاول يعزز فالشوط الثاني حتى فقد الامل فرجع وقفل المباراة تماماً حتى لا يخسر النقطة اللي بمتناول اليد .. مورينهو بهكذا مباريات يشبعك تكتيكياً ولا عندي مشكلة تبيع مباريات كثيرة على حساب المتعة طالما انك ماشي صح بسلم الدوري (حتى) توفر النواقص .. واللي مَ تجهل على البعض ولنا بالتحديد مشجعين تشلسي!

مبروك النقطة ، والعوض ان شاء الله قدام ليفربول في الجسر