نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - الزيارة الخاطفية لمدينة الأحلام الباريسية

@@almoreb@@ · #51 05/12/2013, 04:27 PM

عدنا اليكم من جديد في الجزء الرابع والأخير

كانت آخر محطاتي في الجزء الثالث هضبة مونتمارتر وكانت الساعة 6.30 حينها ... وقد تبقى لموعد طائرتي اقل من 3 ساعات ويجب علي أن أزور ميدان لادفنسى وأردت أن أرى برج ايفل ليلا وأتصور معاه ..

نزلت من الهضبة وتوجهت لأقرب محطة مترو .. والله ياني حللت أم التذكرة اليومية

... المهم توجهت لمحطة ميدان لادفنسى .. صراحة ه الميدان عجبني هدوووءه ومبانيه الجميلة .. شكله ذكرني بمدينة فرانكفورت الألمانية .. طبعا ه الميدان أنصحكم تروحوه ليلا لان الجو جدا رومانسي ليلا وشاعري .. ولو انت عازب زي حالتي يومها فما راح تحس بالمشاعر الخونفشاريه حقت المتزوجين << سمعتي يا سعودية كول

طبعا الميدان هذا فيه مراكز تسوق وشركات عالمية وهكذا .. يعني الحريم حيعجبهم الوضع هناك

كانت الساعة حينها 7 تقريبا وللأسف ما صليت المغرب والعشاء وما لقيت مسجد قريب .. ففرشت سجادتي البلاستيكيه في نصف الميدان وصليت

... طبعا شكلي كان شبهة جدا وكل شوي أشوف فلاش كاميرا .. حسيت اني معلم من معالم باريس

.. المهم اني ارتحت نفسيا ولله الحمد وطز بالباقي دام الواحد ما يخالف الأنظمة

استمتعوا بالصور يا جدعان

بعد ما خلصت من الفرفرة والتصوير كان الوقت يلاحقني وصارت الساعه 7:30 فأخذت حالي وودعت مكان من أحلى 3 أماكن في باريس وانطلقت للمترو لأتمكن من التقاط كم صورة لبرج ايفل قبل أن ألحق طائرتي اللي كنت حاس انها حتقلع بدوني

الحمد لله برج ايفل ما يبعد كثير عن ميدان لادفنسى ووصلت هناك تقريبا الساعه 7:50 وأخذت لي كم صورة للبرج .. وفي الحقيقة شكله جدا حلو في الليل وخاصة لما يشغلوا الاشياء اللي تلمع ذيك ويصير البرج يلمع كأنه مرسيدس توها طالعة من الوكالة

... ودي أعرف وين صابون فيري ما يعملوه اعلان لمنتجهم

اترككم مع الصور

هذا البرج بدون لمعة

وهنا البرج بلمعة

.. طبعا لأن فرنسا فقيرة فما يشغلوا اللمعة الا كم دقيقة كل فترة !! ودي أكلم ميركل تتبرع لهم بكم ماطور كهرباء

طبعا حز في خاطري والله الجو الرومانسي الغير طبيعي حول البرج .. وتمنيت تكون المدام معاي

.. ترى من حولك باعة الورود الحمراء ومن النادر ان ترى شخص يمشي بمفرده الا أنا

.. وترى كل اثنين اخذين زاوية و

... وانا أردد يا نفس اصبري وكل شئ بأجره

...

كنت وقتها غارق في أحلامي ورومانسياتي وقاعد أكتب شعر على برج ايفل ولم يوقظني من هذا كله الا المنبه لرحلتي

كانت الساعة وقتها 8:15 وبقي على طيارتي ساعة ونصف فقط ... فذهبت جري وكأني عداء 100 متر الى محطة المترو وطبعا يستغرق المشوار بين برج ايفل والمطار حوالي نصف ساعة ..

الحمد لله وصلت للمطار قبل طيارتي بساعة ولقيت الكاونتر مفتوح لسه وخذت البوردنج وقلت لها لو سمحتي جمب الشباك .. أبي أشوف باريس من فوق

ولبت طلبي ذيك الفرنسية بنت الاجاويد

قعدت أتمشى في المطار وقتها وللعلم باريس فيها مطارين كبيرين ومشهورين وفي مطارات اخرى لكن صغيرة .. مطار اسمه شارل دي غول وهذا بعيد عن المدينة شوي .. ومطار اورلي وهذا أقرب للمدينة وهذا مطاري

تمشيت في مطار أورلي وللأمانة المطار يعكس صورة مشرفة لفرنسا عكس ما هو موجود في داخل باريس .. نعنبوا ابليسهم أول ما دخلته قلت فرنسا أطلق بلد في الكون .. ولما رجعت له في رحلة العودة قلت المظاهر خداعة والله

هذي زاوية لمحبي القراءة

بالصدفة حصلت زاوية لمحبي البلايستيشن وتقدر تختار أي لعبة وتلعب بدل ما تنتظر وانت طفشان .. لعبت فيفا 13 وأخذت بايرن ميونخ ضد باريس سان جرمان وقررت أهزمهم في أرضهم وعلى مطارهم

... كانت النتيجة حينهاا 2-1 لي وللأسف ما كملت المباراة لأان النداء الأخير لرحلتي كان يرن في أذني وبقي 10 دقايق وتقلع الطيارة هههههههههههههه

.. باذن الله برجع بيوم من الايام وأكملها

رحت للبوابة وكانت بجانب زاوية البلايستيشن والموظف طالع فيني بنص عين ومعصب .. كان وده يقول بالله قاعدين منتظرينك وانت قاعد تلعب بلايستيشن

شطحات و فوائد :

1- السفر شئ جميل جدا ويتعلم الانسان منه الشئ الكثير ويستفيد من الثقافات الأخرى .. لذلك أنصحكم نصيحة مجرب وهي انكم تختلطوا بالشعب قدر المستطاع وتنزلوا للشارع وتمشو برجولكم ... يعني اعرف ناس كثير يقضو مشاوريهم كلها بتكاسي وما ينزلوا الا ع باب المتحف أو أمام المعلم المراد زيارته وهذا ممكن للشخص اللي ما يعرف شئ أبدا أو اللي معاه عائلة كبيرة وأطفال ... لكن لو كنتو عزاب أو متزوجين حديثا أو حتى لديكم طفل واحد فأنصحكم تحتكوا في الشعب أكثر وتعيشوا كما يعيش ذلك الشعب .. ستجدوا فائدة وتجربة كبيرة من ذلك ..

2- باريس زباله زباله زباله

... مافيها شئ حلو الا 3 أماكن ( برج ايفل بالرغم من كمية الشحاتين اللي حوله وعدم الترتيب - هضبة مونتمارتر واحذروا الحراميه - ساحة لادفنسى ) ويمكن كمان حديقة ديزني لاند لكني ما رحتها .... غير كذا لا تقولوا مدينة أحلام ومدري شو .. ياخي في حياتي ما شفت كمية شحاتين مثل اللي شفتها في باريس .. نعنبوا ابليسهم مصر احسن منهم

... غير كذا البنية التحتية للأسف سيئة وخاصة في محطات المترو وفي شوارعها .. يعني حتى شارع الشانزيليزيه تلاقي الصرف الصحي خربان فيه

...

3- باريس حدها يومين فقط ويوم لحديقة ديزني لاند طبعا هذا للشخص القادم من دولة عربية .. لكن لو كنت متعود على أوروبا فحدك يوم واحد لباريس ويوم لديزني لاند ويخب عليها قسم

4- أنصحكم اذا كان عندكم وقت كافي وبعد الانتهاء من زيارة معالم باريس .. اذهبوا للمناطق الريفيه حولها .. عادة المناطق الريفيه في اوروبا أجمل بكثير من المدن ...

5- احذروا من الحراميه هناك .. ولا تضعوا محافظكم وجوازاتكم في جيوبكم .. خلوها في شنطة الخصر أو في شنطة المدام وقول للمدام تحكم قبضتها

... بجد السرقة هناك عيني عينك !!

6- لو في واحد منكم يبي يروح باريس مع المدام .. ياخذ له قارب لوحدهم ويلف معاها في الأنهار المنتشره هناك .. قسم شئ رومانسي جدا

<< ابو عبدالرحمن هذي لك

تعوضها عن مخاطر جنوب افريقيا

صعدت الطائرة وكاانت فاضية ولله الحمد وعدت ادراجي لمدينتي الجميلة برلين

بعد يوم شاق ومتعب جدا جدا جدا .. لكنه رائع ومفيد ولله الحمد والفضل والمنه

اتمنى انكم استمتعوا معي في هذه الرحلة الخاطفة ونلقاكم باذن الله في زيارات قادمة غير خاطفة لانها حتكون مع المدام باذن الله .. لانه صعب تكرف عروسة في أول شهور

... لكن بعد كم سنة لنا كلام آخر

وشكرا لكم أحبائي ..