ترى النصر فاز بدووون أجانب.. وعارفين كيف تركوا معسكر النادي قبل المباراة بيوم واحد... يعني كان المفروض أن النصر يدخل المباراة وهو مرتبك ومتخوف.. لكن صار العكس.

يعني بالمختصر لاعب أو لاعبين لايمكن يشيلو فريق كامل لأن كرة القدم منظومة من 11 لاعب لابد أن يؤدوا برتم وحماس عالي.

نجي للهجوم على الإدارة أو اللعيبة أو حتى سامي من قبل بعض جماهير الزعيم المعصبين أكثر من اللازم ويطالبون بتغيير المحترفين والإدارة والمدرب وإبعاد لاعب وإحضار آخر >> ترى لنا ثلاث سنوات على هالمنوال نطالب بتغيير المدرب والمحترفين ولا استفدنا أي شي..
الفتح السنة الماضية اخذ الدوري بلاعبين أقل شهرة من محترفي الهلال الأجانب ومدربهم صبروا عليه حوالي 6 مواسم (6 سنوات ياشباب موب بعشر مباريات) بدون أي نتائج تذكر ولكنهم كانو يلعبون بنفسيات عالية لأن ماعليهم أي ضغوط ولاهجوم من جماهيرهم وحققوا الدوري بكل جدارة واستحقاق..
يعني الإستقرار شي مهم بشرط الدعم النفسي من الجماهير وعدم التجرييح بلاعب بعينه

---------

قبل فترة كان جماهير الهلال يطالبون بتنسيق المرشدي ولا يمر يوم إلا وتلقى موضوع نازل عن المرشدي والزوري وضرورة إبعادهم وووو...
رضخ سامي لمطالباتكم وغير الزوري والمرشدي وحط المسلم لي كنتوا تطالبون به،، وش سوا المسلم !!!
الحين رجعتوا تطالبون بعودة المرشدي..
الحين قلبتوا الموجة على السديري ولازم يتغير السديري ويجي واحد مدرعم يطالب بتنسيقه وبيع عقده وووو
بعد فترة بترجعون تطالبون بعودة السديري

مادري وش يبي الجمهور بالضبط؟؟!!!

صحيح هناك أخطاء دفاعية قاتلة في المبارة ولكن لماذا التركير على الدفاع... شفتوا كيف المدافع يضطر انه يرجع الكورة للحارس كذا مرة في مباراة النصر الأخيرة.. وش السبب برايكم؟؟ لأن الوسط والأطراف ماقامو بدورهم في صنع المساحات وطلب الكورة.. حتى لو شات المدافع الكورة قدام مايلقى الضغط الكافي من لعيبة الوسط لاستلام الكورة وتوزيعها بالشكل السليم

الفريق كان سيئ بالكامل والسبب نفسي والله العالم ... ماشفنا الحماس والرغبة العارمة بالفوز اللعيبة كانوا يؤدون أدوارهم فقط بدون أي حماس

هناك أخطاء وهذه لابد منها وكم شفنا لعيبة عالميين أخطأوا أخطاء كلفت فرقهم بطولات موب ثلاث نقاط فقط ولاشفنا هالهجوم الشرس من جماهيرهم.

بالله ياشباب النقد يكون بناء. طالبوا مثل ماتبون بس بدون تجريح واللي يرحم والديكم.

سامي والهلال بشكل عام يحتاج وقفتكم ودعمكم في الفترة الحالية.. يكفيه مواجهة الهجوم القذر من الإعلام المضاد والقنوات الصفراء والإعلاميين المقهورين من الهلال واسطورتهم سامي. ترى هذا يؤثر على المدرب وعطاء اللاعبين فما بالكم لو شاركهم جماهير الهلال في اللي قاعد يصير

صدقوني إذا بقيتوا كذا راح تشوفو الهلال في انحدار وتلقونه يقاتل على المركز الخامس والسادس في الدوري ونصير نكتة للنصراويين لسنين طويلة...

النصر صبر سنييييين ولاخذلوه جماهيره والحين بدأ النصر يتعافى ويرجع لقوته.

والهلال قاعد يحقق إنجازات وبطولات ولاتمر سنة إلا وهو محقق بطولة على أقل تقدير وفوق هذا مافيه شي يرضينا!!

سامي مشروع مدرب ناجح بإذن الله وراح يثبت لكم ذلك بس المطلوب من الجماهير الهلالية أنها تقف بجانبه وجانب فريقها في الأحزان قبل الأفراح.

الله يوفق هلالنا في المباريات القادمة