08/11/2013, 11:17 AM
|
 | مشرف منتدى الرياضة العربية والعالمية
رئيس رابطة تشيلسي | | تاريخ التسجيل: 23/02/2009
مشاركات: 2,075
| |
-
ميلان يحتضر!
مافيه جملة تقدر توصف فيها وضع ميلان الحالي اكثر من ها الجملة .. للأمانة حال الميلان العريق لا يسر لا مُحب ولا عدو لهذا الكيان الكبير اللي جالس يُعاث فيه على حساب شعار النادي وكالعادة الضحية "الجمهور"
بفصَل الحال بعدة نقاط ومن وجهة نظر شخصية ، ربما اكون صائب ومن المحتمل الخطأ ، برأيي الأزمة مش ازمة من بداية الموسم او توالي خسارة النقاط والخسارة تلو الخسارة! المشكلة لها موسمين ، تحديداً منذ رحيل اغلب النجوم واعتزال البقية وعدم تعويضهم بأسماء توازي الامكانيات اللي كانت شايلة الميلان بالرغم من كبر سن الموجودين انذاك ، صحيح يخذلونك اوقات وللعمر احكام ، بس وقت الجدية تلاقهم رجال يحرثون الملعب .. يلعبون من اجل الشعار اللي على الفنيلة ، نتكلم عن زمن كان فيه محاربين من دفاع لوسط نهاية بالهجوم ..
مسألة انك تتخلى عن اسمين شايلين فريقك ولهم مكانتهم بميركاتو واحد فهذه مصيبة ، اذا الواحد منهم تهون لكن اثنين ؟ تتكلم عن ابرا هجومياً وتياغو سيلفا بسنه المفترض يكون مالديني ، نيستا الدفاع في ميلان مستقبلاً ولأعوام ومن المستحيل انك تفرط فيه مهما كانت القيمة المادية المقدمة له والامر من ذلك عدم التعويض بالرغم من يقيني شخصياً ان المادة متوفرة وما يُقال انها سياسة ادارة ماهي الا اكاذيب .. دخل نادي عريق مثل ميلان من بيع تذاكر ولاعبين وقمصان ووو لا يمكنهم شراء لاعبين سوابر ؟ الادارة احملها نسبة كبيرة من تذيل المستوى الحاصل الحالي ، تخديرهم للجماهير بصفقات مجانية ماهي الا تخدير مؤقت .. يزول مع الوقت والدليل فورة نوتشيرينو - روبينهو اللي تحكمه المزاجية والظهور في مباراة وغياب عشرة .. ما نشوفها في شدة الفريق لنقطة واحدة من متذيل الدوري!
الفريق هذا الموسم يعاني كثير على مستوى الدفاع ، بديهياً تخسر اسطورة وقيمة ك نيستا وتياغو بقلبي الدفاع وماتعوض رحيلهم بلاعب اقل شي لاعب سوبر فانت ارتكبت خطأ كبير ، ميكسس روما بنظري خسر الكثير من بريقه ، بونيرا ؟ زاباتا ؟ عيب تصنفهم مدافعين كرة قدم ، والمشكلة الأعظم الابقاء عليهم وتعزيز الفريق على مستوى الوسط والهجوم وعدم تعزيزه دفاعياً! يعني انت مدافعك الاساسي م ترتجي منه شي ، تطالع الدكة تشوف اللي اردى منه ، فتعرف ان حظك مستحيل يقوم على ها الدفاع!
م ننكر ان عامل الاصابات ماكل الفريق اكل من بداية الموسم ، وان ظروف المباريات احيان ما تخدمك والحظ يكون ضدك .. لكن اوقات تلعب مباريات مهما كانت العناصر عندك سيئة تكون في متناول اليد ، وممكن عنصر او عنصرين يفرقون معك ويجيبون لك النقاط الثلاث ، وهذا م فعله الشعراوي الموسم الماضي واعاد الميلن للوضع الطبيعي وحجزلهم بطاقة لأبطال اوروبا رغم توفر 3 مراكز فقط بالكالتشيو! عنفوان المصري انكسر وجات توابعه بهذا الموسم اللي مازال فيه مصاب!
تحكمه مزاجية كبيرة وهذا معروف عند "الخوال"  شي شفناه مع انتر مورينهو امتداداً لـ سيتي مانشيني انتهاءاً بـ ميلان اليغري واللي ظهرت مزاجيته الفترة الاخيرة .. بالوتيلي محد يشكك بقيمته الفنية العالية اذا كان رايق وفي مزاج عالي جداً ، بدايته مع ميلان شفناه انفجر بشكل كبير وتوقعت له مواسم استثنائية مع الفريق كونه لقى الجو اللي يناسبه وفالمركز المحبب له .. لكن مثل م ذكرت الفترة الاخيرة هبوط فالمستوى ، مزاجية تقهر فاللعب .. م اتوقع لاعب مثله يكون كسر رقمه على مستوى ضربات الجزاء امام نابولي هو السبب .. لكن الشك يراودني في ذلك!
هجومياً الفريق افتقد الشعراوي كثيراً ، شفناه مع بالوتيلي شكلوا ثنائي قوي بالمنتصف الثاني من الموسم الماضي .. طالما عندك مهاجمين يبردون قلبك قدام ف الامور الدفاعية تهون وبالإمكان تداركها .. نتكلم عن باتزيني اللي للأن م عوض غياب المصري .. والمتعارف ان الباتزو لاعب صندوق اكثر من كونه مهاجم ثاني .. دائماً ميلن يفتقد للمسة م قبل الهدف وهنا تظهر قيمة ستيفان ، ماتري اليوفي م اخذ فرصته فعلياً مع الفريق ولا تقدر تلومه بحكم المستوى المتدني من الفريق بشكل عام .. اكثر اهداف ميلن من خارج المنطقة اول حلول فردية تنتهي بركلة جزاء تحسم المباراة او يتدارك فيها التعادل!
عودة الامير!
بنظري رجعته تأخرت ، من المفترض نشوفه من الموسم الماضي مع معشوقه الاول ، ولو ان خروجه من البداية خطأ لكن الشي حصل ومالك الا انك ترضى فيه ، كاكا مدريد الوحيد اللي كنت متيقن انه م انتهى ، كاكا مع انه عانى من الاصابة الا انه رجع بعكس غالبية الاعبين بسنه ، اللمسة والمهارة م تغيرت .. عيبه الوحيد حالياً عامل اللياقة اللي تخونه بنص المباراة ، اكبر دليل هدفه على لاتسيو ، يلخص لك قيمة كاكا على ايامه ، فنياً م زال قادر على العطاء بس دائماً نقول "اليد الوحدة ما تصفق" علاوة على ذلك الفريق محتاج للتجانس اكثر ، صحيح الاجواء مش غريبة على ريكي لكن تتكلم عن العناصر والامكانيات اللي دون المستوى معاه ، هنا تتيقن ان كاكا بيعاني كثير .. لو نرجع لنقطة البداية بنلاحظ ان رجعته احد التخدير اللي انهتجته الادارة للجمهور .. اسم بقيمة كاكا كفيل بأن ينسي الميلانية بعشرات الاعبين اللي كانو مرتبطين فيهم!
اليغري .. م بيده حيله غير انه يتماشى مع العناصر الموجودة عنده .. موسم اول كان استثنائي جاب فيه الدوري .. انشال منه فريق كامل وما تعوض بنصهم وتطالبه ينافس ؟ صعبة جداً ، يعطيه العافية بالعناصر المحدودة عنده قدر يرجع بالفريق الموسم الماضي بعد بداية سيئة مش بعيدة عن بداية هذا الموسم .. مع ذلك يبدا الموسم الثالث له وبدون اي تدعيم له قيمته ، ونشوف سيناريو مماثل للموسم الماضي ، الاغلبية يحملونه هبوط المستوى وتوالي نزيف النقاط ، ممكن يكون سبب ثاني بعد الادارة ، عدم تصحيحه للأخطاء وثباته على تكتيك معين والمكابرة بأوقات من المباراة تخليك تشتم فيه وتتمنى اقالته .. مسألة اقالته ممكن يكون حل ان الفريق يتحسن نوعاً ما ، لكن ماراح يكون حل جذري للفريق طالما الفساد الاكبر من الادارة نفسها!
ميلان محتاج اكثر من مسألة فوز او فوزين او تأهل فبطولة معينة .. ميلان محتاج تغيير جذري من الاساس للمنافسة مستقبلاً وبناء فريق باستطاعته اعادة هيبة ميلان المفقودة .. محتاج لثورة ان صح التعبير ، مرحلة ميلان حالياً اشببها بمرحلة روما ، تشوف ميركاتو روما الصيف الماضي وتقول بس ، هذا بالضبط اللي محتاجه ميلان لتصحيح الاوضاع ، وكل م تأخرت هذه الثورة كل م ساء وضع الفريق!
اخيراً ، دائماً وابداً
 |
