06/11/2013, 04:49 AM
|
 | مدريدي مخضرم | | تاريخ التسجيل: 28/02/2003 المكان: United Kingdom
مشاركات: 6,917
| |
ألف مبروك التأهل الرسمي لدور الـ ١٦ .. راح أتكلم عن بعض النقاط في المباراة وعن وضع ريال مدريد في المباريات الأخيرة ..
أول وأهم نقطة دفاع ريال مدريد .. بغض النظر عن إذا كانت بعضها صحيحة أو غير صحيحة .. دفاع ريال مدريد تسبب في ٥ ركلات جزاء في آخر ٣ مباريات.. تلقى مرماه ٧ أهداف ! دفاع مدريد يعاني .. أنشيلوتي تكلم بعد كل مباراة عن وجود الأخطاء لكن إلى الآن لم يجد الحل المناسب !
أتكلم بشكل أوسع .. أنشيلوتي جرب كل الخطط الدفاعية .. حط راموس مع فاران أخطأ راموس .. حط بيبي مع راموس أخطأ بيبي .. حط كارفاخال معاهم اخطأ كارفاخال .. جرب أربيلوا أخفق أربيلوا .. لعب راموس بيبي فاران وقدم فيها الفرنسي اسوأ مباراة في تاريخه مع الميرنغي ! وين المشكلة ؟ ليه المدافعين ماهم بكامل تركيزهم يا أنشيلوتي ؟ انت الخبير في الدفاع ! انت المدرب الدفاعي ! انت الي دربت مالديني ونيستا وستام وتيري وكارفالهو وأليكس وسيلفا ! والحين تحت يدك فاران بيبي راموس ثلاثي أي مدرب يتمناهم ! تمركز ضايع تفاهم ضايع مافي توجيهات كأنهم أول مرة يلعبون سوا ليه ؟
من رأيي إن كثرة التجارب وتغير المدافعين هو السبب .. أنشيلوتي محتار مين أحسن راموس بيبي والا فاران .. ونفس الكلام أربيلوا والا كارفاخال ! أو بالأحرى محتار مين الأسوأ ! ياليت وكلي أماني إن أنشيلوتي يثبت على تشكيلة ويخلصنا من هالمداورة الي جالسة تفيدنا من ناحية وتصيبنا من ألف ناحية !
اثبت على مارسيلو بيبي فاران كارفاخال ! أو شيل بيبي وحط راموس واثبت عليه ! أما في كل مباراة تدخل طقم دفاع مختلف وين راح يستقر دفاعك ! وين يمديه يتفاهم !! شئ يقهر بصراحة ..
النقطة الثانية اختياره وتحديده لكاسياس في التشامبيونز والكأس، دييجو للدوري .. هذي نقطة سلبية وماتحفز لا كاسياس ولا دييجو ! كاسياس اليوم قدم مستوى خرافي وحطم رقمه القياسي في ٢٠٠٦ وصد ١٠ كرات في مباراة واحدة في التشامبيونز ! دييجو دخل في مرماه ١٦ هدف في الدوري ! هنا أنا ما أقول إن دييجو سيئ أو كاسياس أفضل .. الي أقوله إن شخص بخبرة أنشيلوتي المفروض مايحط نفسه تحت ضغط الصحافة ! بكرة كل الصحافة وأنا متأكد من هالشئ .. راح تتكلم عن كاسياس وتطالب فيه كأساسي وتستند على الـ ١٦ هدف الي في مرمى دييجو وتقارن مدريد بسيلتا فيجو الي ترتيبه الـ١٥ على الدوري ومتلقي نفس عدد أهدافنا !
الأهداف الكثيرة في مرمى مدريد أنا ما أحملها لوبيز ولا كاسياس ولا الدفاع بشكل كامل ! أنا أحمل ٥٠٪ للسيد أنشيلوتي و ٥٠٪ على الدفاع والحراس .. طول متابعتي لمدريد ما أتذكر إن فريقي تلقى هالكم من الأهداف في مباريات قليلة ! والي يقهرني إنها تتكرر في كل مباراة ! إلى متى ؟
النقطة الثالثة .. مستر كارلو ! إلى متى تلعب خضيرة محور متقدم ؟ اللاعب كان الموسم الماضي مقدم موسم خرافي مع مورينهو لأن مورينهو كان مثبته بجانب ألونسو ومقيده بهالمركز تقييد مع اعطائه حرية التقدم على حسب الهجمة .. إنت يا أنشيلوتي فالتها ؟ ملعب مودريتش وألونسو دفاعيين وخضيرة هو الي يتقدم ؟ الرجال بطيئ جداً ومايقدر يتحمل ضغوطات دفاعية عليه ! مايلقى حلول سريعة إذا ضغط عليه لاعبين الخصم فما بالك وهو يلعب قدام فريق إيطالي ؟ إنت تظلم اللاعب كذا وتطلعه بصورة سيئة قدام الجمهور وتخلي ناس كثير تنتقده بسبب تقديمك له ! خضيرة لازم يكون محور دفاعي ثابت .. يتقدم حسب الهجمة مو مشكلة بس مايكون متقدم طول المباراة على ألونسو ويشارك في كل هجمة لمدريد ! في لاعبين أحق منه بهالمركز مثل مودريتش وإيسكو ولو إن إيسكو مستواه هابط لكنه لاعب يعرف يفكك الدفاع في العمق ويعرف يتصرف تحت الضغوطات !
هذي بوجهة نظري سلبيات كارلو حتى الآن وإن حلها إن شاء الله وضع الفريق راح يتحسن .. بس المشكلة إني ما أحس بأي حلول جالس يقدمها بالعكس يستمر في تفكيره بالتجارب الدفاعية وكأنه يلعب بطولات ودية !
طبعاً أنا أتكلم بوجه عام ولو راح أتكلم عن سبب ضعف دفاع مدريد .. لكن لو راح أتكلم عن مباراة اليوم أكيد إني راح أحمل فاران مسؤولية الهدفين ١٠٠٪ .. الهدف الأول تهور بالدخول بقدم واحدة على الكرة مع إنه دائماً يدخل بقدمين لصد التسديدة .. وهالشئ تسببلهم في ركلة جزاء صحيحة لا غبار عليها .. والهدف الثاني ماكان ينتظر الكرة بقدر ماهو يحاول يتابع لورينتي ولحظة فقدانه للتركيز فقد الكرة وفقد مراقبة لورينتي وسجل هدف التعادل ..
يا بعد الدنيا  مع كامل احترامي لوجهة نظرك لكن كاسياس ماكان يحتاج إنه يغامر ويتقدم مسافة طويلة ( مع وضع سرعة الكرة في عين الاعتبار ) لأن فاران ماسك لورينتي .. الخطأ يتحمله فاران لأنه ماغطى لورينتي بالشكل المطلوب ولا ركز على الكرة .. ومن الظلم والإجحاف بحق كاسياس بعد هالمباراة الكبيرة الي قدمها إننا نقول إن مدريد مايقدر يحقق شئ بالتشامبيونز بوجوده ..
غاريث بيل .. ٣ مباريات كاملة = ٣ أهداف + ٤ أسيسيتس ! اللاعب بدأ ينسجم بدأ يلتحم بدأ يقدم مالديه .. مستواه المتصاعد يبشر بهجوم ناري لمدريد .. من الممتع مشاهدة ٢ رونالدو على أرضية الملعب لازال الحكم مبكر على اللاعب و٣ مباريات غير كافية لإثبات نجاح الصفقة .. لكن هالـ ٣ مباريات كافية إنها تطمني إن بيل ماشي في المسار الصحيح وراح يقدم مستوى رائع مع مدريد وأنا أراهن على نجاحه إن شاء الله
بينزيما مستواه متحسن .. صحيح اليوم ضيع هجمة وفلت كم كورة من تحت رجله لكن أدى واجب جبار في الضغط على بيرلو وصنع الهدف لرونالدو وتحرك أكثر من قبل .. لكن مازلت عند رأيي بأن نادي بحجم ريال مدريد يحتاج إلى مهاجم قناص ينهي الهجمات من أنصاف الفرص .. مانحتاج مهاجم يصنع أو يغطي .. بس مالنا إلا الصبر والاستمتاع بالصبر ..
تشابي ألونسو .. كنت أقول بأنه أكثر لاعب يفتقده مدريد هذا الموسم .. لأن لا مودريتش ولا إيارا ولا خضيرة قادرين يغطون فراغه .. والحمدلله عودته اليوم أراحتني ومستواه طمني .. تمريرات رائعة .. تغطية ممتازة .. صراع جميل مع بيرلو انتهى بفوزه .. تسديدته في العارضة قهرتني أكثر من هدفي اليوفي .. ليتها اكتملت
مجملاً الفريق متناقض .. دفاع هش وهجوم مرعب .. الفوز هو الأهم لكن يجب على أنشيلوتي تحسين الوضع الدفاعي قبل الدخول في المباريات الجدية وقبل وصولنا إلى الإنتقالات الشتوية لازم يثبت على تشكيلة وقتها راح يعرف احتياجاته ..
أختملكم كلامي بصورة فخمة أمتعتني :
اعذروني على الإطالة .. وتحيا مدريد
تحيتي .،،.
|
