24/05/2013, 11:42 PM
|
 | مدريدي مخضرم | | تاريخ التسجيل: 28/02/2003 المكان: United Kingdom
مشاركات: 6,917
| |
بالنسبة لمورينهو، ودي أسرد إيجابياته وفوائد تدريبه لنا وسلبياته وأخطائه ..
من إيجابياته إنه أعاد الهيبة لريال مدريد، فك الكثير من العقد مثل ملعب الريازور، دور الـ ١٦، كأس الملك، هيمنة برشلونة وعقدتهم لنا، هروب بيب  ، تحطيم الأرقام القياسية، كشف نجاسة الصحافة وتوعية الجمهور على ماهم قادرون على فعله، ضبط الفريق من كبيرهم إلى صغيرهم، إعطاء الفرصة للاعبي الكاستيا وبروز بعضهم مثل ناتشو وموراتا وخيسي رودريغيز و كارفاخال، كشف التعصب والتحيز من الإتحاد الأوروبي والإسباني ضد ريال مدريد ومحاباتهم لبرشلونة وشفنا ثمار هالشئ هالموسم على برشلونة الي أنهى الموسم بأقل الإستفادات تحكيمياً خاصة في المواجهات بيننا وفي دوري الأبطال.
في المقابل، السبب الرئيسي لقدومه هو دوري الأبطال وأعطي كامل الصلاحيات والحرية التامة لفعل مايشاء في الـ ٣ سنوات، أول سنة معذور ثاني سنة ماحالفه الحظ ولكن هذي السنة ممكن أسهل وأسوأ خروج لنا تحت تدريب مورينهو .. المستوى ماتحسن المستوى انحدر هالموسم..
بعيداً عن ظلم تحكيمي وما إلى ذلك .. في مباراة دورتمند الي خسرناها بالـ ٤ .. كان الفريق متعادل ١-١ في الشوط الأول، في الشوط الثاني لقمنا ٣ أهداف وكلها من نفس اللاعب الي جاب الهدف الأول .. انت كمدرب جالس تسجل ملاحظات على اللاعبين في الشوط الأول المفروض تلقى طريقة تبطل فيها خطورتهم وتدافع عن منطقتك بإبطال مفاتيحهم ( رويس، غوتزه، ليفا ) فنتيجة ١-١ إيجابية نحاول نحافظ عليها أو نطلع بأقل الخساير وإن جانا هدف مثل هدف الشوط الأول خرجنا بفوز ! طبعاً ماننسى إنه أعلن التشكيلة قبل المباراة بيوم وريح مدربهم من التفكير في بلان بي وبلان سي .. وخلى كل لاعب من لاعبين دورتمند يكون عارف وش دوره .. صار مثل المدرس الي يعطي طلابه الإختبار قبلها بيوم .. جهزهم ١٠٠٪ للنجاح ..
هذا خطأ تسبب بخروجنا هالموسم من دوري الأبطال والا كان المفروض الحين جالسين نحلل مفاتيح الفوز بالتشامبيونز .. الخطأ الثاني بقاء هيجواين ! لو أشر لبيريز إنه يبي مهاجم كان جاب الأفضل فالعالم وبيريز مايقصر من هالناحية .. لكنه أصر على بقاء هيجواين وللأسف أكلها على راسه بوجود مهاجمين عقيمين تهديفياً وغير قادرين على إنهاء الهجمات ..
الخطأ الثالث والغير احترافي بصراحة، كثرة روحاته للندن وتلميحاته بنص الموسم إنه ناوي يطلع ولما يسألونه الصحافة وش كنت تسوي بلندن يقول رحت أخلص أشغال ! من الغير احترافي إنك ماتحترم عقدك مع ناديك وتتفق مع نادي ثاني وتستغفل الجمهور وتقول إنها مجرد أشغال ..
الخطأ الرابع التساهل في مباريات الدوري هذا الموسم، خسرنا نقاط كان من السهل نكسبها وكانت راح تخلينا ننافس إلى نهاية الدوري ويمكن نفوز فيه ! التساهل في بعض المباريات حيث إنك تشوف اللاعبين بلا تكتيك مش الكورة لرونالدو واركض، الكرات العرضية من أسباب خسايرنا للنقاط هالموسم وما اكتشف هالمشكلة إلا بعد مباراة مانشستر للذهاب وحلها !
الخطأ الخامس كأس الملك ! إيسيين مقدم أسوأ مباراة له في الموسم وأخطاؤه كثيرة ومصر على الإبقاء عليه مع أن ناتشو مقدم مستوى رائع حتى قدام الآتلتيكو في الدوري كان مستواه ممتاز وجاهز للمباراة ! التأخر في التبديلات زيادة عن اللزوم ولما غير نزل ٣ لاعبين دفعة واحدة ولخبط أوراق فريقه وماكان في أحد يوجههم وهنا أقصد كارنكا الي كان ساكت ..
هذا مايخطر في بالي من أخطاء لمورينهو هذا الموسم .. هو مدرب رائع ومن الأفضل في العالم لكن أنا متأكد بأن الريال لن يتضرر برحيله في حال أتى البديل المناسب .. ولا تنسون إن فريق فيه مشاكل داخلية يعني مافيه استقرار والفريق الي مافيه استقرار مايجيب بطولات لذلك رحيل مورينهو أسهل من بقائه ورحيل ركائز أساسية عن الفريق .. لذلك مثل ماقال بيريز ومثل ماقال مورينهو .. اتفقنا على أن رحيله هو الأفضل للجميع 
طبعاً كل ماقلته مجرد وجهة نظر متواضعة قابلة للصواب والخطأ ..
متفائل بموسم خرافي لأن الفريق جاهز وكاسب خبرة ويحتاج فقط لقائد ناجح مثل مورينهو يكسبهم المزيد من الخبرة ويوجههم نحو المنصات
تحيتي .،،. |
