مجهود تشكر عليه , وجميل ان الواحد يقدم للهلال مايستطيع ,
لكن اختلف معاك في كثير من الاسماء ,
أولاً ,
فيه اسماء مغموره سواء لاعبين أو مدربين من انديه من درجه ثانيه و ثالثه صعب تقييمها ,
وصعب اشوف انك تضمن نجاحهم , يعني حتى لو جابت الاداره واحد منهم ممكن يفشل !!
ثانياً ,
اشوف انك حطيت اسماء المدربين بدون بحث , بس عشان تزيد عدد الاسماء ,
وبكذا مااشوف ان الاداره بتستفيد من الاسماء اللي حطيتها لأنها مش مختاره بدقه أو بحسب مناسبتهم للفريق !!
يعني اللي عرفتهم كم واحد من بينهم "دونجا و دي ماتيو و كانيدا " هذولا دفاعيين بحت بحت بحت ,
غير ان دونجا أصلاً فشل مع منتخب البرازيل بكبره , فما بالك بـ نادي ,
زيد عليه فان باستن , اللاعب اسم كبير كلاعب , لكن كـ مدرب اللي اتذكره انه درب نادي درجه اولى وفشل !!
كيف تبيه يدرب نادي زي الهلال ؟!
اعرف بلان و رينيه و بيلغريني و غيرهم , اسماء قويه ,
لكن اذا اضفت معاهم الاسماء اللي ذكرتها لك سابقاً معناها انك مابحث الا عن الاسم !!
ثالثاً ,
بالنسبه للاعبين ,
فيه خيارات "غير منطقيه" , وفيه خيارات "سيئه" ,
بالعربي نفس الشي مااحس انك بحثت عن "المتاح" بقدر بحثك عن الاسم !!
عمر عبدالرحمن في العين الاماراتي , وشيوخ الامارات يغدقون عليه من الترف والمال ,
أقنعني كيف بيجي للسعوديه ويخليه اهله والفلوس وكل شي ويجيك هنا السعوديه ؟!
من غير انك حاط لاعبين في أنديه قطريه ,
اللي معروف انها كـ "مقدره ماليه" هم أقوى مننا , بسبب الدعم الحكومي ,
كيف تبي نجيب لاعب مميز جداً وممكن يقدم الاضافه , ونجيبه من نادي لخويا ؟!!
من غير ذكرك لمونتاري من اي سي ميلان ؟
أو اللاعب الي في انجي الروسي "أقوى الأنديه من الناحيه الماديه على مستوى العالم في الفتره الحاليه" !!
اي سي ميلان - انجي الروسي - اودينيزي(بطل في ايطاليا)-بنفيكا(بطل البرتغال)
كلها خيارات صعبه واشبه بالمستحيله , استغرب طرحك لهالاسماء ,
طيب هل عقودهم قربت تنتهي ؟ بينهم وبين أنديتهم مشاكل ؟
المفروض تذكر سبب لذكرك هالاسماء اللي تلعب اصلاً في انديه بطله , وتعلمنا كيف ممكن الاداره تجيبهم !
طبعاً فيه خيارات ثانيه برضو اشوفها صعبه لكن مش مثل اللي فوق !!
فيه بعض الخيارات تحيرني كيف تبغى الاداره تجيبها ,
وفيه خيارات اخرى تلعب في أنديه غير معروفه , فما بالك باللاعب نفسه !!
ومثل هالخيارات هي اللي جابت لنا مانجان و جوستافو و غيره من اللي ماضبطو مع الفريق ,
يعني مش اسماء كبيره زي ماقلت في بداية التقرير , وهالاسماء ماحد يضمن نجاحها !
موضوعك جميل كـ "فكره" و كـ "مجهود" تشكر عليه ,
لكن لو كان هالمجهود بـ توجيه سليم ومفصل ومدقق أكثر كان الموضوع بيكون أكثر فائده وموضوعيه ,
يعني مثلاً زي نيني اللي طلع قبل فتره من باريس سان جيرمان ,
اللاعب انتهى عقده والنادي مايبي يجدد له و اسم كبير وصاحب مهاره و سرعه واحتراف صحيح ,
لكن اسلوب وطريقة لعب المدرب ماتتطلب تواجده بالاضافه للمشاكل بينه وبين الاداره ,
مثل هذا نقول فرصه ثمينه لازم تستغلها الاداره , ولكن القطريين كالعاده اقوى مادياً ولقطوه ووقعو معاه !
في النهايه اشكرك مره ثالثه على مجهودك ,
وأتمنى ما يكون في كلامي اسائه لك ,
تقبل تواجدي , 
