السلام عليكم ،، اخباركم ياحلوين ؟
انا قاعد اقرا الردود لبعض الاخوان وانا مستغرب والله ،، طبعا قبل لا ابدا كلامي كل واحد وله وجهة نظر وانا احترمها والله بس ودي اعقب عليها ...

اولا: ابتكلم عن مورينيو اللي احس وكانه بدا مايهمه الفريق كثر اول. احس انه صار في بعض الاوقات هو من يسبب المشاكل بالفريق " احس ترا " يعني مرات يطلع بتصريحات قوية على اللاعبين ،، ياخي اذا شايف عليهم غلط خل التزبيد بينك وبينهم. بهذي الطريقة انت تخلي اللاعب يبدا بالحقد والعصبية وهذا اكييييد بياثر على مستواه الفني وعلاقته مع اللاعبين.
والشي الثاني اللي ودي اتكلم فيه عن المو هو تثبيه لخطة واحدة بسسسسس !! طبعا قد تكلمت فيها قبل بس والله شي يقهر. صحيح ان الواحد لازم يثبت تشكيلة معينه عشان الانسجام وما الى ذلك بس ياخي نوع بالخطط شوي ،، لا تخلي الفرق المنافسه لك تعرف طريقتك وتعرف كيف توقفك جد والله انا استغرب هالشي من المو. انت بفريق عندك لاعبين تقدر تعدل وتبدل في اماكنهم مثل ماتحب + نجوووم على مستوى عالي. يعني مرات الريال يلعب مع منافس ضعيف او متوسط وتلقاه يلعب بنفس الطريقة اللي يلعبها مع فريق قوي يعني المفروض ينوع اللعب ،، مره يلعب 4-4-2 ومره العب 4-1-2-3 ومره العب 4-2-1-3 ،، كلهم تقدر تلعب بنفس التشكيلة تقريبا بس بالطريقة هذي فريقك يبدا يتعود على اكثر من طريقة لعب.

ثانيا: فيه بعض الاخوان دايم يتكلمون عن هجوم الريال ،، ومن كلامهم تحس انه هزازي والشمراني بالهجوم. صحيح هيقواين صاير يضيع فرص ومستواه بعيييد كل البعد عن المستوى اللي كنا نعرفه عن هيقواين ،، ولكن الواحد لازم يصبر. اذا على كذا ،، اذا كل واحد تبي تمسكه الباب اول ماينزل مستواه اجل والله ماراح تلقى اي لاعب بفريقك. واما بالنسبة للبنز ،، فانا من وجهة نظري ان مستواه عادي وصحيح انه حاله من حال هيقواين ،، بس بنزيما يقدم مستوى كويس ويسجل في بعض المبارايات. وغير انه يسجل ،، يصنع فرص وله دور تكتيكي عالي ،، هو ومودريتش الوحيدين اللي بالريال اللي يعرفون كيف يحتفظون بالكوره.

ولا تنسون ترا الارهاق لاعب لعبته بالفريق ،، والدليل انه الحين اي لمسة يتعرض لها اي لاعب تجيه اصابه. وانا اشوف ان الجهاز الفني هو المسؤول الاول عن المشكله هذي ،، وبعدها يجي المو اللي المفروض انه يريح اللاعبين اكثر وقت ممكن .

وبالنسبة لمودريتش ،، ابيكم تتذكرون بنزيما اول ما جا للريال كيف كان وضعه ؟ خضيرة ؟ الونسو ؟ مارسيلو قبل لا يتطور مستواه ؟؟
اللي ابي اوصله هو ان اللاعبين كلهم بدايتهم سيئة كانت ،، ولكن المو زرع فيهم الثقه وحسسهم ان كل واحد له مسؤولية كبيره بالفريق. اما بالنسبة لمودريتش ،، لو تلاحظون في طريقة لعبه ،، تحس وكانه مو واثق ،، احس انه قامط من اللي معه باختصار ،، اللي يتابع مودريتش ايام توتنهام بيعرف اللي اقصده...
وانا عندي ثقة عميا ان مودريتش بيكون واحد من اهم العناصر الرئيسية في تحقيق الالقاب هذا الموسم " ان شاءلله"

ادري اني طولت ،، اعذرونا