|
قبل مانفكر في إياب أولسان ... الشباب اولا
بسم الله الرحمن الرحيم واسعد الله ايامكم بكل خير هاردلك على الخساره المتوقعه من اولسان في كوريا والحمد لله انها جت على واحد في ظل مستويات الهلال المتذبذبه والإداره كأنها عميانه وماتشوف شي !  اغلبية المواضيع تتكلم عن مباراة الإياب الآسيوي وكيف نفوز على أولسان وكل واحد يحط الخطه اللي هو يبي يشوف الهلال يلعب بها وانا مثلكم بعد  لكن قبل هذا كله ترا عندنا مباراه امام الشباب بعد بكره ان شاء الله اذا اولسان راقب الهلال في مباراه او مباراتين وفاز علينا اجل وش نقول عن الشباب ؟ الشباب عنده افضل مهاجمين في الدوري السعودي واللي يسجلون من انصاف الفرص طبعا هم ناصر الشمراني وسباستيان تيجالي ! ومن خلفهم صانع اللعب الخطير ( كماتشو ) مباراة الشباب هي الاختبار الحقيقي للهلال قبل مواجهة أولسان وبصراحه يمكن الشباب اخطر من اولسان الكوري بمراااااااحل في مباراة الشباب لابد من بدء التغييرات الجذريه في الفريق وكفانا مجاملات اذا عندكم عقوبات خلوها لغير هالوقت على الاقل خلوا الفريق لين يتوازن مستواه ثم بعد ذلك عاقبوا اللي تبون !  في مباراة الشباب لابد من اعادة الشهراني ظهير ايسر والبيشي ظهير ايمن العابد والشلهوب من بداية المباراه والإكتفاء بعبدالعزيز الدوسري إحتياط واعتقد الكل شاف كيف كان يقتل الهجمه ببروده في مباراة أولسان عُرف عن الهلال قوة وسطه لذلك لابد من تكثيف هذا الخط بإشراك الشلهوب والعابد والفريدي والقرني والفرج بعدها اذا ماضاع وسط الشباب لكم اللي تبون هرماش يبقى إحتياط واذا جات الإنتقالات الشتويه نقول له الله يستر عليك ونجيب لنا محور مثل طيب الذكر رادوي واهم شي يكون محترف اوروبي ترا اكتفينا مقالب عربيه الهجوم وفي ظل كثافة خط الوسط بخمسة لاعبين يتوجب اللعب بمهاجم واحد يااما ياسر يااما ويسلي مع العلم ان الاثنين يتميزون بإنهاء الهجمه بهدف بإذن الله  واذا كان عندك 3 صناع لعب كحد اقصى في منطقة الوسط فماراح نحتاج لمهاجمين اثنين بنفس الوقت تشكيلة مباراة الشباب السديري الشهراني ... المرشدي ... المسلم ... البيشي القرني الفرج ... الشلهوب العابد ... الفريدي ياسر ( ويسلي ) لااحد يستهين بالشباب ولا احد يقول الفتح هزمه ! ترا الفتح هزمنا قبل يهزم الشباب والشباب أخطر من الهلال بكل صراحه فالكم الفوز والثلاث نقاط بإذن الله سبحانه   | 