السلام عليكم ورحمة الله وبركاته ..

ما تحسون موضوع #السعودية و #اسبانيا آخذ آكبر من حجمه !!؟
وما تحسون ان الكل خلا المباراة وكأنها نهائي كأس العالم وانها مباراة مصيرية !!؟


انا مانيب ضد او مع المنتخب السعودي لاسباب واجد منها :
- ما فيه لاعبين قادر تعتمد عليهم محليا الا قليل تعدهم على اصابعك ..
- ما فيه روح وابداع في الاندية السعودية وخاصة القمة من هلال ونصر وشباب واهلي واتحاد واتفاق ووحدة ..
- ما فيه ترابط وسط الاندية وتشوف مشاكل لاعبين عد واغلط ..
- ما فيه عقول في الرئاسة تقدر تضبط لك خطة استراتيجية بعيدة الامد سواء كانت خماسية او سداسية ..

بعد الخروج من تصفيات كأس العالم 2010 سمعنا بكلام كثير من تطوير واهتمام وان التأهل لكأس العالم 2014 سيكون هدية للوطن وللجماهير .. لكن صارت اخطأ فضائحية دليل على عدم الخبرة والفشل اللي صاير عندنا برياضتنا ..

نسمع تصاريح ونشاهد لقاءات وكأن المنتخب هو أفضل منتخب في آسيا وثالث افضل منتخب في العالم ، المشكلة اننا نبكي على الاطلال ونذكر الزمن القديم اللي ما زلنا عايشين فيه ونتذكر نجوم سطروا التاريخ ( الجابر + عبيد الدوسري + شليه + العويران + ماجد + الشريدة + النعيمة + محيسن + التمياط + التيماوي + الثنيان + الواكد + الدعيع ... والقائمة تطول ) ..

طيب حنا وصلنا زمن الاحتراف وين الكفاءات والمواهب اللي نشوفها في انديتنا ووين عامل التدريب والاحتراف الخارجي المهمش في السعودية !!

انديتنا بسبب ضعفها صار منتخبنا ضعيف وضايع بشكل غير طبيعي ..
فيه تنافس محلي لكن خارجي انتهى من بعد 2007 والكرة السعودية في انحدار غير طبيعي والسبب الغرور اللي صاب اللاعبين والثقة والحماس الضعيف ..

لو نظرنا للدول اللي كان منتخبنا يفوز عليهم بالـ 6 و 4 صاروا افضل منا والدليل سوريا والاردن واليابان والكوريتين وتايلاند صاروا افضل بكثير ..

متى ما شاهدنا انديتنا مهتمة بالمحليين في الوسط والهجوم كأولوية فبكذا قادرين نكون منتخب قوي ..

لذلك اتمنى منكم ما تزعجونا بالمنتخب حتى نشوف انديتنا ترجع لعزها خارجيا ، وضعنا محليا مخزي ومشاكلنا الداخلية واللي بسببها اعلاميين حب الظهور والاهتمام بالشكل والملبس انتهت ، كذا اقدر اقول #الاخضر عاد وبقوة بسبب عودة انديتنا للمنافسة الخارجية ..


اتمنى توصل الفكرة للجميع وتحياتي ..


بسآم العتيبي