إقتباس الرسالة الأصلية كتبت بواسطة ][ هلـآلي للـآبد ][ أهلين أحمــد كان الله في عون صديقك حسّان الله يوفقه ويرزقه ويسهل له أموره الآن قليل تجد شخص يتزوج بدون " ديـن " والسبب في أرتفاع تكاليف الزواج وغلاء المعيشة حتى الإيجارات أصبحت مرتفعة كان الله في عون الجميـع .. الله يرزقك بالزوجة الصالحه يا أحمد ونفرح فيك

ياحيّ الله أبو تولين
أولاً أشكرك على رفع معنوياتي المحبطة بدعائك الجميل لي بالزوجة الصالحة
وعسى أن يكون ذلك قريب
وصحيح ماتفضلت به أخي العزيز , كل شيء أصبح في العلالي غلاء فاحش ودخول متواضعة
اسأل الله أن يعين الجميع
شاكر حضورك الجميل ياغالي

إقتباس الرسالة الأصلية كتبت بواسطة STS2005 كويس يعني فيه واحد ثاني غييري باع سيارته عشان تكاليف الزواج تذكرت سيارتي الـ STS توني شاريها ومشخص بها ما راح عليها سنه الا وهي في المعرض عشان اكمل تجهيز الشقه ومن زود حبي للسيارة حطيت عضويتي بأسمها في المنتدى . يا رجال لا تشيل هم خويك هذي حركات العرسان في ليلة زواجهم يسوون نفسهم ضحايا وانواع الحزن ما يبون احد ينضلهم او يعطيهم عـين وتلقها اللحين ماشاء الله يتنكس ومستانس ولو تقول له لو يعيد بك الزمن للوراء بتاخذ قرض بيرد عليك مو قرض وبس الا بسرق بنك واذا كان الواحد محبط وقفلت عليه الابواب يسوي مثل واحد من الشباب اللي اعرفهم دخل على القائمة حقت الديوان وشيك على اسماء البنات اللي توهم متوظفات يعني اي وحده توها متوظفه وجوهم ناس يخطبون تراهم اهل خويي وعشان محد يقول عني متفائل او ابالغ في الموضوع خلونا نحسبها وحده وحده بخصوص تكاليف الزواج اللي متعارف عليه . 1- المـهر المعدل المتعارف عليه 40 - 50 الف ريال . 2- تكاليف اجار الشقه حاليا (هذي الصراحه اللي اكثر الشباب يعانون منها ) افضل شقه في حي نظيف 20-30 الف غرفتين وصاله ومجلس ومقلط نساء . 3- الذهب ( هذي عاد تخضع لشطارة التفاوض الأهل مع اهل العروس ) بعضهم يقولون ترا الذهب مع المهر وبعضهم يقول لك لا مستقل والذهب طبعا يخضع لسعر السوق 10-15 الف (غير الشبكة) اللي ما تتجاوز 3 الاف (عاد اللي بيزود محد ماسكه ) 4- المصيبةالكبرى وهي حفل الزفاف اللي بعض الشباب الله يهديهم يسوون فيها (نمر بن عدوان) ويطق صدره ويقول انا متكفل بها مع ان الدعوه يكون فيها تفاهم ونقاش (وهنا تجي شطارة العريس مع العروس في المكالمات التلفونية بعد الملكة) يعني اذا كان مضبط نفسه يقدر يقنع العروس اما اذا كان (خاق) عز الله بيبيع كل شي حتى ملابسه . يعني الاجمالي تقريبا 150 الف ريال ( قريب من سعر اليوكن والتاهو2012) .طبعا الرقم يمكن يكون للشباب اللي توه يدرس او اللي توه متوظف رقم (خيالي او فلكي ) لانه ما تعود الا على ثلاث خانات في رصيده لكن مع مرور السنين بيصير هذا الرقم كنه ريال ونص . والمفروض يكون الشاب عنده رصيد على الاقل 30% من هذا المبلغ يكملها يا بقرض او من عانيات الأهل والاصدقاء والأقرباء لان هذا زواج يا يكون الواحد مستعد او الله لا يهينه لا يدخل في شي مو قده لأن الناس ما راح يعطونك بنتهم ببلاش. (هناك معادلة انسانية عجزت ان افهمها من بعض الشباب هداهم الله فهناك شاب يكون له علاقة مع بنت نشوف انواع الهدايا والسواليف والتضحيات والوعود وتسديد الفواتير واذا جاء وقت التفكيربالارتباط بفتاة ستكون زوجته وام ابنائه يفكر في المصاريف (طيب ليه ما فكرت في المصاريف مع خويتك ؟) وعلى طاري المهر يا جماعه خلونا صريحين وواقعيين المهر يتحدد على حسب الناس اللي الواحد بيخطب منهم يعني مو معقوله تروح تخطب بنت اهلها كاش وابوها راتبه فوق الـ 30 الف وكل سنه يصيفون في اوروبا وانت تبي تعطيهم مهر قليل وتبغاهم يرضون بالعربي مد لحافك على قد رجليك واختر الناس المناسبين لك اجتماعيا وماديا عشان ما تضيع في الرجلين . وبعض الشباب الله يهديهم يتوقعون ان المهر بياخذه ابو العروس ويحطه في رصيده وهذا خطأ . المهر يتوزع على اغراض العروس وتجهيز بعض ادوات الشقه يعني تبي تتزوج وشقتك تكون فاضية ما فيها ادوات للمطبخ او الضيافه وبعض الاكسسوارات عشان بيتك يكون في منظر جميل ؟ البنت بعد تبي تطلع بشكل جميل امام زوجها وهذا المظهر لا يمكن ان يتحقق لا بمبالغ كبيره يكون مصدرها الاساسي من المهر .(عاد العن شي تذب عليك البنت وتقولك المهر ما كفى ) . واترك عنك الكلام اللي يقول البنات اللحين ما يطلبون شي (اذا جا وقت الجد) كل وحده تبي احسن شي وافضل شي وتفتح النت وما يردها الا منتديات ((حوا) وتتفرج على افضل الموديلات والاكسسوارات والهدايا والبوفيهات المفتوحه وتصاميم الكوشه والزفه ورحلات شهر العسل وتجي عاد الاقتراحات من صديقاتها اجل تبي البنت تتزوج في سطح البيت مثلا وشهر العسل في الشرقيه. والدولة ما لها علاقة في المهور وليس لها وصاية على العوائل وبناتهم اللي مستعد حياه الله واللي مهو مستعد يدورناس على قده والدعوه قسمه ونصيب . الشباب يسافرون لدبي تكاليف السفره بـ 10000 ريال وتكاليف السفره للمغرب 30000 الف ريال وتكاليف السفر لمصر 20000 الف ريال هذا غير ختات البحرين في الويك اند حد ادنى 3000 ريال . ليه ما نقول للحكومه العزاب لا يسافرون يقرون في ارضهم ويوفرون فلوسهم للزواج؟ هناك نصيحة قالها لي الوالد الله يطول في عمره عندما رأني في معمعه ما قبل الزواج قال لي ( خلك كريم مع نسايبك قبل الزواج يصيرون معك كرماء طول العمر). لأن مصاريف الشاب لن تتوقف فقط في قبل الزواج بل سوف تكون هناك مصاريف بعده وفي حياته الزوجيه وربما تأتيه لا سمح الله ضروف قاسية او صحية او ماديه فماذا سيفعل خلالها ؟ وهنا يأتي الاختبار الحقيقي للرجال الذين يتحملون ويديرون شئون حياتهم بالصبر والحكمة والتوكل على الله ووقوف الناس التي تحبه معه من اهله وأهل زوجته اذا كون علاقة قوية وكريمة معهم سيردون له هذا الشيئ في وقتا ما يكون هو بحاجه لهم . نصيحة اخويه لا تقف كثيرا عند تكاليف الزواج فإذا كان الشاب مقدم على هذا المشروع لابد ان يخلص النيه ويفوض امره لله سبحانه وتعالى وبعدها سوف يعوضه الله ويرزقه ويسهل اموره بعد الزواج وهي المرحلة المهمه لبناء الأسره والتي تختفي خلالها جميع الامور المادية والمعاناة والتفكير والمصاعب بتعاون الزوجين ومودتهم وتفاهمهم. تمنياتي لصديقك بالتوفيق ونسأل الله ان يسهل اموره ويرزقه بالذريه الصالحه وان شاء الله نسمع خبر زواجك مثبت في المجلس . ولا يهون الهلالي دائما اللي اتمنى ان ما يقرا الموضوع تراه يدور على عذر وبيستغل الفرصه . مع التحية .

أهلا ً عزيزي sts 2005
يكفي أنك تتكلم بعين خبير , ويكفي أن هذا الكلام خرج من شخص عايش الوضع بشكل مقارب جدا ً , ويكفي أنك فقدت أعز ماتملك حينها لكي تكمل مصاريف زواجك

اختلف قبليلا ً واتفق كثيرا ً معك فيما ذكرت ياعزيزي , ولكن مسألة أن المهر لن يذهب لأب الزوجة وإنما سيكون تجهيز للبنت , فالأمر لن يكون كذلك غالبا ً , بل أن مصاريف تجهيز البنت لن تتجاوز 10000 ريال في غالب الأحيان والبقية يلطشها الوالد تحت بند ( صرفت عليك طول العمر ) , بل تجد أن الرجل هو من يتكفل في كثير من الأحيان بتلك المصاريف إذا كانا والدا البنت استغلاليين وهو ممن يستحي ولا يستطيع رد تلك الطلبات .
بل تجد الرجل هو من يبادر أحيانا ً ويدفع كرما ً منه وخوف في نفس الوقت أن ينقص الفتاة شيء تحت جبروت والدها فلاهي التي تستطيع طلب ماتحتاجه من زوجها حياءً ولاهي التي ستجد مطلبها من والدها
ماشاء الله عليك رد يكفي عن عدة مواضيع
أسعدك الله بزواج آخر إذا لك نيّة طبعا ً , كما اسعدتني بدعائك الجميل لي ولحبيب الشعب أبو مقبل
دمت بود