السلام عليكم ورحمة الله وبركاته جميعاً كل واحد باسمه
تدرون وش يذكرني حالنا حنا وهاللاعبين اللي يمثلون الهلال ؟؟
مثل واحد حب له وحده وساحبه عليه ومهي معبرته ،، الجمهور يدور لاعبين يقدرون حضورهم وحبهم للنادي واللاعبين اسمع من هنا وطلع من هنا ،، مدري وش نسوي علشان يحسون ،، نكتب لوحه مثلاً ( يا ظالمني ما ترتاح راح تعلمك الأيام ) ولا وش نسوي بالضبط ،،
والله العظيم ما عاد فيني ببكي من القهر ،، معقوله هذا هلال يوسف وسامي معقوله هالإحساس المعدوم ،، على فكره جمهور السعوديه كله بدا شوي شوي يكره الكوره ،، والسبب أصحاب السعاده ( اللاعبين ) ،، ما يبون نستورد لعيبه من الهند بعد يلعبون بدالهم ،،
بالعربي وبدون فلسفه الكره السعوديه في خطر ، وبالعربي مره ثانيه اللاعبين شبعوا ،، تدرون وش يعني شبعوا يعني الفلوس نستهم واجباتهم تجاه محبينهم ،، لدرجة أن بعضهم لما يضمونه للمنتخب كنهم خاصمين من راتبه ،، ما عاد فيه أي ولاء لا للنادي أللي طلعه ولا للوطن أللي ينتمي له ،،
أساس الكره السعوديه أصبح هش لأنه على نفس النظام من أيام ما فيه تسلل ،، أعتقد حان وقت الغربله على جميع مستويات الرياضه ،، لابد من دخول القطاع الخاص لتطوير الرياضه ،، لابد من تطوير البنيه التحتيه من ملاعب ومدن رياضيه على أحدث مستوى ،، أعتقد أننا بالمملكه لا ينقصنا المال ليكون لدينا الأفضل ولنكون الأفضل ،،
ورسالتي لجميع الرياضيين بدون إستثناء
من أراد إعلاء رياضة الوطن فأهلاً به ومن أراد أن يكون كالسوسه تنخر في جسد الرياضه فليرحل غير مأسوف عليه ،، يكفي مجاملات على حساب الناس ليعلم الجميع أن هناك عشاق ومتابعين لصغائر الأمور في الرياضه أتمنى منهم أن لا يحاولوا العبث بمشاعر الناس ،،
تحياتي للجميع
