11/12/2011, 02:31 AM
|
 | مدريدي مميز | | تاريخ التسجيل: 05/09/2007 المكان: بيتنا بعد البرنابيو على اليمين
مشاركات: 733
| |
السلام عليكم ورحمة الله وبركاته الف مبروك لعشاق البارسا وتحديدا عزوز  وابو سلطان وحسين وبندر وجميع من يعز علي وجميع عقلاء البارسا وهاردلك لعشاق الملوك جميعا العقلاء وغير العقلاء الحمد لله الذي لا يشكر على مكروه سواه البارسا فاز واستحق الفوز وفريقنا خسر وللخسارة اكيد اسباب +9 كنا متوقعينها ومأملينها فرق نقاط بعد مباراة اليوم طلع رقم 9 صحيح لكنه رقم اللاعبين اللي لعبوا اليوم ضد البارسا لأن الاثنين اللي كنا مأملين فيهم خير كثير خذلونا كثير صاحب اكبر اسيست في الدوري وهداف الدوري خذلونا بصراحة دي ماريا طوال المباراة مطفوق ومستعجل ولا يهدي اللعب ولا يمرر صح وماقدم اي إضافة هجومية مثل الناس وكريس كالعادة امام البارسا فنيلة تحمل الرقم 7 كريس كل المبارايات كوم ومباريات ضد البارسا كوم ثاني اضاع هدفين بشكل غريييييب جدا غير الفاولات اللي في مناطق سهلة وقريبة ويسددها في حائط البارسا المكون من لاعبين قصار الطول وقبل دي ماريا كريس خذلنا المو نمدحه كثير ونقول مورينهو ابخص واحسن مدرب لكن إذا جاب العيد لازم نتكلم شفت التشكيلة قلت المو ناوي يهاجم ويباغت البارسا ويضغط ينهي المباراة من الشوط الأول ويطلع اوزيل ويدخل خضيرة وينهي المباراة حتى الآن الكلام صح لكن اما اشوفه يلعب كونتيراو ظهير ايمن ولاس في المحور بجانب الونسو هنا اوقف واقول لا كيف تبي لاعب في ثاني مباراة في حياته يلعب ظهير ايمن يبدع قدام البارسا!!! وعلى كل اجتهادات كونتيراو الدفاعية واللي مشكور عليها بحكم إنه سوى اللي عليه الهدف الأول هو اللي كاسر التسلل والهدف الثالث ماغطى فابريجاس صح عندك اربيولا المبدع دائما قداما البارسا وعندك لاس وتروح تلعب كونتيراو ظهير ايمن الأهم من هذا كله انت قتلت جهتك الهجومية في اليمين بوضع لاعبين خلف بعض كلهم يلعبون بالقدم اليسرى !!! وهذا اللي خلى بيب يلعبها صح وينزل الشوط الثاني ب 3-5-2 قدم الفيس ولعب بثلاث مدافعين وخلى اكزافي وميسي وبوسكيتش يميلون كلهم يمين عشان يضغطون على جهة مارسيلو وكريس حتى مايهاجمون ومع ذلك كانت هذه الجهة هي مصدر خطورتنا كلها من الناحية الثانية الجهة اليسرى للبارسا مرتاحة تماما وانييستا لحاله مكفيها وماخذ راحته قدام كونتيراو المفروض المو اما شاف النظام بالشكل هذا يغير خانات دي ماريا مع كريس دي ماريا دائما يفشل قدام ابيدال والعكس قدام الفيس وكريس عكس دي ماريا فاشل قدام الفيس ممتاز قدام ابيدال ولاحظ المو متأخر هذا الشيء ونقل البنز يسار وكريس يمين وهيقوين راس حربة ويكمل شكل المعين كاكا الغريب في الموضوع إن دائما بنزيما وفي الوقت البسيط اللي يلعبه في الجهة اليمنى للبارسا يكون اخطر من كريس اللي يلعب طوال المباراة هناك الشيء الوحيد اللي ينحسب للمو اليوم هو إن تغييراته كلها كانت صحيحة او بمعنى اصح لتصحيح خطأ بداية التشكيلة ولكن باختصار بيب تفوق بجدارة على المو في المباراة هذه اخيرا نقطتين تعلمنا من بداية تشجيعنا للكورة إن اللي مايسجل يقبل اضاع كريس هدف سهل بعد تمريرة البنز له واستعجل وسددها في آخر الدنيا بعدها جاء هدف سانشيز اضاع كريس كورة عرضية قدام المرمى من الونسو وكان معاه راموس بعدها سجل فابريجاس واللي ماعمل شيء طوال المباراة إلا تسجيله هدف ورجعت نفس مشكلة مباراتين السوبر اهداف وهجمات غريبة تضيع من الفريق يقابلها استغلال رهيب للفرص من البارسا النقطة الثانية قالها طارق ذياب في الاستوديو بين الشوطين الريال لا يستيطع التصديق إنه قادر على الفوز على البارسا وهذا شيء صحيح وواقعي جدا للأسف وش اكثر من إنك تسجل هدف بعد 25 ثانية قدام البارسا في ملعبك وبعدها تخسر بالثلاثة معناها إنك انت مو مصدق إنك تقدر تفوز على البارسا حتى لو كنت افضل منه البارسا كان ضايع إلا تسجيلهم هدف التعادل وكنا قادرين ننهي المباراة بدري بدري لكن استعجال دي ماريا الغريب وثقة كريس المعدومة في هذه المباريات وعدم طلب المو من الفريق بأنه ينهي المباراة بدري بدري ويواصل الضغط ولا يعطي الفرصة للبارسا إنه يتنفس كلها امور تخليني اقتنع إن الفريق ماهو مصدق إنه قادر يفوز وإن البارسا فريق كورة قدم جاي من الأرض وليس المريخ ذكروني بالطالب المذاكر ويجيه اختبار سهل ويحله كله بعدين يقول لا مستحيل انا احل الاختبار كله لازم فيه شيء غلط والأسئلة في إن وماهي سهلة ويرجع يغير اجاباته كلها وفي الأخير يفشل ويسقط عزائي الوحيد إن الدوري مازال في يدنا ونقدر نرجع للصدارة من مباراة اشبيلية مرة ثانية الحمد لله والشكر على كل حال فاز من استحق الفوز وخسر من استحق الخسارة للجميع  |
