السلام عليكم و رحمة الله..
معلقنا الحبيب..
صحيح عندك خامة صوت جيدة.
و صحيح أننا أعجبنا فيك في بداياتك.
لكن حط في بالك أننا أعجبنا فيك لأنك جيت بعد ناس كنا نتمنى نشوف المباريات بدون معلق و لا نسمع أصواتهم.
يعني لا تصدق روحك، ترى لسى قدامك كثير.
و بعدين ترى رحت و الا جيت، ترى تظل معلق.
يعني لا تحاول تسوي فيها الشتالي على غفلة.
و لا تسوي فيها كولينا زمانك.
و لا تنسى إننا جمهور عربي، يعني مهوب لازم أسماء الشهور بالإنجليزي، و تجدع لك كم كلمة منا و مناك، ترانا ندري إنك داج، و نتمنى إنك بس تترفق بالعربية الفصحى و لا تكسّرها.
و لا تقعد تنتقد هذا و ذاك و كأنك من أوصل الدوري الإنجليزي لما وصل إليه بعدما كان يلهث خلف الدوري السعودي.
و يا حبذا بعد ما تحاول تقوم بأدوار حقوي، يعني لا يضيق صدرك إذا ضيع فريقك فرصة، أو سجل خصمك هدف، ترى المفروض تكون محايد.
و ترى مهوب لازم نعرف مقاس كنادر اللاعب، يعني مهوب لازم تستعرض عضلاتك الثقافية الجوجلية.
معلقنا الحبيب،
أرجوك شاهد مباراة بتعليق أي معلق انجليزي، عشان تدري أن التعليق مهوب صراخ.
طيب خلنا من الإنجليز، الإنجليز باردين. تابع أيمن جادة أو محمد علي. بس ترى ما راح تستفيد إذا كنت تتابعهم على إنك أنت الأستاذ و هم التلاميذ. لازم تخلي نفسك تلميذ بس هالمرة علشاننا.
و السلام ختام..
