|
فضفضة بيني و بيني بخصوص حالة منتخبنا الأخضر ...!!!
بسم الله الرحمن الرحيم
أنا بطبعي قليل الكتابة لأن و بكل أمانة و وضوح لما أقول رأيي اللي يعبر عني ألقى ناس تهاجمني على مجرد رأي ...!!!
عموما ً اللي بيهاجم أو يمدح لا ينتظر إني برد عليه لأن من الحين أقولها ما راح أرد إلا على الأسئلة اللي أشوف إنها في صلب الموضوع و منطقية يعني بالعربي و بالفم المليان ( نعم للنقاش ,,, لا للجدال ) ...!!!
مجموعة نقاط أقولها بيني و بين نفسي و للمرة الألف أعيد و أكرر تعبر عن رأيي الشخصي يعني منكم من يوافقني و منكم من يختلف معي و على بركة الله ابدأ فضفضتي اللي هي بالأساس بيني و بيني ...!!!
* يا صاحب السمو الملكي , يا أمير الشباب و الرياضة , أتمنى تكون صارم مثل والدك رحمة الله عليه ...!!!
* يا الحبايب اللي شغّالين تحت منظومة الإتحاد العربي السعودي للرياضة و بالتحديد أصحاب كرة القدم إبعدوا عنكم الألوان و ركزوا على مصلحة الكرة السعودية و المنتخب قبل أي شي ثاني ...!!!
* إعلامنا الحبيب إلى متى و إنت يا فوق يا تحت يعني ما تعرف الحل الوسط ؟! ترى تعبنا كل ما فاز منتخبنا خليتوه أفضل العالم و إذا إنهزم شرشحتوه ...!!!
* خلك معاي يا الإعلام هالنقطة لك بعد لكن نسيت أقولها باللي قبلها لأني عصبت عليك شوي , المهم أنا ألاحظ على بعض الكتّاب الرياضيين و النقاد و المحللين يتكلمون على تشكيلة المنتخب و ليش لعب فلان ما لعب فلان أو اللي يقول فلان لاعب حواري و فلان بارد و فلان فيه و فيه يا أخي إنت لو كلامك منطقي و منه فايدة ما كان ناديك مسكك الباب و على شاكلته الكثير و الكثير اللي أتمنى إن إعلامنا الرياضي يتخلص منهم و أعتقد إن وزير الإعلام نايم فـ العسل و مسوي فيها حرية القلم .. أي قلم اللي دمر لاعب و فريق و حكم و إداري و منتخب و إتحاد كرة بكبره ؟! نبي وقفة صادقة مع المنتخب لا تعمي عيونكم يا الإعلامين ألوان أنديتكم حنا نختلف بالأندية و نتفق على حب المنتخب ...!!!
* عزيزي المشجع الرياضي السعودي ... للمعلومية 90% من جماهيرنا ما درى عنهم برشلونة و ريال مدريد و المان يونايتد و فرق آوروبا الكبيرة ولاّ كان أخذوا منهم محللين و مدربين و مساعدي مدربين ... للأسف و بكل أمانة ( و اللي بيزعل أقول له : مع نفسك حبيبي ) الغالبية العظمى من جماهير المنتخب اللي يحللون و ينتقدون و يتكلمون يشوفون المنتخب و يتابعونه لواحد من سببين ... علشان يتابع لاعبي فريقه المفضل , و الثاني علشان يتصيّد على لاعبي الفريق المنافس لفريقه ...!!!
* واحد يقول فرانك ريكارد فااااااشل ... طبعا ً هذا لا تعليق و موضوعه منتهي ما يبي له نقاش ههههه ...!!!
* واحد يقول الإتحاد السعودي يتحكمون بالمدرب ريكادر و يفرضون عليه التشكيلة و السبب يا إنه علشان ما ضم محمد نور أو لأنه ما جاب لاعبين من الدرجة الأولى ...!!!
* الأخ هذا أنا بقول له كلمتين فقط لا غير : بدأ الدوري عندنا أصلا علشان المدرب يشوف؟ ...!!!
* صراحة جمهورنا سوالفه بالهبل و للسبب هذا راح أترك الكلام عنهم لأن بعض الحكي تركه أبرك من الكلام عنه ...!!!
* أنا لو لي سلطة بالإتحاد السعودي أو المنتخب كأن أطبق الثواب و العقاب على طريقة الأمير فيصل بن فهد رحمة الله عليه بحذافيرها ...!!!
* كان الأحرى إن التعاقد مع ريكارد يكون بداية فصل الصيف و يكون تجمع المنتخب قبل بداية التصفيات بفترة لا تقل عن شهر كحد أدنى منها يتعرف المدرب على اللاعبين و يعرف إمكانيات كل لاعب ...!!!
* كان الأحرى بالأستاذ خالد المعجل إنه يطرح أسماء جديدة على المدرب منذ التوقيع لعل و عسى أحد منهم يعجب فيه المدرب و يضمه للتشكيل و يكون هو العلامة الفارقة ...!!!
* الشخص لما يجي في مكان و يكون جديد على المكان يحاول قد ما يقدر إنه يلمع و يتألق و يبدع فيه و يثبت وجوده و هالشي كان بيكون لو ضمينا لاعبين جديد على المنتخب ...!!!
* أتمنى أتمنى أتمنى في حال لا سمح الله إننا خرجنا من التصفيات يتم إبعاد كل لاعب ما قدم مستوى و يتم ضم مجموعة كبيرة من منتخب الشباب اللي شارك بكأس العالم في كولمبيا ...!!!
* دام إننا طالعين طالعين و بنتايج غير مرضية على الأقل بمجموعة الشباب تكون الصدمة أقل و أرحم و فوق هذا يستفيدون الشباب من الإحتكاك مع منتخبات كبيرة و قوية و هالشي راح يكون له مردود ممتاز للمنتخب في السنوات القادمة ...!!!
* النقطة الأخيرة و اللي أتمناها من كل قلبي إني أكون مدرب المنتخب السعودي ... يمكن كثير منكم راح يضحك لكن أنا عن نفسي راح أشتغل لإسعاد جماهير عانت و لكن لم تعاني من المنتخب كثري ...!!!
* لو كنت المدرب و بناءاً على الأسماء المتواجدة حاليا ً في تشكيلة المنتخب راح أقول لكم الخطة اللي بلعب فيها :
طريقة اللعب : 2 - 2 - 1 - 1 - 4
و التشكيل راح يكون بالأسماء التالية:
حارس المرمى : حسن العتيبي
قلبي الدفاع : أسامه هوساوي و أسامه المولد
الظهير الأيمن : حسن معاذ
الظهير الأيسر : عبدالله شهيل
محور الإرتكاز الثابت : سعود كريري
محور الإرتكاز المتحرك : أحمد الفريدي
صانع اللعب على الجهة اليمنى : تيسير الجاسم
صانع اللعب على الجهة اليسرى : محمد الشلهوب
رأس الحربة المتحرك : ياسر القحطاني
رأس الحربة الثانب داخل الصندوق : نايف هزازي
* كانت هذي فضفتي مع نفسي و أرحب بالنقد البناء و النقاش العائد بالفائدة و لن أعير المجادل أي إهتمام
دمتم بود  | 