سموا مرة ثآنية
على بركة الله نبدأ

تحذير: أي شخص خوّاف - مثلي - يطلع طوّالي


المهم مدري من وين جتني الشجاعة وانا انا اكتب هالموضوع اخبرني أكبر شخصة
خوافة بالعالم اجمع لدرجة إني يمكن أصير ميسية > تأنيث ميسي ؛ دلاله على السرعة
والمهارة في الاختراقات كني خبصت ماعلينا ...

المهم وانا امس افرفر ع النت اشوف وش قصة حي الخزامى اللي بالرياض لأن في موضوع
عن لاعب وكذا يعني - محظورة - وبالغلط خشيت على موضوع يتكلم عن مستشفى عرقة
اللي يقال انه مسكون وقد سمعت هالسالفة قبل بس طراطيش بحكم اني من الشرقية

قلت خلني اخش ع الموضوع واسمع قصص من راح واللي ان كانت صدق والا تأليف
الحبكة خلت ام وابو الركب يجوني 2 في 1

اللي يقول مرة راحوا فرادى وجماعات وجتهم هستيريا من الخوف وركض
ماتشوف الا غبار(ن ) وراهم واللي يقول كاسة الشاي يطلع
منها بخار كنه تو مسويينه وجريدة الرياضية تاريخها من ثلاث شهور ووكذا
المهم سواء كانت القصص صحيحة او لا الردود جت فيفتي فيفتي من قال صحيح
ومن قال لا ... لكن اللي شدني كلهم شافوا الحارس والاصل مابه حارس
على حد قول الشرطة وكلهم اجمعوا ان وجهه يخوف

الزبدة .. هالحوادث ذكرتني بقصص من ناس اعرفهم او احداث قد صارت لنا ...

** القصة الاولى /
قد قلتها مسبقاً .. مرة اخوي يوم اني بمتوسط عطاني هدية قطوة لا ضغطت على يدها
تموووء > يعني تقول ميآو لا وعيونها تولع اخضر
كنت اخاف منها كذا وبس جا يوم حطيتها في نملية > اي طاولة التلفزيون
وتعرفون في دولاب ع اليمين واليسار زجاجية > حقات اول حطيتها فيها
فجاة بالليل مريت قالت ميييييييييييييييياو وولعت اخضر ,, وانا دوروني ماتلقوني
.. ماادري من دخلها غرفة اختي الظاهر كان فيه احد يلعب فيها
راحت اختي ورمتها فوق دولابها جلست مفزوعة بالليل على صوت هالقطوة وعيونها تخوضر

نامت اختي بعدها ماعندها مشكلة يوم جا الصباح علمتنا قلنا لازم نشيل البطارية
المفاجأه >>>>>>>>>> مافيها بطارية

انا جتني ام الركب بسم الله الرحمن الرحيم الظاهر بعدها جمعنا كل الدمى وحطيناهم بكرتون
ووديناهم مدري وين المهم طلعوا من البيت

سبحان الله وقتها كانت معلمة دين عندنا بالمدرسة كانت تقول يابنات لاتخلون دمى عندكم بالبيت
وحده من اللي تعرفهم جلست فجأة بالليل شافتهم يتحركون يممممممممممممة


** القصة نمبر تو : وحده من زميلاتي ايام الدراسة كانت تقول بيتهم مسكون
تقول / يجون على شكل اهلها ؟؟؟؟؟؟؟
كيف عرفت ؟ تقول خواتها كل يوم يجون يجلسون عندهم بحكم انهم بيت الاهل وكل ماراحوا
تشوف بنت اختها الصغيرة في الدور الثاني تطالع فيها وتبتسم , الحين هم راحوا وشلون جت ؟
عاد عرفت انهم هم ومو اول مرة دايم كذا حتى تركوه والحين بنوا مكانه بقالة والحين
رجعوا سكروها مدري ليش ؟؟ بسم الله الرحمن الرحيم


** نمبر ثلاثة : اخوي توفى يوم انا بصف ثالث ابتدائي في حادث الله يرحمه ويسكنه الجنه
المهم في عزاه جت وحده عزت امي ومشت قالت اختي لامي من ذي ماعرفتها ولا احد عرفها ولاقد شافوها
راحت اختي تلحقها مالقتها ,, بعد فترة حلمت اختي ان هالمرة جتها بالحلم وعزت اختي
وقالت لها انا اللي جيت بيتكم وابشري ان شاء الله اخوك بالجنة
ماادري هذا وشو صراحة مو مستوعبة ...؟؟

** 4 : اختي عندها صديقه بها مس واختي ماشفت اشجع منها
كانت تدرس برا الشرقية المهم مرة من المرات اللي في خويتها تكلم ومدري ايش
قامت اختي بتتكلم هو قالها روحي قولي لفلانه الفلانية وعلميها اول ترى اللي تسويه
موب زين وعقب ماجت اختي واستفسرت طلع الكلام صحيح

** : هدف رادوي في النصر : وحده تقول عن خويتها دايم تنام وتترك ولدها يصيح
فجاة جاوا صغار بالحلم يقولون لها سكتي ولدك قبل لاياخذونه وراحت وسكتته

** : دول الخليج بدون العراق واليمن : خويتي تقول كل ماسافروا ورجعوا
يشمون بيتهم ريحة لحم ورز ذبايح


على طاري دول الخليج امي تقول قبل ماتجيبنا راحت مع ابوي عمان يوووه
من سنيــــــــــــن بحكم انهم شآخوا الله يطول في اعمارهم .. المهم راحوا عمان وهناك في مدينة
بها سحرة وكذا وترى عمان مشهور بالسحر والشعوذه مروا عليها تحلف تقول يشوفون الساحرات يطيرون
بعصيهم


سموا مر( تن ) ثالثة ...
لا شفتوا قطاوة لا تطقونهم جدي طاح بالمستشفى على قولة ابوي والسبب انه ضربها
وظل على هالحال حتى توفى الله يرحمه ..


على طاري البسس > على قولة دلوعين الرياض
عندنا في بيتنا حديقة كنت اتمشى فيها بالفجر واشوف ذاك القطو الكبير اللي يخز
فيني انا خفت واتذكرت الرسول عليه الصلاة والسلام - يوم يقول اخرجي والا قتلتك ثلاث مرات
للافعى يبدو ان خرجت فهي من الجن والا فلا .. المهم انا قلتها مرة وحده والثانية ماامداني اقول اخـ ..
الا والغبار طلع من تحت رجيلاتي



الله يحفظنا ويحفظكم مع اني دايم انسى المعوذات الا مارحم رحبي
انا اقول آيه الكرسي في الطبيعة بسهولة لكن بالحلم لا حلمت فيهم قسم بالله
بالموت انطق حرف حرف



ماقصدي من هالموضوع اخوفكم لكن تذكيركم وتذكير نفسي بالاذكار ....
كنت بنزّل الموضوع 12 بالليل > نذالة لكن جتني عايلة الركب ,, قبل لا انسى الله يذكر
دوق فيلد كآن مو مقتنع بسالفة المس عسى بسى ماينكر هالموضوع الوشسمه ...




ملاحظة / من يومين كنت حاطة ع الحرم شفت لوحة بالتوسعه
مكتوب فيها ..... مدري الجن ؟؟
عاد سألت اختي قالت هذا يوم الرسول يقرأ قرآن والجن يستمعون له في الوادي اللي نزل فيه
عليه الصلاة والسلام .. { قل اوحي إلى أنه استمع نفر من الجن ........ }

مثلنا يآكلون يشربون يتزوجون .. مسلمين .. مسيحين .. كفار .. سعودين اماراتيين
مخلوقين من نار السموم وبالتالى يغلب عليهم اللطف اى الاختفاء وامكانية التحول من شكل الى اخر.

اختلف العلماء في علاقة إبليس بالجن والشياطين على ثلاثة أقوال هي :

الأول : أن إبليس هو أبو الجن مؤمنهم وكافرهم ، وكفارهم هم الشياطين وعلى هذا فإبليس هو أصل الجن والشياطين ومصدرهم .

الثاني : أن إبليس هو أبو الشياطين وأصلهم أما الجن فإن أصلهم هو الجان الوارد ذكره في قوله تعالى (( والجان خلقناه من قبل من نار السموم ))

الثالث : أن إبليس ليس هو أبا للجن ولا للشياطين وإنما هو واحد من الجن بدليل قوله تعالى : (( إلا إبليس كان من الجن ))


ففي صحيح البخاري عن أبي هريرة ـ رضـي الله عنه ـ أن النبي صلي الله عليـه وسلم ـ أمره أن يأتيه بأحجار يستجمر بها ، وقـال له: " ولا تأتيني بعظم ولا بروثة"

ولما سأل أبو هريرة الرسول صلى الله عليه وسلـم، بعد ذلك عن سر نهيه عن العظم و الروثة ، قال:"هما من طعام الجن ، وانه أتاني وفـد نصيبين ، ونعم الجن ،فسألوني الزاد ، فدعوت الله لهم : ألا يمروا بعظم و لا روثـة الا وجدوا عليها طعاما" .

قال أبو هريرة رضي الله عنه : وكلني رسول الله بحفظ زكاة رمضان ، فأتاني آت فجعل يحث من الطعام ، فأخذته ، و قلت : و الله لأرفعنك الى رسول الله صلى الله عليه و سلم ، قال: أني محتاج، و علي عيال ، و لي حاجة شديـدة، قـال: فخليـت عنـه ، فأصبحت فقال النبي صلى الله عليه و سلم" يا أبا هريرة ، ما فعل أسيرك البارحة ؟"
قال: قلت: يا رسول الله شكـا حاجـة شديدة و عيـالا ، فرحمته، فخلـيت سبيلـه، قال " اما انه كذبك و سيعود "، فعرفت أنه سيعود لقول رسول الله صلـى الله عليـه وسلم انه سيعود ، فرصدته ، فجاء يحثو مـن الطعـام فأخذته ، فقلـت :لأرفعنـك الى رسول الله صلى الله عليه و سلم ، قال: دعني فاني محتـاج ،و علـي عيـال ، لا اعود ، فرحمته ، فخليت سبيله، فأصبحت ، فقال رسـول الله صلى الله عليـه و سلم :" يا أبا هريرة ، ما فعل أسيرك؟" قلت : يا رسول الله شكا حاجة شديدة و عيالا فرحمته . فخليت سبيله قال:" اما انه كذبـك و سيعود" ، فرصدته الثالثـة ، فجـاء يحثو من الطعام ، فأخذته فقلت : لأرفعنك الى رسـول الله صلى الله عليه و سلـم ، وهذا آخر ثلاث مرات أنك تزعم لا تعود ، ثم تعـود ! قال: دعنـي أعلمـك كلمات ينفعك الله بها ، قلت ما هـي؟ قـال: اذا أويـت الى فراشـك فاقـرأ آيـة الكرسـي (الله لا اله الا هو الحي القيوم) حتـى تختم الآية ، فانك لن يزال عليك من الله حافظ ، و لا يقربك شيطان حتى تصبـح ، فخليـت سبيله، فأصبحت ، فقال لي رسـول الله صلى الله عليه و سلم:" ما فعل أسيرك البارحة ؟" قلت : يا رسول الله زعم أنه يعلمني

كلمات ينفعني الله بها فخليت سبيله ، قال:" ما هي ؟ " قلت: قال لي : اذا أويـت الى فراشك فاقرأ آية الكرسي من أولها حتى تختم ( الله لا اله الا هـو الحـي القيـوم )، و قال لي : لن يزال عليك من الله حافظ ، و لا يقربك شيطان حتى تصبح، و كانـوا أحرص شيئا على الخير ، قال النبي:" أما انه صدقك و هو كذوب ، تعلم من تخاطب منذ ثلاث ليالي يا ابا هريرة ؟ " قال: لا ، قال: " ذاك شيطان " .


الله يحفظكم بحفظه .....