نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - || رابطة زعيم إسبانيا وأوروبا " البلوغرانا " لـ موسم 2011-2012 ||

P.Guardiola · #2425 01/09/2011, 06:03 AM

إقتباس

الرسالة الأصلية كتبت بواسطة عاشق ســ6ــام


	السلام عليكم ورحمة الله صباح الخيرات و الليرات صبآحكم عيد شباب الرابطة مليانه اخبار و لكن مآ فيه تفاعل نبي نقاشات وحركة في الرابطة وش رايكم كل يومين نناقش بعض النقاط علشان يصير في تفاعل عندنا و يسمح لي الرئيس و نائب الرئيس عندي كم نقطة ودي نناقشها

وعليكم السلام ورحمة الله وبركاته ..

عيدكم مبارك .. وينعاد عليكم وعلى الامة الاسلامية بخير ! ومن المقبولين إن شاء الله ..

ما فيه مشاكلة سعد .. الله عنده وجهة نظر وحاب يناقشها بس يسدحها هنا وإن شاء الله يتفاعلون الأعضاء مع النقاشات ..

س / وجهة نظرك بالخطة الي لعبنا فيها قدام فياريال 3-4-3 ...؟

الخطة موب شينه ابد خصوصاً في الاندية المتوسطة والضعيفه .. لكن صعب تلعبها مع فريق هجومي ويقدر يجاريك في الهجمات المرتدة لأنها بتشكل خطورة كبيرة على الحارس ! لاحظت لقطة فقط من فياريال أستغلها ولعبها صح وشكلت أكبر خطورة على المرمى ! يعني هالتشكيلة ما تقدر تلعبها ضد أندية قوية مثل الميلان والا الريال او المان .. وعلى فكرة فياريال في تلك المباراة ما شفنا له هجمات منظمة وكان مشتت بالمره والا كان شفنا سلبيات الخطة !

س / ايهما تفضل 4-3-3 او 3-4-3 ...!؟ ولماذا .......؟

بالنسبة لي وبنظرتي للمباراة ضد فياريال أفضل 4-3-3 هي الأفضل والأجمل والأمثل

.. البعض بعد مجيء فابريغاس يعتقد بأن بيب جوارديولا سيلعب في أربعة لاعبين وسط , لكن بعد مباراة فياريال ما اتمنى من بيب يرجع لهذه الخطة ولا هي مناسبة ابد الا عاد إذا بيكون أربعة لاعبين دفاع والهجوم اثنين نشوفها وبعدين نعطي رأينا

!

س / مع او ضد بقاء ما كسويل ..؟!

ما فرقت معي بيجلس حياه الله بيروح حفظه الله .. اشوفه أسوأ لاعب بالدفاع بعد ميليتو في الموسم الماضي لكن هالموسم الظاهر هو الأسوأ

.. لكن إذا طلع لزوم الإدارة تشوف لها مدافع بديل هالميركاتو الصيفي خلص لكن الشتوي جاينا !.. ماكسويل لاعب عادي ولا هو اللاعب اللي تعول عليه في بعض المباريات !

س / بعد تقريباً 5 مباريات رسمية ماهي التشكيلة المثالية بوجهة نظرك ..!؟

ما تقدر تحكم على اللاعبين في بداية الموسم وفيه بعض اللاعبين ما لعب مع ألا مباراة أو مبارتين وصعب تقارنه مع باقي اللاعبين .. لكن انا بأحكم على مستوى اللاعبين في مباراة السوبرين ضد الريال وبورتو !

فالديس
أبيدال ... بيكي ... ماسكيرانو ... ألفيس
بوسكيتس
فابريجاس ... تشافي
إنييستا ... ميسي ... بيدرو

هذي رؤيتي لمستوى اللاعبين في السوبر الإسباني والأوروبي فقط .. دافيد فيا وسانشيز وباقي اللاعبين لحد الآن ما قدموا للفريق أكثر من اللاعبين الموجودين في التشكيلة ... بعلق عن وضعي لبيدرو وافضليته على فيا وسانشيز والاخير خصوصاً بيدرو تقريباً مستواه يقرب من الاثنين لكن أنا فضلته بسبب تحركاته بدون كرة تفك لك شفرة اي دفاع بالعالم , وأنا اجزم أن بيب جوارديولا يعتمد على بيدرو في كثير من المباريات بغض النظر عن مستواه لكن بسبب تحركاته بدون كرة يسحب لك أي مدافع ويشتت تفكير الدفاع اللي قدامه ويترك باقي المهمة لميسي ورفاقه للتسجيل ! تطربني يا بيدرو