اسمحوا لي شوي باحكي قصة بدايتي مع عشق اليوفي

منيب مستحي لما اقول ان بداية حبي لليوفي كان من البلايستيشن
لما كان الفريق يمتلك اساطير بكل مركز وتشوف كل لاعب عنده مالا يقل عن 3 - 5 مهارات كلها 19 على آخر شي <-- اتكلم عن الدوري الياباني حق بلايستيشن 1

تحس بالفخامة والعظمة لما تختاره وتصقع الاندية الكبيرة الثانية ميلان ومدريد وليفربول وارسنال الخ من اللي طاقاتهم عالية ذاك الوقت

وطبعا وقتها ما كنت اعرف ولا شيء عن الفريق , لا تاريخ ولا امجاد ولا بطولات
ماكنت ادري ان هالفريق متسيد ايطاليا طول بعرض وله صولاته وجولاته العالمية

كنت ما اعرف غير السكواد اللي بالبلايستيشن ( حافظ اسمائهم صم ذاك الوقت )
واكثر واحد جذبني واحد يلعب بالمحور وطويل وانيق ويلعب بثقة وتدخلاته الهوائية والأرضية محسومه له وصاحب تسديدات سم ( تاكيناردي )
وواحد خال قصير وسريع وبثر وعليه رجل مب صاحية بس الوزنية معدومة ( ديفيدز )

كتب الله ودشنت القناة الرياضية السعودية - وكانت في بدايتها افضل بكثير من الآن -
ومن حسن حظي انهم كانوا ينقلون بعض مباريات الدوري الإيطالي
جيت مره قبل وقت النوم فتحت التلفزيون على الرياضية
الا والله القى فريق طقمه نفس فريق البلايستيشن اللي العب به
جلست اتمقل بالفريق ولاعبينه
وشوي الا والله هذا ديفيدز هو وشوشته ولا بعد لابس نظاره زي البلايستيشن
وهذا ديل بييرو وبوفون ونيدفيد والتاكي
الزبدة تسمرت عند التلفزيون وبديت اطلع اللاعبين من حفظي لأساميهم واشكالهم بالبلايستيشن واحد واحد وكنت متلذذ بشكل غير طبيعي
وكذلك كنت اسمع المعلق وقتها وهو يتغنى ويتغزل باللافيكيا سينيورا وانجازاتها ولاعبيها

الزبدة ما اقدر اوصف لكم شعوري وقتها كأني طحت بكنز كبيييير
يعني وقتها ماعندي نت ولا كان عندنا دش من أصله
مافيه غير سامي الجابر والتيماوي والثنيان والمباراة نص بالقناة الاولى واذا جت الاخبار حولوا القناة الثانية

فيعني اعتبر نفسي من ذاك الوقت وانا معجب بالفريق , وسبب اعجابي بالفريق وتمسكي فيه بالبلايستيشن من المره الأولى هو التاكيناردي

هذي سالفتي باختصار وسلامتكم