الحل يا عزيزي .. إن الأنديه تترك عنها التبذير وصرف الملايين في لاعبين الفريق الأول ..
وتصرف الملايين لتطوير القاعده وترميم الملاعب الخاصه للأنديه علشان تكون مناسبه .. وتركز على صقل مواهب الأشبال .. وتعطى الفرصه للاعبي الأولمبي ..

موب تدفع للاعبين اقل مايقال عنهم إنهم عاديين .. مثلاً تدري إن الشباب مشتري وليد عبدربه بالملايين وهو لعبه والله مايسوى ميتين ألف .. !!
على فكره الشباب كان مضرب المثل في تفريخ المواهب في كرة القدم .. وألحين صار مثله مثل الهلال والإتحاد .. ثلاث أرباع لاعبيهم .. لاعبيين جاهزيين ..

ومثال ثاني .. الهلال دفع ثلاثة ملايين في فيصل الجمعان .. ومدري كم مليون في وليد الجيزاني .. وبالله احكم على مستوياتهم وعلمني إذا يستاهلون المبلغ المدفوع أو لا ..

عقود اللاعبين بكل بساطه وصلت لأرقام فلكيه .. ولازم الرعاية تضع سقف أعلى لأجور اللاعبين السعوديين لا يتعدى المليون ونص في السنه شامل الرواتب .. يعني أحسن لااعب هذا ياخذ هالمليون ونص .. وتخب عليه ويحمد ربه .. علشان يقتنع اللاعب السعودي برواتب أقل ويصير احترافه في الخارج واقع ..

بالله وشلون تبي اللاعبين يحترفون برا وهم ياخذون دبل الدبل وهم عند اهلهم .. وإلا وشلون الأندية الخارجيه بتتجرأ تطلب لاعبين وهي عارفه إنها مغامره تدفع لهم نفس المبالغ إلي يتقاضونها .. هذي من اسباب عدم احتراف اللاعب السعودي ..
شف مصر كيف اللاعبين المحترفين في الخارج .. ومع ذلك مافقدتهم انديتهم .. بالعكس طلعوا لاعبين غيرهم ..
لا نروح بعيد .. شوف الأردن .. صار عندها لاعبين محترفين في أندية اوربيه .. وحنا ماعندنا إلا ناجي مجرشي .. وماندري كيف اموره ..

الخيار الثاني إلي لازم يطبق .. هو تقليص عدد التعاقد مع لاعبين أجانب إلى اثنين كحد أقصى .. علشان يصير اختيار اللاعبين الأجانب في الخانات إلي يحتاجها الفريق بشده ولا تصير الدعوى خنبقه ..

تبيني اقولك ليش هالخيار المفروض يطبق .. واجيب لك مثال حدث لنادينا ..
تذكر أول ماجانا رادوي ..مع إني ما اختلف في نجومية رادوي وإنه حببنا فيه .. لكن وقتها تعتقد الهلال كان يحتاج لاعب اجنبي في خانة المحور ؟؟!!
ابد ماكان يحتاج .. عزيز كان ماشي زي الحلاوه ومع عمر الغامدي والغنام والبرقان ..
وجية رادوي خلقت لنا ضعف في هالمنطقه وصرنا نعاني إذا غاب رادوي .. بعد انتقال عمر الغامدي .. وبزوطة خالد عزيز .. وصرنا نحط الشلهوب محور !!!

لازم الأندية تتكاتف وتنفذ خطوات تصحيحيه وتعدل فكرها وتصرف اموالها على القاعده .. لأن الأندية هي نواة المنتخب .. وهذا يدل على ضعف الأنديه ..

بالنهايه .. نقطة ثانيه أبي أشدد عليها وهي .. ترك الواسطه في الفئات السنيه .. مثل ماذكر احد الاخوان في الردود إلي قبلي .. واعتماد التقييم على الموهبه ولا غيرها .. يعني حركات ولد عمي وولد فلان عزيز عليه مانبيها ..
صدقوني .. صقل المواهب يبدا من هالمرحله .. ياما يطلعون لنا لاعبيين للفريق الأول .. مايعرفون يثبتون كوره وحتى استلامهم للكوره تعرف إنهم يا لاعبيين فاشليين وجايين واسطه .. أو ما تأسسوا زين في المراحل إلي قبل ..

هذي اقتراحاتي إذا كنتوا تبون تلحقون على الكوره السعوديه .. غير كذا يفتح الله على رياضتنا ..