| طبعا هذه الأسئلة في زواج الاقارب مو موجودة
بس اذا البنت جاها نصيبها من بره عادي هذه الاسئلة بس
اذا عرفت انها حتسكن بعيد يعني في منطقة غير منطقة اهلوه
اتوقع مافيها شئ اهم شئ اخلاق الزوج كيف ؟؟؟؟
والله انا عن نفسي اهم شئ زوجي واهل زوجي مايهمني الا
خالي وخالتي ويابخت من زار وخفف اهم شئ اخلاقي طيبة
معاهم مالي صلاح في اخواتوه ولا اخوانوه حتى لو كانو كويسين
ماراح يعيشوه معانا
اما المهر فااحنا الحمدلله تقريبا بين 25 و 30 يعني انا مهري 30
صح هوا يادوب يكفي انتا تعرف عشان البنت تشتري ذهب لدبشها
يبغالها اقل شئ 15 تخيل انو 3 حبات بناجر قيمتها 4 الآف
ونص والذهب مره مرتفع ولاتقولي مو لازم تدري انو البنت اذا
دبشها مافي ذهب كبيره في حقها وحق اهلها قدام اهل العريس
بيقولوه وين راح مهر ولدنا
اما عن تكاليف الزواج تصدق قبل كونت اقول هذولي الناس تبالغ
ايش 70 او 100 التكاليف بس لما عشت التجربة من جد قولت
الله يعينكم الولد اذا كان يبغى يتزوج يجلس اقلها سنتين عشان
يجمع وكمان يجمع ع حسب راتبوه اذا حاب انو يتزوج بدون
قرض وهوا الاحسن عشان يرتاح بعد الزواج وهذا كان شرطي
انو قرض ماياخذ لو الخطوبة تجلس سنتين بس قرض لا
لانو ماعندي استعداد بوكرة يجي يقولي انا جالس اسدد قرض
زواجنا
والله العظيم احنا بس اثاث غرفتين ومطبخ وتكاليف زواج يمكن
في حدود 80 وكول شئ كان بااسعار معقولة ومو مبالغ فيها
يارب بس يبارك ويتمم ع خير ع كول اللي راح يتزوج
تحياتي لك اخوي ولموضوعك
 | 