إقتباس الرسالة الأصلية كتبت بواسطة PUYOL Carles اللاماسيا موجوده قبل كرويف .. وكرويف ماله شغل في تأسيسها فيه ناس كثير استفادوا من مدرسة النادي قبل كرويف ، واقرب واحد قبل كرويف ، تيري فينابلز وهالشي كان في منتصف الثمانينات ، يعني قبل مجئ كرويف تقريبا بخمس سنوات او اربع الفرق ، مع كرويف صار فيه نظام مشترك وموحد مابين الفريق الأول والمراحل السنيه .. ومن هنا اتت الاستفاده مع الوقت اعتقد ما هو بالشئ السهل انك توحد نظام مابين الفريق الاول والمراحل السنيه .. لما تشوف مدرسة النادي الا بالارجنتين والا باسبانيا والا في خرخير كلهم يلعبو بنفس الأسلوب .. ويوصلو للفريق الأول فاهمين وش لهم وش عليهم .. فهالشي يتعدى مرحلة "مجرد اعداد لخطة" .. اختيار المواهب وجهود الكشافين ماهو بالشي البسيط وهو عامل جوهري لايقل اهمية عن اعداد الخطط شراء لاعبين من انديه ثانيه؟! .. الفكره انك تخلق مجموعه فائزة .. المجموعه الفائزة تكون خليط مابين اكثر من حاجه عشان تطلع بمجموعه شبه متكامله من القدرات والمواهب .. اذا الاكاديميه ركزت على شئ معين ، من المستحيل الوصول للخلطه الكامله من خلالها .. لكن توصل لعمود فقري ، العمود الفقري يحتاج اشياء تساعده .. وهنا يأتي دور الشراء .. المديح الا جا للمدرسة .. ماهو بالشرط على كم لاعب يقدر يؤثر على الفريق وكم لاعب جا من برى النادي .. احيانا تحتاج ضربة حظ او فترة معينه عشان مدرسة تطلع ثمارها (لو طالب تخرج بنسبة 100% من مدرسة ثانوية بالسعوديه .. هل معناتها كل سنه راح تطلع هالمدرسة طالب بذكاءه؟) الفريق الحالي للبارسا + اعضاء منتخب اسبانيا .. فيه خليط من عدة اجيال لمدرسة البارسا .. لكن مع تأثير الفلسفه العامه للعب الكرة .. ومع المواهب هذي .. صار فيه أثر كبير نجاح لعيبة المدرسه خارج البارسا ؟ اعتقد هالشي يعتمد بشكل كبير على نوعية اللاعب ، النادي الا طالع له! ، مثال .. فان دير ميده كان يتنبأ له انه بيكون جناح خارق للعاده في اوروبا .. راح الى ايفرتون اظن .. واختفى من على وجه الكرة الارضيه .. على عكس زملاءه فان در فارت او سنايدر مثلا في ذاك الوقت .. ومع مواهب اياكس .. شروا روزالس الارجنتيني .. هل معناتها قلة مواهب داخل النادي؟ لا .. لكن فرصة ذهبية انك تلقط لاعب مميز موموجود عندك بالنادي! اياكس كبير .. لكن في النهايه .. ماهو الشي الا يفكر اللاعب بالاعتزال فيه .. على الاقل في العقود الاخيره .. اقول هالكلام ، من منطلق كم لاعب ممكن يطلع برى البارسا وينجح وكم لاعب يطلع برى اياكس وينجح! يمعنى ، من الا بيطلع من نادي البارسا اساسا؟ .. هل هي الموهبه الكبيره ؟ ام اللاعب العادي ؟ هل كل من طلع من البارسا راح يكون مثل فابريغاس او راح يكون مثل خوردي كرويف اللي ما اخذ من ابوه الا الاسم فقط؟ هل اللي بيطلع راح تكون في فترة مثل فترة خوان غاسبارت ومشاكله؟ ام الا بيطلع راح يكون في فترة يشوف فيها النادي يحقق بطولات مثل الفترة الحاليه؟ اخر سنة كانت تعتبر جيل قوي لنادي اياكس كانت حول الـ95 .. مع فان خال وخمته .. طيب طلع فان خال واخذ خمته معاه الى برشلونه وماقدروا يوصلو لأشياء كبيره مثل الا وصلو لها في اياكس .. هل معناتها ضعف منهم ؟ مو شرط .. حتى مع اخر جيل قوي طلع لاياكس ، الا كان فيه ابرا وفان در فارت وغيرهم .. ما قدروا يعملو به الشي الكثير .. هل هالشي معناتها ضعف .. لا اذا فيه مدرسة ممكن ينضرب لها المثل بالوقت الحالي .. فهي الارسنال .. مواهب غير عادية قاعده تطلع من هناك .. لكن في نفس الوقت .. انت متى تقدر تستفيد من مواهبك بالطريقه المثلى ؟ اذا قدرت توصل لخلطه مابين خبرة وشباب ، مابين سرعه وقوه ، مابين مهارة وذكاء .. وهنا ممكن يجي عيب فينغر ، فريقه فيه لعيبه كثير قدر يطلعها من مدرسة النادي لكن ماقدر يسوي منها خلطه كامله! وهنا يأتي دور الشراء .. متى ما اعتقد النادي انه عنده كل شي .. هنا راح يكون خسران وغلطان .. فيه $@#$@ نسمة في العالم .. مستحيل مدرسة النادي تشوفهم كلهم ، مستحيل مدرسة النادي تقدر تاخذهم كلهم ، مستحيل مدرسة النادي توقع معاهم كلهم .. المعيشه في مدرسة النادي من عمر 11 سنة .. ماهو بالشي السهل ، ولا كل العوائل والأطفال يقبلو باتخاذ هالخطوه! .. عشان كذا تقدر تربي لعيبه صغار ، وتقدر تشتري لعيبه وهم كبار .. والرابح الا يقدر يوفق بين الاثنين بالشكل الامثل [اذا كان بالامكان طبعا]!

كلامك رائع و منطقي .. بس عندي تعقيب بسيط على نقطة نجاح اللاعب و الظروف اللي تساعده .. انا ضربت مثالي للاعبي برشلونة لأنهم يلعبوا بتكتيك متفرد حاليا في اوروبا و ترى كلامي ممكن تاخذه ذم في اللاماسيا و ممكن تاخذه مدح كله يجي .. شي رائع انه مدرسة تستطيع تطبيق على لاعبيها في حين وصولهم للفريق الأول مهما اختلفت قدراتهم يستطيعوا النجاح .. و هذا الشي اللي يخليه صعب جدا انه ينجح في اي دوري ثاني او حتى فرق ثانية داخل الليجا ..

الموضوع له ايجابيات و سلبيات .. اعتقد الإيجابيات واضحة في اداء الفريق الكتلوني حاليا .. السلبيات اولها اختيار المدرب السليم .. قوارديولا مع عدم اعجابي الشخصي به و لا اصنفه من افضل 10 مدربين في العالم لكن سر نجاحه هو تشبعه من هذه الطريقة و فهمه التام لها .. اختيار المدرب رح يكون صعب و صعب جدا في حال رحيل قوارديولا .. اسلوب البرشا من 2008 اختلف جذريا عن 2006 و اللي ماهو مقتنع يشوف مباريات البرشا مع رونالدينيو و يشوف مباريات البرشا مع ميسي .. ثاني السلبيات هو ببساطة عدم تواجد البديل .. مثلا لاعب زي تشافي لو اعتزل هل بيغطي مكانه لاعب مثل بوسكيتس ؟؟ مستحيل .. و كم سنة راح تنتظر لاعب بمواصفات تشافي حتى يستطيع الفريق انه يلعب بنفس السلوب اللي كان فيه تشافي هو اهم حلقة وصل في الفريق ؟
سلبية اخرى هي التعاقدات .. البارسا حالفه التوفيق في التعاقد مع دانييل الفيس بصراحة اللاعب قدراته سمحت له يتأقلم مع برشلونة بطريقة رائعة .. لكن ابرا على سبيل المثال فشل في التأقلم ان كان بسبب المدرب او الطريقة مافي فرق .. لاعبين كثر ما اتوقع يتأقلموا مع اسلوب البرشا مع انك لو لعبتهم في اندية اخرى لنجحوا و بامتياز ..

سلبية طريقة لعب برشلونة على الرغم من نجاحها الحالي هي عدم تغيير الفلسفة داخل الملعب و في وسط المباراة .. الإعتماد الكبيييييير جدا على مهارات اللاعبين الفردية و للتحديد اكثر على مهارة التسليم و الإستلام ..

والله قبل ما اكتب الرد ما كنت ابى اطول لكن النقاش ممتع و رايق ان شاء الله يستمر يارب ..

انتظر ردك بويول