يووووه من زماان ما شاركت بالرابطة , بس ما فيه ولا حرف يفوتن من الرابطة من صفحة 1 إلى الصفحة الأخيرة
متفائل بإذن الله بموسم تاريخي , هالموسم هذا يا قاتل يا مقتول يا نفوز ونطلع البرشا من الأبطال والكاس (الدوري ما شلت همه أصلا)
يا ناكل تبن ونطلع من الموسم بلوشي والغريم يكوش على كل شي , وهذي مصيبة المصايب والشي اللي مالي به طاقة !
الله يعين بس على رفعة الضغط والقلق إذا قربت مباريات الكلاسيكو ..
على الورق وبالمنطق الكروي وبالعقل نقدر نفوز وبفرق على البرشا وكذلك ممكن يفوزون وبفرق بعد .. مافيه مستحيل التوفيق بيلعب دور كبير بالمباريات ..
بالنسبة لإيقاف البرشا , ما أشوفه شي خطير ولا شي مستحيل , اذا هيركوليس وأرسنال ومايوركا وغيرهم قدروا يطلعون بفوز أو تعادل من البرشا وهي فرق عادية عدا الأرسنال (ويبقى الأرسنال ما يعتبر فريق كبير وله شخصية )
كل هذي الفرق قدرت تعطل البرشا وحنا أقوى من هالفرق بمراحل ونملك شخصية البطل , فما أشوف إنه صعب أو شي غريب إننا نفوز !
أتمنى نلعب بتشكيلتنا المعتادة مع التركيز بس , لأن مباراتنا الأولى مباراة الخمسة , ماكان المشكلة بالتشكيلة بقدر مالمشكلة كانت بالتكتيك ..
خصوصاً الدفاع المتقدم اللي تقطع تقطيع بكسر التسلل .. لو لعبنا بدفاع منطقة , قدامهم ألونسو وخضيرة بأدوار دفاعية بحتة مع عدم تقدم راموس وقلة تقدم مارسيليو أتوقع بنتفوق ونجاري البرشا مع جعل ديماريا جناح يسار يساند مارسيليو ..
ورونالدو والبنز بالأمام يحترون الهجمة المرتدة , وأوزيل ضاغط على المحاور , أتوقع بنسوي شي بالمباراة ..
شخصياً أتوقع الفوز بالمباريات الجاية (الكلاسيكوات) بيعتمد كثير على التوفيق والحظ والأخطاء التحكيمية وممكن وممكن جداً بعد , إننا نفوز فيها كلها , ولو صارت بتشوفون فرحة غير طبيعة , لأن هزيمتنا من البرشا بكل البطولات بعتبرها فاجعة وشي ما راح ينسى على المدى القريب أبداً ..
ما أقول الا الله يستر بس من هالمباريات !
بالنسبة للجولة القادمة ما في علم أكيد ؟ أتمنى إنه ما تتأجل , لأن البرشا بيلعب مع الغواصات وهو فاقد ميسي وماسكيرانو وبتكون ضربة قوية عليهم وممكن يتعثرون بالتعادل أو الهزيمة ..
وهالشي بيلعب بحسبتهم من ناحية النفسيات والمعنويات والإرهاق الذهني , خايف من التأجيل لأنه بيكون من مصلحتهم بشكل كبير + التصفيق بالبرنابيو بيكون أكبر عار نتعرض له ممكن بالتاريخ , ومحنا ناقصين زيادة مذلة !
ادعوا الله ان يوفق مدريد في هالموسم الحاسم , الله يرزقنا الثلاثية اللي لو جت ربما تكون أسعد لحظة رياضية بتاريخي وتاريخ كل متابع مدريدي لأن طعمه لن ينسى أبداً ما حيينا ..
إذا فكرت هالتفكير أحس بنشوة غريبة , الله ييسر بس !
أعتذر عن اللخبطة بالرد وعدم التنسيق الوقت متأخر والتنسيق يبي له مشاكل !

*

أشكر الرابطة , على ترشيحي لأكون الممثل في بطولة فيفا 11 ps3 , وبداية البطولة ضد برشلونة , نبي دعمكم هع

yaser