مرحبا باك ثانية ..

حبي تيماوي

مرحبا بالزميل ..

وشكرا للكلمات مع إنها أقل شيء تقدمه لي

<---- أبوك يالغرور ..

الحين جاي تميلح علينا وصاير تتكلم كنك عناوين الرياضية ..

لا وتقول أسئلة خفيفة .. هي بالفعل خفيفة مثل خفك..

بسم الله نبدأ ..

أول @

إقتباس 1- بما أنك مشرف مخضرم بشبكة الزعيم هل تتذكر متى ولد افلاطون وهل يحب اكل الزيتون ؟؟؟

إيه أفلاطون ..

هذا مولود سنة السبلة ..حتى يذكرون إن الجدري جاه بس ما قضى عليه وهذا اللي خلاه ذكي ..ومن ناحية الزيتون فهو يحبه مثل حبك للجرابيع ..

ثاني @

إقتباس 2- وبما انك تجيد اللغة الإنجليزية نود ان تخبرنا عن معنى كلمه (( جريشه )) وهل لها علاقة بما نسميه ((المرقوق ))؟؟

أما لغتي الإنجليزية فهي الحمد لله معي منذو الصغر ..حتى إذا بنشرت قلت للبنشري .. (( تشينج ماي كفر الله يرضى على والديك ))..

أما معنى جريشة .. فهي أكلة شعبية مشهورة واجدن بالحيل في نجد ..<---- حط الكلام ذا بالإنجليزي ..

أما كلمة مرقوق .. فهي تكتب ( Mr Gog ) وتعني السيد قوق ..

اما العلاقة بنه وبين جريشة فهي مثل العلاقة بين الجح والجراوة ( الشمام ) ..



ثالث @

إقتباس 3- ماذا تعمل لو إسيقظت فجراً ووجدت ( ديكك ) نائماً ؟؟؟

أتوطأ ببطنه .. وأفطر على تسبدته ....


رابع @

إقتباس 4- ما هو شعورك وأنت تركب الحصان ويجري بك سريعاً في إتجاه البحر ؟؟

أبد .. شعور أي واحد ماسك طريق عفيف - ظلم ..


خامس@

إقتباس 5- ماذا تعرف عن الشدة والضمة والفتحة والكسرة ؟؟؟

أول أعرف أنها حركات مع الحروف العربية وممن تغير معنى الكلمة لو حرّفت في هذه الحركات ..

السنة ذي عرفت إنها ترفع الضغط ..;)


سادس@

إقتباس 6- بماذا تذكرك بااااا فتح باااا... وتاااااا كسر تاااااا؟؟؟؟

أول شيء تااااااا كسر تيييي ماهيب تاااا ..

وتذكرني بنوم الصبح الأيام ذي ..<--------


سابع@

إقتباس - ما هو رأيك في الفيروسة 888 وسهل الزر قاء والماسة تيماوي وحبي الزرقاء ؟؟؟

رأيي فيهم إنهم من أهم المحصولات الزراعية المصدرة للبترول في وزارة البرق والبريد والهاتف ..


ثامن @

إقتباس 8-من هو مخترع نظرية فيثاغورس ولماذا إخترعها حسبي الله عليه وفي أى وكالة سيارات تم تسجيل الإختراع ؟؟؟

مخترعها هو مدرس رياضيات اللي درسنا في ثاني ثانوي ..

واخترعها عشان بالقوة وده يعلمنا عن جتا وجا وراح ..

وتلقاها في وكالة الحميضي للساعات العالمية ..


تاسع @

إقتباس 9- بماذا تذكرك هذه اليوزرات عاشق النمر.. ابراهيم النجيدي .. ملك العشاق .. حبي تيماوي .. ابو سليمان .. الجن الأزرق ..البارق 2000.. بحر .. جاج ؟؟؟

إييييه جيت على الجرح يا ابو أسامة ..

عاشق النمر .. الشخص الذي يجبرك على الضحك حتى لو أنك وسط عزاء ..

إبراهيم النجيدي .. من الأشخاص الذين يحتلون مكانة كبيرة في القلب .. حتى لو كنت أعلم أنه ربما لا يعلم بها ..

ملك العشاق .. ودي أدري وين المرسيدس؟!! من جد هالمرجوج فقيده .. بس ليه يعطي النت لو شوي من وقته هو ووجهه

حبي تيماوي .. يكفيه فخراً إنه يعرفني ..

من جد .. اعتز أن أول معرفة لي عن طريق الإنترنت هي لهذا الشخص .. والشهادة فيه مجروحة ..

أبو سليمان .. افتقدته كثيراً .. وعند رؤية هذا الاسم اتذكر المثل " عرف الرجال تجارة " ..

الجن الأزرق .. مانيب قايل ليته للحين في أمريكا .. فقدناه كثير كثير .. وأتمنى عودته من كل قلب ..

البارق 2000 ... ما أعرفه

بحر .. خبري به إنه عنده مشاكل للدخول ..وينك يا بحر البحور ..؟!!

جاج .. يقولون إنه فاتح له عيادة للتسوي ( كوي ) ومحقق أرباح كبيرة .. ويمكن ينزل العيادة أسهم للاكتتاب ..

الله يذكره بالخير ..

أما هذه الأسماء مجتمعة ففعلاً تذكرني بالبدايات في المجلس العام .. والكاريكاتيرات ..والإدمان والهواش والتقفيل وأيام نشوف قليل كلمة منقول ..


عاشر@

إقتباس 10- متى تلبس النظارة الشمسية ولماذا يفضل الشباب إستخدامها ليلا ً ؟؟؟

الوقت الحالي ما ألبس نظارة شمسية .. يازين جونا هالأيام ..
لكن عاد الصيف له أحكام
أما عاد اللي يستخدمها ليلاً .. فهذا مشكلته إنه شاريها غالية وفي النهار ينام وما يطلع .. فلذلك ماله إلا الليل عشان الناس يشوفونها ..


حادعش @

إقتباس 11- ايهما اكثر زرقة ورق العنب ام الخس ؟؟؟

لا ذا ولا ذاك .. بل هو ورقة القرنفل <---- فرحان يعرف اسمه ووده يقوله وما لقى له مناسبة ..


ثانعش @

إقتباس 12- اربعة فئران في غرفتك وامامهم ( قطو) ايهما ستشجع وهل ستغلب الكثرة شجاعة القط ؟؟؟

ما صارت غرفة ذي .. صار برميل زبالة ..
لكن أقول أتوقع اللي بيفوز هو الكلب لأن الفيران بياكلهن القطو زي سلام عليكم وبدها بيشعر بحاجته للنوم ( مثله مثلنا بعد الأكل ) .. عاد بروح أنا بدوري كمتفرج بجيب لي كلب عشان يتوطأ ببطن القطو ..عاد يمكن باللحظة ذي الفيران يطلعن من بطن القطو وما بهن شيء فيرجعن يضربن القطو والكلب بيكون قد رجع .. والقطو ما بعد أخذ أنفاسه .. وبعدها يدخل إندرتكر ويضربهم كلهم لأنه قوي ..




ثالث طعش @

إقتباس 13- من هي اول امرأة في التاريخ اكتحلت بالإثمد ؟؟؟

ما أدري .. بس أتوقع مريم نور .. لأني أظنها منذو قديم القدم ..


رابع طعش @

إقتباس 14- أديس أبابا شجرة كبيرة ماذا يعني هذا الاسم ؟؟

الحين تحسبني ما أدري إن أديس أبابا هي عاصمة السويد ..


خامس طعش @

إقتباس 15- أين كانت رحلة الصيف لأهل عنيزة ؟؟

إلى ساجر .. ;)


سادس طعش @

إقتباس 16- ماذا تسمى عملية إدخال الهواء الى الرئتين ؟؟

والله مانيب طبيب جراح مثل " الربيعة " .. أنا وش دخلني بالعمليات ..: ?!!


سابع طعش @

إقتباس 17- ما هو الموطن الاصلي للبرتقال ؟

يقولون .. قلت يقولوووووون إنه العراق


ثامن طعش @

إقتباس 18- هولاكو قائد مغولي ام أكلة حجازية ؟؟؟

هذا الله يسلمك كابتن ريال مدريد العام الماضي ..


تاسع طعش @

إقتباس 19- ما رأيك بصراحة في ما سبق من أسئلة ؟؟؟

يا كثرك ..


الـ @ العشرين

إقتباس 20- ما هو شعورك نحو اخيك طارح هذه الأسئلة ؟؟؟

شعور أي واحد له عشر أصابع جاله فيهن شد ..


:::: أخيراً أقول لك يا ابو أسامة حجا مبرورا وسعياً مشكور .. وادع لي أو علي المهم إني أكون على بالك ::::

<---- الله من زين التفكير ..



واحد زاحف

الله يحييك ويخليك يالغالي ..

إقتباس 1- مارأيك فيني كعضو وماهي سلبياتي وايجابياتي وماذا ترى فيني وماهي انبطاعاتك نحوي ؟..

عضو رائع خفيف الظل يمتلك أسلوباً رائعاً في الكتابة .. يضفي أي موضوع يشارك فيه.. نشيط وكثير المشاركات في أكثر من منتدى في الشبكة ..وطبعا هذه هي إيجابياتك ..

أما السلبيات فهي لا تكاد تذكر .. إلا هي قل المواضيع .. فأنت تمتلك قماً مميزاً ولكن اعتبرك مقل لكتابة المواضيع خلاف الردود ..

إقتباس - نصيحة تقدمها لنا عموما ً ولي خاصـة ً ؟..

للجميع أقول .. عند الغضب حاول أن تبتعد عن النت .. وإن كان ولا بد فتابع القراءة بعد تسجيل الخروج .. لأن امتلاك النفس عند الغضب فن لا يجيده إلا القليل ..

لك خاصة .. ليست نصيحة بل رجاء مني أن تكثر من كتابة المواضيع ..ولك كل الشكر والتقدير ..

ويا أخي الله يعطيك اللي تبي في هالدنيا .. أنا أشكر كل واحد يقدر ويسأل أسئلة خفيفة ماهوب مثل بعض الناس <---- ما يقصد حبي تيماوي


المحب لزعيم آسيا

الله يحييك ويخليك يالغالي .. وألف شكر لك على المشاركة ..

إقتباس 1-ماهو سبب تسميتك بالبارق وايضا لماذا 2000 ليش مو2100 ؟

هذا الله يسلمك سبق الإجابة عنه ..

إقتباس 2-نبغى نعرف اطرف موقف صار معك ؟

يا أخي السؤال هذا لما يجيني تضيع كل المواقف .. لكن بقول هذا مع انه ماهوب أطرف لكن هو اللي جاء ببالي ..
كنت أنا وأخوي مرة نبي ندخل صالة سيارات لأن أخوي يدور له سيارة .. كنا نمشي على سيارتي .. وبعد ما وقفت إلا وأخوي حاط عينه على سيارة من قبل ما نوقف( شريطي على غفله ) ..طبعا هو نزل قبل ما أطفي السيارة من العجله وكنه خايف إن السيارة بتروح لغيره ..أنا نزلت وقفلت السيارة ومشيت باتجاه الصالة ..أخوي كان قبلي وعينه على السيارة ورايح بيخل الصالة ما دريت إلا صوت " طرااااااخ " !!!

أثره راس أخوي في القزاز حق الصالة .. أبو الشباب من الحماس ما درى إن واجهة الصالة قزاز ..

والله يا ضحكت عليه ضحك ..

إقتباس 3-متى دمعت عينك بقوة واثرت في نفسك لفترة ؟

يقولون إن بكاء الإنسان نعمة عظيمة .. ولكن مع الأسف أنها ليست عندي .. فأنا قليل البكاء الخارجي .. حتى لو كنت أتألم من الداخل .. ولكن الحزن يظهر بشدة عند سماع خبر وفاة قريب .. أو أي وفاة عموماً ..

إقتباس 4-لنفترض انك جالس في المسجد بجانب الباب وتبرع عليك احد الاشخاص وانت ليس قصدك الطراره (وش بتسوي)

أقول .. ما تخلي يا بيه ..

إقتباس 5-من هو العضو في المنتدى الي قاهرك وودك تكفخه؟

اللي يسأل أكثر من خمس أسئلة ..

إقتباس 6-من الي ودك من الاعضاء في المنتدى تتمنى تشوفه ولاشفتاه؟

والله واجد .. لكن يظل سهل888 وأبو الذهب على رأسهم ..

إقتباس 7-ابغاك تتخيل ان الي في المنتدى في بيت واحد لعب وفله والا(وش رايك)؟

الحمد لله اللي أشوفه في الزعيم الجميع كنهم أهل بيت واحد ..

إقتباس 8-شو الجوال المفضل عندك؟

ابعد عن النوكيا وأنت بخير ..
بالنسبة لي أشوف جوال موتورولا أفضل جوال من جهة الصوت ونقاوته ولكنه ضعيف جداً من ناحية التقدم الذي نلحظه الآن في عالم الجوال ..
أما الآن فالمفضل لدي هو جهاز سيمنس ..

إقتباس 9-يوم كنت صعينون يعني بزير وش كانت احلامك والان وش احلامك؟

كان حلمي إني " ادربي " كفر جمس .. لأني ماكنت أحصل إلا كفرات ددسن ..!!

أما الآن فالحلم إني أسوق جمس ..

<---- الله من زين الطموح ..

إقتباس 10-من من الاعضاء افتقدته في المنتدى ؟

والله كثير جداً ربما المجال لا يتسع لحصرهم ..لكن منهم على سبيل المثال لا الحصرأبو الذهب وهلالي الجوف.. كذلك الكنز نواف وأيضاً حبيب الجميع جمجمة الهلال وابو سليمان ويزيد وجاج ... و ... و..... و ..!!

إقتباس 11-اتمنى اعرف منك منه الي بوجهة نظرك الرجل القوي والرجل الضعيف ؟

جواب ذلك قول الرسول صلى الله عليه وسلم : " ليس الشديد بالصرعة .. إنما الشديد من يملك نفسه عند الغضب " ..

إقتباس 12-تتذكر اول ملعقة سيريلاك كلتها ووش كان شعورك؟

ما أظن إني قد أكلت سيرلاك ..

إقتباس 13-من اعز الناس الى قلبك من المعروفين في مجال الرياضة والدين .....الخ

والله ما فهمت السؤال زين .. لكن إن كنت تقصد من المحبب لدي في مجال الدين وكذلك الرياضة ..

فأقول لك في مجال العلم والعلماء أو الدين فهناك الشيخ سلمان العودة أراه قريب إلى جميع النفوس ملم بجميع العلوم .. وكذلك الشيخ عائض القرني ..

أما في مجال الرياضة ..يضل سامي الجابر هو أكثر الناس احتلالاً ..مع عدم انكار الآخرين كأبو يعقوب ونواف وغيرهم ..
بالفعل نحن محسودين على نعمة الهلال

إقتباس 14-شو اللون الي بتحبه وقريب كتير كتير لالبك؟

يختلف من شيء لشيء ..فاللون الذي أحب مشاهدته في السيارات هو الفضي والكحلي .. أما الفرق عالمية أو محلية فيضل الأزرق الخالص هو سيد الألوان وزعيمها ..

أما من ناحية الملابس .. فالأسود شتاءً والأبيض صيفاً ..

أما من ناحية التصاميم فاللون " البيج " هو المفضل ..

أما بشكل عام فالأزرق بدرجاته ;)

إقتباس 15-تخيل انك قمت من النوم وعديت اصابع يدك ولقيتها اربع وش راح تصوي (بصراحة)

بروح للمستشفى ..

شاكر لك مشاركتك الخفيفة والرائعة ..



سراب الدمع
يا هلا والله وغلا بأكثر واحد يصرف على المنتدى راءات في قولته مساء الورررررررررد ..

إقتباس لم آتي لأسأل البارق

أجل وش انت جاين له

إقتباس وإنما أتيت لإُجدد إحترامي وتقديري ومحبتي لهذا الرجل

الله يعطيك العافية ويجزاك كل خير .. وأنا أشهد إني ما أملك عندي لك إلا مثل ما تملك ..بل وأكثر ..

إقتباس @@ سؤال صغينون :: ماوحشتكش

إلا والله وحـشــتـــن
وإن شاء الله نشوفك على خير ..


هلالي موعالبال
الله يخليك ويبقيك يالغالي .. وألف شكر لك على كلامك الرائع واللطيف ..
نجي لسؤالك مع اني سبق وان أجبت عليه لكن نعيده ..

الاسم : البارق بن 2000

العمر : بين 25 و 29 سنة

موظف/طالب : لا ذي ولا ذيك .. لأني مدرس

الحالة الاجتماعية : اعزب ..

الهوايات : ماغير كورة ( كرة قدم ) وكشتات وكمبيوتر ..



هلالي غصب
الله يحييك ويخليك يالغالي ..

إقتباس سم الله واجب على الاسئلة التالية :

بسم الله .. توكلنا عليه ..

إقتباس السؤال الأول : ماهو لون شعرك

أشقر ..

إقتباس السؤال الثاني : كم مرة طحت وانت نائم ..!!

الصدق مانيب من اللي يطيحون وهم نايمين .. يمكن لأني أنام على الأرض ..

إقتباس السؤال الثالث : كم مرة قمت بالتظاهر بالغباء؟

تصدق عاد إن التظاهر بالغباء يفيد بعض المرات ..

إقتباس والسؤال الأخير عبارة عن لغز : اللغز يقول : في الطابق العاشر من إحدى البنايات يسكن رجل في الثلاثين من عمره ، و يستخدم في الوصول إلى شقته المصعد الرئيسي و لكنه حين الصعود لا يذهب إلا إلى الطابق الثامن ثم يقطع الطابقين الباقيين سيراً على الأقدام . أما حين النزول فينزل من الطابق العاشر مباشرة ً. ترى لماذا لا يصعد هذا الرجل إلى الطابق الذي هو فيه مباشرةً؟؟

يمكن عشان المصعد إلى الدور الثامن بس .. أما في النزول فهو ينزل مع الدرج وأكيد بيكون مباشرة لأنه ساكن في العاشر ..!! هذا احتمال

الاحتمال الثاني يمكنه خابرن له شيء في الدور الثامن ووده يشوفه يومياً

الاحتمال الثالث .. إنه ما عندك أحد وما يدري وين اللي الله موديه ..


شاكر ومقدر لك مشاركتك يالغالي ..



ولي عودة للبقية بمشيئة الله ...

تحياتي ،،،