فكرة /الماسه الزرقاء
تصميم / معــذبهم
اعداد / الهلالي دائما- الهنوووف

بكل الحب والمودة نرحب بأعضائنا وزوارنا الكرام
وكما عودناكم ها نحن نعود من جديد مع برنامجكم

والذي يحكي فيها ضيفنا عن سيرته وحياته في العالم الافتراضي , عالم الشبكة العنكبوتية وعالمه في شبكة الزعيم .

والله مدري من وين ابداء او وش اقول من دريت عن الموضوع وانا كل ما اجي ابي اكتبه اتوقف مدري وش السبب ..
لكن نتوكل على الله ونبداء باستعراض الذكريات

** النت عالم مجهوول**

كان عالم النت شي مجهول تماماً بالنسبه لي
كنت اسممع الوالد يتكلم مع بعض الجيران عن هالـ الانترنت
اذكر ذيك الايام ايام الشيشان والاخبار الجهاد والوشسمه ذاك كله <
فارتبط ببالي ان النت للاخبار واستمرت الحياه ع ان النت للاخبار
ليين بديت اسمع من الطلاب عن النت وعن الشات والمواقع وانتظر احد يجيب طاري الاخبار شي
العالم كله تتكلم عن الفله والسواليف والزي منهو
لييين قررت اني اجرب هذا المدعو بالنت بنفسي لكن المشكله ان بيتنا ما فيه نت
اذكر كان عندنا جهاز مكتبي العاب واناشيد وخرابيط
اذكر ان فيه شي كيذا ازرق مدري شلون قايل << علامه الاكسبلولر ومدري وش وظيفتها بالحياه خخخخخ
حاولت اكلم الوالد انا ندخل نت بالبييت لكن كان السوال الي ماله جواب مقنع
وش الفايده منه ؟
ليين ما مره وانا ببيت جدي الله يرحمه اسمع خبر ان خالتي اقنعت جدي ودخلوا النت ببيتهم
وعلى طوول عند خالتي ابي اجرب النت خخخخخ
طبعا بعد ما قلت لامي وصدرت الموافقه من امي بس بشرط ان خالتي تراقبني وانا استخدمه
وانا وقتها والله مدري عن شي بس تراقبني تراقبني اصلا انا ابيها تعلمني عليه خخخخخ
المهم اول موقع كان العم والشيخ والفاسق وكل شي
قووقل اول شي سويته دخلت اسم ابوي بقوقل
لاني اذكر مره سمعت واحد من الجيران يقول يبو محمد منزلين لك مدري وشو بالنت
بس البلا احط اسم ابوي يطلع لي لاعب قطري
اسمه نفس اسم ابوي
عاد ما كملت ربع ساعه الا خالتي تقولي خلاص انتهى الوقت وتاخذ الابتوب وتجلس تتصفح هي
عاد بعدها صرت كل ما اروح بيت جدي يعني تقريبا اسبوعياَ اخذ الابتوب منها شوي واطقطق على هالقوقل
طبعا بدى ادمان النت وصرت احيناَ من زود صله الرحم
بوسط الاسبوع اروح اسلم على جدي وجدتي الله يرحمهم
لييين ما مليت صراحه ورحت كلمت امي
بحكم ان ابوي بذيك الفتره كان كثير السفر فيالله اشوف عشان اقوله بدخل نت بالبيت
وقلت لها اني بشري كونكت بفلوسي << كل ما اتذكر كلمه بفلوسي ذي استحي على وججهي
واني مليت ووش يفرق النت هنا عن بيت جدي ومن ذا الكلام
وتمت الموافقه ولكن تحت التجربه والحممد لله طيحت البييت كله بادمان النت
وبعدها سوينا مظاهره واعتصمنا بميدان التحرير ببيتنا <<
وطقينا مودم مب كل ما احد شبك الكونكت الا واحد فوق راسه اخلص ابيها

** عالم ترافيان **

من اكثر الاشياء الي شدتني للنت هاللعبه اللي اسمها ترافيان كانت اددمان بشككل غير طبيعي
طوول الوقت تفكر بالقريه هاه جاها شي لا يكون جاني هجوم وانا مدري متى يمدي اطلع جنود
تمشي بالشارع تشوف الشجر تتذكر الخشب اللي بالقريه اذكر كانت لي اكثر من قريه باكثر من سيرفر
لكن الي استمريت فيها وحسسيت بطعم اللعبه كانت بالسيرفر العاشر
وانتهت المغامره ببيع القريه والحمد لله عوضت الي خسرته فيها من الذهب وغييره

** المنتديات**
ببدايتي بالنت كنت متحممس جداَ
كنت اتابع الساحات العربيه لين ما تقفلت وبعدها حولت على بناء واستمريت على بناء لين فتره قريبه
تقريباَ لين ما بدت الهجمات عليه وحجبه وتغير الرابط لين ما تركته نهائياَ
ايضاَ شاركت بكم منتدى بس غالباَ كلها كم اسبوع وامل واسحب عليهم
ما عدا شبكه الزعييم هي الوحيده الي استمريت فيها

** شبكه الزعييم **

شبكه الزعييم تعرفت عليها من خلال قوقل
بما اني هلالي اكيد راح ابحث عن الهلال في قوقل << مدور على ابوي ما تبوني ادور على الهلال
كنت في البدايه متابع في البدايه لمنتدى الجمهوور لين ما جاء في بالي لييه ما اكتب موضوع
فسجلت لكن مليت من الانتظار مثل اغلب الاعضاء لين ما جتني رساله ع البريد انه تم تفعيل يوزرك بالشببكه
الضاهر بعد ما انلطعت 6 مدري 7 شهور طبعا شفت تاريخ تسجيلي واول مشاركه لي
والا تخيلوا اني للحين اذكر كم انلطعت مثل بعض الاعضاء وبدينا المشاركات بمنتدى الجمهور كردود فقط
طبعا شبكه الزعيم كانت بالنسبه لي هي منتدى الجمهور وما توقعت اني راح احصل في ها منتديات ثانيه او شي
كنت على طوول من قوقل على منتدى الجمهور مباشره
ليين ما مرت علي فتره فضاوه كنت شبه مرافق لجدتي الله يرحمها بالمستشفى
فطبعا كان معي الابتوب والكونكت
ومره ظغطت على رابط بتوقيع واحد من الاعضاء كان موضوع بالمجلس العام
طبعا من اول المواضيع الي شفتها واذكرها للحين موضوع شفته كانت حفله لبنات من المجلس مسوينها
اذكر كان فيه صووره لبيتزا للحين ما انساها خخخخخخخ
حاولت اذكر اسم الي نزل الموضوع عجزت وفيه اسم براسي بس مب متاكد
ومب قاليه خل نشوف شيبان المجلس اذا يذكرونه او لا
المهم بعد هالزياره صرت كل ما خلصت من منتدى الجمهور اسير على المجلس
وكنت اكتفي بالمتابعه فقط
ليين طحت ذاك اليوم بمسابقات ثقافيه كانت تصيير كل اسبوع بالمجلس على ما اذككر
وبرظوا كان فيه مسابقه ما اذكر وشي بالظبط
بس كانت هي سبب تعرفي على اول شخص بالزعييم اللي هو الغالي الغايب : هلالي 911
ومن بعدها بديت مشاركات بالمجلس وطبعا ردود فقط
ما عادا موضوع واحد فقط
الي هو مليونيه المجلس العام فييه احلا من هييك موضوع ؟

** الاخبار **

بدايتي بالاخبار
من خلال رد الغالي هلالي من ارض اليمن بواحد من الشاتات
انهم بحاجه لمعدين اخبار صحف قلت ورى ما أجرب
وارسل لطارق << طبعاَ ايام اليوزر الفضي
المهم ارسلت له وانظميت لفرييق اخبار المجلس استمرييت باخبار المجلس حوالي السبع شهور
كانت من احلى الايام بالنسبه لي بالنت ومتاكد ما راح ترجع
ليين ما عرض علي الغالي سامي ( رسام الاحاسيس ) اني انظم للجنه الاعلاميه بالموقع
وصراحه ترددت كثير لكن الحممد لله لقيت الدعم من الغالي سامي الي ما قصر معي باي شي
وبرضوا من اخوي وصديقي الغالي ماجد مقبل اووه اقصد الهلالي دائماَ
وللحين مع هاللجنه الي الواحد يفتخر انه عضو فيها


** صداقاتي بالمجلس **

من الطبيعي انه يكون عندك صداقات بالنت
وبعضهم تتطور العلاقه معهم لين تصيير مطعم هندي او كودو بالمدينه
حقيقه بالمجلس العام كسبت اخوان لي ولهم معزه وتقدير
والحممد لله تعرفت على كثير من الاعضاء سواء على الماسنجر او بالجوال او حتى قابلتهم وطلعت معهم
من اكثر الاعضاء الي لي علاقه فيه ونادر ما يمر يوم بدون ما اسولف معه سواء جوال او مسن هو الغالي عبدالله ( فيلسوف زمانه )
وبعد الغالي ماجد مقبل صديقي الصدوق راعي الكرم والجود << يبي لها صح مسلا ذي يبو مقبل
و الغالي سامي رسام الاحاسيس
وياسر وعادل والمعرس هلالي مدريدي
وأبو زياد ( عطارد ) وراعي البندول المشاغب
الخ الخ الخ تعبت والله وانا اذكر

في الختام
محمد مجرد انسان ان كان في يوم اخطيييت على احد بقصد او بدون قصد
اتمنى منه انه يسامحني وان كان يبيني اعتذر له انا حاضر

كل الشككر للغالي الهلالي دائماَ على هالفرصه
وايضا الشكر لجميع مشرفي واستشاري المجلس

نستقبل جميع الملاحظات وصبااحكم فل
<< من زمان عن النقاء والصفاء

ونحن بدورنا نشكر المتميزḾŎĤǍṀẠḊ
على هذا الحديث الجميل ومشاركتنا في حياة @ نت
متمنين له دوام التوفيق والنجاح .

للإطلاع على الحلقات السابقه لـ ضيوف حياة@نت

«¤¶`أرشيف حياة نت " `¶¤»

تقبلوا أرق التحايا وأطيبها من
مشرفي واستشاريي
منتدى المجلس العام