هذه القصيده لشاعرنا الكبير المبدع / جوهر الحربي الذي
أمتعنا كثيرا بقصائده الجميله والمعبره
اترككم مع القصيده

صدفه لقيت الشعر في قسم الأعصاب"="يبي يشق الثوب ومحجزينه
وأسمع وراه بغرفته صوت وطلاب"="أحد(ن) يبي يحماه وأحد(ن) يدينه
وسئلت عنه أهل العنايه والأطباب"="وش صاب حال العود يا معالجينه
قالوا مريض ودخّل أشهار منصاب"="والظاهر انه مقفيات(ن)سنينه
قلت أبا زوره عجلوا فكوا الباب"="قالوا مريض ويزعجك في ونينه
قلت أن هجرته عمد يلحقني أعتاب"="تكفون لا تقفون بيني وبينه
قالوا تفضل دون تقييد وحساب"="لو كان حال العود ماهي بزينه
وجيته وهو من ضجة الناس مرتاب"="وقام وتنهض في وقار وسكينه
عليه من لبس العيادات جلباب"="وسلك المغذي رابطه في يمينه
وحبيت خشمه وأقبل الدمع سكاب"="وأبطى يطالعني بعين(ن)حزينه
جسمه نحيف ولحيته كلها تراب"="وبعض الكوايا واسمات(ن) جبينه
معروف ما بين القرايب والأجناب"="شكل بدوي معروف مله وطينه
قلت انت وشلونك عسى ما بك أسباب"="وقام يتلقف عبرته في يدينه
قلت أنت لا تبكي ترى عندك أقراب"="قرابة المولود من والدينه
ومش الدموع وقال ويش أنت يا شاب"="فلان وبن فلان وفلان وينه
ناس(ن) ثنوا من دون حقي ولاغاب"="يوم إنهم حيين متوارثينه
متوارثين الصيت والصيت ما خاب"="ياطيب صيتي عندهم حافظينه
حامينني من كل جاهل وغصاب"="من مد كفه للعبث خاصمينه
واليوم شوّه سمعتي كل مغتاب"="يلعب على الحبلين محد(ن) يهينه
إلاّ قليل(ن) من كثير العرب طاب "="تالي رجايه عقب ذقت الغبينه
لعلهم يبنون بيتي بلا طناب "="في وجه صلفات الليال المتينه
وحقي عليهم ذبح تسعين كذاب"="ومن فوق هذا شرهتي بالثمينه
وإن ما فعلوا هذا فـ أنا مالي أصحاب"="بكره تبي تصبح عضامي دفينه
بلغ لي الشعار في كل الأشعاب"="تراك في حكم الوصيه رهينه
وأنته تنوب وكل شاعر ليا ناب"="يصبح كما الربان فوق السفينه
إما طلع و ألاّ هفى هفية غراب"="والشعر ماهو شي لولا سمينه
بلغ شواعير النبط تصدر كتاب"="عن عالم(ن) شعر النبط ظالمينه
قلت الوصيه واصله مابها أطلاب"="أبداً تطمن والمراسل أمينه
وقام وتلحف وأنسدح وأغلق الباب"="وبعد المرض عادت عليه السكينه

اتمنى انها نالت على اعجابكم واستحسانكم

تحياتي للجميع