إقتباس الرسالة الأصلية كتبت بواسطة هلالي 2010موت السلام عليكم ورحمة الله وبركاتة انا مشجع للمانيو وحاب اشارك معكم عندي سؤال الحين كل الافرقة تحركت وجابت لعيبة الا انا وش رايكم هل الفريق بحاجة لاعبين جدد ام لا ؟

هلا والله , حياك الله يالغالي تنور الرابطة




.




انا ضد الشراء لمجرد الشراء , العالم كلهم يحوسون وكل فريق ناقص الا فريق انت , وش تبي زيادة؟
العالم تحوس وابي اللاعب الفلاني والملايين اللي تروح وتجي وانت فريقك ما يحتاج اي لاعب
اتحدى احد يجي يعطيني مركز ناقصين فيه , تقول لي جناح ؟
عندك فالنسيا يمين "رجعته على بداية فبراير واليوم بدينا فبراير" , قيقزي يسار , ناني وبارك يلعبون بالجهتين.
معقولة اربع اجنحة ما تقدر تمشيك ؟ ما اتكلم عن اي اربع اجنحة , كل جناح منهم شال فريقك فترة من الفترات.
طبعًا غير روني وفليتشر اللي ممكن نحطهم وقت الزززززززنقة , ايفرا قد لعب جناح وبدع بعد.
ما جبت لك اوبيرتان وبيبي وقلت لك هذولي اجنحة بعد , اتكلم عن اجنحتك الصاحية
حبيبي الوافي اللي حصل هالشهر حالة استثنائية , يغلق الميركاتو الصيفي من هنا ويصاب عندك جناح , وتجيك فترة ويسافر فيها جناح ثاني مع منتخب بلاده.
طبيعي يجنح روني يسار , لكن يوم قربت رجعة فالنسيا وبارك رجع من منتخب بلاده تبون جناح؟
خلاص الحين فريقنا بدا يكمل من ناحية الاجنحة , بعودة فالنسيا وبارك , ما اتوقع بنشوف احد غير الاربع اجنحة الا يمكن في مباراتنا مع الشياطين الحمر خخخخخ

بتقول لي فالنسيا ممكن ما يكمل على مستواه قبل الاصابة , اذا على هالحالة ترى المانيو يحتاج حارس انت ما تدري السوبر سار بيحافظ على مستواه
ويبي قلب دفاع ويبي ظهيرين ايمن وايسر ومحور ومهاجم بعد
شوية عقلانية يا شباب
وبعدين فالنسيا ما عليه خوف باذن الله , بيرجع لمستواه وبيسكت الكل باذن الله , يا جماعة هذا جوهرتي السوداء موب اي لاعب , والايام بيننا.

ابو مالك ترى باصكك كف لو جيتني وقل لي الفريق يبي صانع لعب , غصب هي تغير طريقة لعب الفريق بنص الموسم؟!
اذا كانت عندك طريقة لعب متعود عليها ومتشربها وتحقق لك افضل النتايج , وشوله تغيرها؟

طبعًا خذ بعين الاعتبار ان فريقك لا زال متجانس بعكس الفرق اللي اشترت لاعبين جديدين واكيد طريقة جديدة ولا تدري تنجح او لا.

بالنسبة للشباب اللي يبون يشترون لمجرد الشراء احب اعدهم بميركاتو صيفي خرافي واذكركم وقتها.





فيه كلمتين لازم تكون في قلب كل مانشستراوي مهما كانت جنسيته ولغته ومستوى عشقه للمانيو.
1- believe.
2- السير ابخص.