|
بـــ...الــــمـــ...ـــقــــ...لـــــ...وب
قــــــــفـــــــــــلـــــــــــــه
قال : تعرف شبكة الزعيم ؟؟ قال : ايه .. قال تعرف صدى الامس ؟؟ قال : لا !! قال : اجل ما تعرف شبكة الزعيم 
بـــ...الــــمـــ...ـــقــــ...لـــــ...وب
قال ما شفت وش صار بشبكة الزعيم ؟؟ قال لا ؟؟ قال حطوا مشرفين جدد ؟؟ قال بالله عليك ؟؟ من اختاروا ؟؟ قال اختاروا فلان وفلان قال ما اختاروا واحد من ربعنا ؟؟ قال لا !! قال الحمد لله اصلاً انا داري انهم داجين وإلا من زين اللي اختاروهم !! لا وازيدك من الشعر بيت حطوا بالمجلس العام كايدهم وسهل 888 !! قال تقوله صادز قال ايه وش دعوه بكذب عليك !! قال الحمد لله اصلاً لو فيهم خير كان نفعوا من قبل !! هذا كايدهم لو فيه خير كان استمر بالجمهور الهلالي ونفع اكثر واكثر !! وهذا سهل لو فيه خير نفع تطوير المجلس العام اللي هو مدير هاللجنة !! بس يدريك ان السالفه كلها معرفه ومصالح !! عشان فلان يعرف فلان يحطونه مشرف والا هو ما يستاهل ولا شئ !! قال اي والله انك صادق بس تدري خلهم ينفعونهم !!
بـــ...الــــمـــ...ـــقــــ...لـــــ...وب
ما تلاحظون إن كل شئ هالحين صار على خط 700 !! كل ما بغيت شئ قالوا لك 700 !! صجونا بـ 700 !! والمشكلة أنها تلقى دعم من ناس اللهم لك الحمد والشكر !! يعني تتصل عشان تحمل أغنية أو ترسل رسالة الدقيقة بـ 7 ريال !! كانك ملزم وقروشك كثيرة عندك ياخي هالمحلات رح لمهم وقل دوكم جوالي واترسوه نغمات وما تكلفك إلا كم ريال !! هذا لحقين النغمات اللي ما ادري وش يبون بهن !! وإلا وش الفائدة من أنك تحط نغمة أغنية كاملة !! وأنت أول ما يدق الجوال تخترش وعلى طول ترد وما يمديك تسمع الأغنية !! عاد كله كوم وإذا دق في مسجد  !! البعض الله يهديهم ينسى الجوال في الصلاة ولا وبعضهم اللهم يا كافي حتى في صلاة الجمعة (( صحيح أنها ما تختلف عن باقي الصلوات من حيث الأهمية )) لكن اللي يميزها انك تجي وتتجهز وانت داري ان ما عندك الا هي وتبي تروح للمسجد عشانها !! تجي وحاط الجوال معك الله وأكبر يالمهم !!
ولا والحين بعد طاحوا بالدعايات حقين 700 بالجرائد !! يحط لك صور حدى هالـ(( متفصخات )) وصاحبات الإستعراض كنوع من التحفيز !! قال تحفيز قال  !!
الظاهر من كثر خطوط الـ 700 بنشوف بكرة خطوط بيوت على الـ 700 يعني تبي تدق على خويك تسود تكلمة بـ 700 !! عاد تصدقون يمكن هالشئ يفيدنا !! تبون تقولون وشلون ؟؟ انا اقولكم وشلون ؟؟ حنا ناس نحتسي واجد وعلى قل سنع يعني تبي شغل من واحد تسود تمسك خط معه عشان تقوله وش تبي !! وغير كذا تفتك من الناس اللي يغثونك ويقرقون واجد بالتلفون لين تنفقع اذنك من طول المكالمة !! وغير كذا تفتك من الناس اللي ما تبيهم يعني تبي تحصر مكالمات على ناس تتأكد انهم ما يبون يقرقون وما يبون يسولفون وما يبون الا شغل ومكالمات مهمه !! عندنا الحل !! ولدينا فقط !!
كل ما عليك هو الإتصال على الرقم التالي 70099999  !! يعني حط لك رقم 700 وترتاح صدقني غير كذا تبي تكسب ;) !!
بـــ...الــــمـــ...ـــقــــ...لـــــ...وب
ايه وما دمنا جبنا طاري هالمكاسب والـ 700 .. الحين طلعت هالرسائل على هالقنوات ياخي من جد تحس ناس مخفات وناس ما تدري وين الله حاطها !! اجل يرسل رسالة بهاك القيمة ويقعد شوي لين تطلع على هالتلفزيون عاد وش استفاد ؟؟ ولا فوق كذا يجيك بعضهم يبي يكون علاقة  !! ويالله استلم انا فلان يرسل اشواقه وحبه للغالية فلانة !! وهالعالم مخفات يستلجون انواع الرسائل !! ولا وبعد يجيك بعض القنوات تخصص مساحات للرسائل الخاصة اما اعتذار او رسالة تمر على الشاشة وبمساحة خاصة وطبعاً كل شئ (( بحقه )) !! والعالم انواع الزحمة على هالرسائل !! ما اقول الا اللهم لك الحمد والشكر !!
بـــ...الــــمـــ...ـــقــــ...لـــــ...وب
ايه صح وما دامنا جبنا طاري هالرسائل والشاشة اللحين كلكم ملاحظين ان القنوات طاحت بشريط الأخبار وبعضها مثل القنوات اللي تحط خاصية الرسائل تلقى هالمساحة ماخذه حقها من الشاشة ولا يجيك بعضهم خاصية التحميل من بعض المقاطع .. ولا يهون مؤشر الأسهم !! وتلقى البرنامج المعروض يالله يالله تشوف رأس المقدم والضيف وشئ طارف بسيط من الديكور !! وش بقى من الشاشة كلها راحت بهالدعايات والأخبار ومؤشر الأسهم ولا بعض البرامج المقدم والضيف تسود تناظرهم بدربيل !!
بـــ...الــــمـــ...ـــقــــ...لـــــ...وب
وما دامنا جبنا طاري البرامج ياخي ما يقهرك الا اللي يتصلون على البرامج !! يا بعضهم يرفع الضغط !! اجل بالله احد يتصل على برنامج مسابقات ويقول ممكن أشارك  !! اجل ليش متصل !! وليش معطينك وجه ومستقبلين مكالمتك !! مهوب كله عشان تشارك انت ووجهك  <<< خشيت جو :p !! لا من جد يعني شئ يرفع الضغط وغير كذا اذا سمعت بعض المشاركات في بعض البرنامج تلقى المقدم من البداية يقول ياليت المشاركين يختصرون في المداخلات عشان الوقت وغير كذا عشان نعطي فرصة للجميع !! يجيك واحد نص ساعة كلها شكر للبرنامج والقائمين عليه ومدح بالمقدم والضيوف واخرتها يقول ما عندي سؤال بس حبيت أشكركم  !! وتلقاه من الأساس أول مره يشوف البرنامج !! ياخي بعضهم ما ودك تعطيهم وجه !!
ومادامنا بطاري البرامج ياخي بعض المقدمين ودك انك تصفقهم !! تلقى البرنامج اللي يقدمه شرق وهو غرب !! بس شاطر في التمكيج والتكشخ والتميلح على هالشاشة !! وما راح فيها إلا حنا يالضعوف !! ولا وبعضهم يقعد يستعرض لك خاتمه ;) وإلا ساعته ;) (( تراني منب اقصد اللي يجي كل رمضان ;) )) !! يا بعض المقدمين ودك انه يدور له وظيفة ثانية ابرك له !! وغير كذا يرفع ضغطك المقدم اللي يجيك وهو اللي يحتسي والضيف يتفرج عليه !! يعني من يبدأ البرنامج وانت ما تسمع الا حس المقدم !! يعني البرنامج مثلاً مدته ساعة تسمع المقدم وهو يحتسي 45 دقيقة والضيف 15 دقيقة بس !! عسى ما تكلفتوا بس !! وليه جايبينه من الأساس !!
بـــ...الــــمـــ...ـــقــــ...لـــــ...وب
مــــــــــــــــــــدخـــــــــــــــل
ما تلاحظون اني ما أدري وش أبي  وغير تسذا أغلب كلامي عن القروش  مهوب تسني شايب
 | 