مشاهدة مشاركة بصفحة مستقلة
  #10020  
قديم 13/01/2011, 04:04 PM
R U S T Y R U S T Y غير متواجد حالياً
زعيــم جديــد
تاريخ التسجيل: 23/07/2010
المكان: Royal Commission Yanbu
مشاركات: 33



حبيبي على كذا حظ...يلا دائما نقول الحمدلله على كل حال..
يرجع كاكا..يروح هيغواين + شهرين من وقت بيبي..
كنا نقول قبل إن سبب كثرة الاصابات بعد مشيئة الله طبعا هو الاعداد البدني السيء..

اتى مورينهو أو بالخصوص مدرب اللياقه الجديد معاه..وشفنا تحسن فعلا من هالناحيه..
يعني فرق كبير في الموسم هذا والمواسم الماضيه...اللي كل بعد مباراه نسمع اصابة لاعب اسبوع او اثنين...
الآن الكلام هذا صار يحدث قليل جدا..أو نقدر نقول بشكل طبيعي ومثلنا مثل أغلب فرق اوروبا..

لكن اصابة هيغواين بالخصوص هيا حاله خاصه...حاله مثلها مثل اصابة كاكا..أو بيبي الموسم الماضي..
اصابات مثل هذه اصبحت ماركا مسجله بـ اسم ريال مدريد...شيء لابد منه أن يحدث في الموسم..
مثل إنه الريال من النادر أن يخرج من مباراه وهو كامل العدد بدون طرد...نفس الشيء
كلها ماركات مسجله بـ اسم الريال...ولازم منها...فـ احنا بدأنا خلاص نتأقلم مع الموضوع و نقول الحمدلله على كل حال..


اصابة هيغواين احزنتني الصراحه..مثلها مثل اصابة كاكا..أو بيبي..أو رونالدو...
لأنها اصابة لاعب مؤثر وعنصر فعال في الفريق الاول...بغض النظر مين هو اللاعب
فريقك اللي تشجعه وتدعي إنك مدريدي نقص منه لاعب..وماراح نشوفه الا الموسم القادم..
لأنه هذا النقص للاسف مو فقط نقص عددي..أو فقط نقص لاعب هداف..

المسأله فيها خطط وتكتيكات تتغير..خصوصا اذا المدرب يلعب بمهاجم وحيد في الامام ويعتمد عليه وبعدين يصاب..
تحركات هيغواين في الملعب طوال الموسم حتى قبل اصابته لم تكن عشوائيه ابدا..ولم تأتي بـ مجهود فردي منه..
يعني ماشغل مخه وفكر وشاف انه لازم يتحرك هنا ويضغط على هذاك و يجنح هنا...كلها اوامر من مدربه..

تحركات هيغواين مع مورينهو كانت تساهم في الكثير من الاهداف..وسبق واني اتكلمت في هالموضوع "اعتقد"
بالمختصر إن هيغواين بتحركاته يفتح مساحات كبيره لـ دي ماريا مثلا أو اوزيل أو حتى رونالدو
للدخول للعمق وتسجيل هدف...تغيير المراكز باستمرار ورؤيتنا لـ هيغواين يذهب للجناح مثلا ويعرض كوره
كلها كانت تساهم في خلخلة دفاع الخصم...ومنها ممكن يأتي هدف...

حتى الان ارى مورينهو يحاول ان يسلم مهام هيغواين الى بينزيما..لكن الفرنسي لم ينجح حتى الان في تطبيق 40% منها..
قدوم مهاجم جديد ممكن...لكن ايضا لازم يعطى وقت كافي حتى يتأقلم مع مهام المهاجم اللي يحتاجها مورينهو
واللي كان يقوم بها هيغواين...


عموما الكلام كثير جدا في هذه النقطه...لكن لظروف الوقت نأجلها لـ وقت لاحق...



كلام مورينهو اللي تمت ترجمته ووضعه هنا "أعتقد"..كلام كبير جدا ويلخص بصفه خاصه ماحدث بينه وبين بيريز
وبصفه عامه مايحدث للمدربين مع النوادي...

المدربين بطبيعتهم يحبوا الكمال في الفريق...كل مدرب نفسه ينجح في مسيرته و نفسه يملك فريق متكامل
هذا شيء غفل عن بال الجميع سواء مع مورينهو أو مدربين قبل مورينهو...
طبيعي المدرب راح يتطلب..و في اغلب الاحيان المدرب ماراح يقول لا للاعب اضافي..

المدرب مو شرط راح ياخذ اللي يتمناه...لأن النادي لا يتمحور فقط حول امنيات المدرب
مهما كان المدرب و مهما كان النادي...نعم الاولويه له و لـ متطلباته..لكن اترك كل شيء في يدي
عشان ألبي طلبات المدرب....اممم ما أعتقد..

هناك امور اقتصاديه في النادي...رواتب لاعبين وديون بنوك...خصوصا بعد صفقات تاريخيه في صيف واحد..
يعني ايش الفريق اللي راح يدفع في صيف واحد فوق الـ 200 مليون في 8 لاعبين..ويجي الصيف اللي بعده
ويتعاقد مع خمسه لاعبين اضافيين!! لا ويدخل يناير ويتعاقد مع لاعب ايضا...والله لو انه مغارة علاء الدين..

الوضع صعب نعم..خصوصا بـ مهاجم واحد وصاحب شروط انه يلعب في مكان معين...مهاجم لوحده قدام مايعرف..!!
بينزيما الى الان لم يعرف قيمة انه يلعب لـ ريال مدريد...برود و دلع زائد بالكره..الا فيما ندر من مباريات..
صح إن فيغو قال "اللعب لـ ريال مدريد كـ ملامسة السماء" لكن هذا مايعني إنك خلاص وصلت لأفضل فريق
تقوم تحط رجل على رجل و ماتقوم بـ أي مجهود..! أتوقع فيغو كان المفروض إنه يكمل الجمله.. كـ التالي

"اللعب لـ ريال مدريد كـ ملامسة السماء..فقط اذا بذلت مجهود خارق مع النادي... إذا لم تفعل فـ سيكون النادي الذي يدمر مسيرتك كليا"

لأنه فعلا اللعب لـ ريال وتحقيق البطولات وتقديم مستوى ممتاز راح يرفع اسهمك 10X أكثر من أي نادي اخر
تحقق مع نفس البطولات وتلعب بـ نفس التميز...لكن إن حدث العكس ولم تقم بالواجب...فـ ستكون نهايتك تماما
صحافه لاترحم..والضوء دائما مايكون مسلط على هذا النادي من قبل الجميع بشكل مكثف...

يعني يا تحترم نفسك وتلعب وتصير لاعب خرافي و الافضل في العالم..أو إنه مسيترك وسمعتك تدمر كما تدمرت
مسيرة انيلكا..اللي للتو اصبح لاعب رائع و اكتسب بعضا من سمعته السابقه ايام الارسنال وقبل أن يأتي للريال..




أرجع لـ كلام مورينهو "الله يهديك يا بينزيما"
على الكلام الموجود امامنا..وتصريحات بيريز ومورينهو من قبل...نقول إنه النادي حاليا ماعنده المقدره
على الدفع لـ جلب مهاجم جديد...وهذا طبعا من حق النادي ومانقدر نقول للاداره شيء..
حتى مورينهو ماضيع وقته في الكلام معاه..اخذ الرد من بيريز واتفهم الوضع و راح يفكر كيف ممكن يعالج هالمشكله..

وبصراحه لو أنا مكان بيريز راح اعمل نفس الشيء...أنا جايب افضل مدرب في العالم..ومن قبله افضل لاعبين في العالم
والونسو و دي ماريا و اوزيل و كارفاليهو..هذا غير عندك كاسياس و بينزيما والشله هذه كلها..
تيجي تقول لي ابغا مهاجم بعد هذا كله؟ إنت افضل مدرب في العالم على ايش؟ حل المشكله وأنا واثق إنك قادر
خصوصا ان عندك نوعية لاعبين flexible للاخر..عندك كذا لاعب قادرين انهم يلعبوا في كذا مركز..

في النهايه الموضوع واضح...مورينهو اتى لـ بيريز بـ داعي حجة "الكمال" اللي هيا غريزه في كل مدرب..
وبيريز رفض بحجة إني سويت اللي اقدر عليه وزياده..وإنت الافضل...حل المشكله وإنت قادر..

لأن في النهايه بيريز ماشي على خطه معينه في السنوات القادمه لـ كيفية تسديد الديون
وقدمها للأداره في الموسم الماضي..و بيريز ماحسب حساب تعاقد في الشتاء ابدا
خصوصا بعد صيفين دفع فيها النادي الكثير...صعب جدا ادفع الان
و خصوصا ان الخيارات قليله في الشتاء...وبيريز يفضل الانتظار الى الصيف للتعاقد..







في عندي كلام كثير عن الحلول اللي ممكن مورينهو ينتهجها في ظل غياب هيغواين..
عندي فكره إنه ممكن مورينهو يجعل التشكيله خاليه من مهاجم "على الاقل على الورق"..
لأنه كذا ولا كذا هيغواين كان يتحرك في جميع انحاء الملعب...وبعض الاحيان نرى اوزيل او دي ماريا او رونالدو في العمق...
ليش مايكون كاكا يلعب دور هيغواين..مع تبادل الادوار بينه وبين رونالدو ودي ماريا..
لأنه لو لاحظنا تحركات هيغواين في بداية الموسم..راح نقدر نشوف انه كاكا ممكن يقوم بهذا الدور..

عموما هيا فكره..وفيها كلام كثير و أعتقد يحتاجلها رد ثاني في وقت اخر..



شيء اخير..

لاحظتوا هجوم مورينهو في مباراة الفياريال بحثا عن التقدم في الشوط الثاني؟؟
عدد خيالي من اللاعبين في الامام!! والتكتيك اللي انلعب خالي تماما من الخبص و العك..!!
تنظيم مميز لأبعد الحدود في كيفية الهجوم بـ اعداد كثيفه من اللاعبين.. لاعبين فقط في الخلف!! والباقي هجوم!!
مورينهو تنظيمك الدفاعي روعه..لكن تنظيمك الهجومي أروع!!









بالتوفيق اليوم...وسهره ممتعه ان شاء الله..