الدلخ .. عان اوووووووو ... حياكم
سلام يالربع
 صبحكم الله بالخير والعافيه واللقمة الدافيه
ياني نوي لك نيه اليوم 
مخربها مخربها الله لا يعوق بشر
بسم الله
برد الرياض
بردان أنا تكفى ...
أبا أحترق بدفا....
كنت وأنا صغير أسمع عمي يقول في دعاءه بعد كل فجر "وأعوذ بك من المرض و هزات الأرض والحسرة يوم العرض ، وأعوذ بك من حر يابس وبرد قارص ، وأعوذ بك من همزات الشياطين ولمزات المعادين....."
في دعاء طويل حفظته عنه
وكنت أقول في خاطري ما عمري شفت برد قارص ولا حر يابس
لأني كنت في نجران وحدودي الجغرافيه متواضعه
وموقع نجران متميز فهي وادي تحدها الجبال من ثلاث جهات من الجنوب جبال اليمن ومن الشمال جبال عسير ومن الغرب جبال السروات وفي الوادي مياه دائمه ومزارع وخضره ومن الشرق الربع الخالي حيث يختفي الوادي فيها ....
يعني الجبال في الصيف تهب هبايبها علينا وتبرد المنطقة وتنعش الوادي وأمطار اليمن الصيفيه (وهي امطار غزيرة على فكره ) تمول الوادي بالمياة اللازمة للمزارع فما نشعر بحر الصيف جدا.
وفي الشتاء تقوم الجبال بتدفأة المنطقه والوادي وتحتظنه وتقيه شر برد عسير وهبوب الشمال .
متى عرفت البرد والحر الصدقيين؟؟؟
يوم ربي اقرد علي وجيت الرياض
يا رجل وربي بغيت ارجع ثاني يوم لنجران ، اكلم امي والدمعة على الخد اقول ابي ارد عندكم ما ابي الرياض 
والوالد يقول الرياض للرجال ( صار سجن)
والمفروض يكتبون في الـ(CV) تبع أي واحد درس والا عمل في الرياض (4 سنوات عاشها في الرياض )
وخلوني اوصف لك حر الرياض اولا :
الفجر مدته اربع دقايق وخمسين ثانيه
وبعدها يصير الظهر ، ولا تسألوني عن الصباح لانها فتره غير موجوده اثناء الصيف ، ما تشرق الشمس الا ودرجة الحراره 30 بالله عليكم أي منطقة في العالم اللي الشروق عندها 30 درجة؟؟؟
وبين الرياض والشمس علاقة وطيده (شرايكم في وطيده)
يعني علاقه حب ، عشق ، نسب مدري وشهي صراحه 
تحس الشمس عند راسك لو رفعت يدك لمستها
يا رجل وربي الموتر تركبه ما تقدر تلمس شي فيه (السلف حار، الحزام حار ، المراتب لو هي جلد كلتها وكنت في فرن، القير كنه مغرفه وسط قدر ، الدركسون لو ما معك فاين في المتور م قدرت تمسكه ، لو انت ناسي دبة مويه في السياره وجيتها تلقها متنفخه تبي تنفجر وتتبخر وتأدي دورها في دورة المياة في الطبيعة.)
وفي الليل الجدار جار ،البلاط حار ، مافيه نسمة هواء وحده بالخطا ، واذا جات نسمات الهواء جات على شكل عج وغبار .
ويوم بحثت في النت تفاجأة بشي غريب صراحة
الرياض العصامة الوحيده تقريبا في العالم اللي لا تطل على أي مسطح مائي
يعني معظم عواصم العالم اذا مو كلها تطل على مسطحات مائية (بحر – نهر – بحيره – ياشيخ لو ساقية )
مدينة مبنيه في الصحراء
شوف معاي (المنامة – ابو ظبي – مسقط – الكويت – الدوحه – بيروت – طرابلس – تونس – الجزاير – الرباط ) تطل على بحار
(دمشق – بغداد – الخرطوم ) على انهار
وبقت (الرياض – عمان) ما تطل على أي مسطح مائي
وعمان جوها زين ما عليها وبينها وبين النهر حقهم خطوتين
والرياض لا بحر ولا نهر ولا بركة ولو نزلت قطرة مطر تبخرت قبل تلمس برج المملكة .
البرد في الرياض شي غيريب صراحه
برد ناشف يصك العظم صك
يجي بدون سابق انذار تنام والمكيف عالبارد
تصحى ما تقدر تخرج بدون فروه
برد بدون مطر والا غيوم ركامية (تذكرت حسن كراني حق الاحوال الجويه)
ما علينا نرجع لموضوعنا
قبل يومين قالوا الشباب ودك نطلع نكشت ومدري وش قلت فيذا البرد حرام عليكم
المهم اقتنعنا نطلع
ووقفنا عند محطه نعبي بنزين ولفت انتباهي لوحة البقالة حقت المحطة
يعني وش يحس فيه راعيها
معجبه ان جده دلخ والا ايش ؟؟؟؟؟؟؟؟؟؟؟
وربي فيه اسماء مدري وش تبي
واحد كان يدرس معنا في الجامعه اسمه فلان بن فلان الوسخ
يعني جدك وسخ؟؟؟؟
من جد يشوفون لهم حل في اسمائهم شوي 
المهم ما علينا الرجال ينادون باسمائهم واسماء ابائهم يوم الدين
صراحه بعد كما قريت الاسم قلت في خاطري هذا نذير شؤم(مع العلم اني ما أومن بالغربان والمدري وش)
واذكر كان فيه بومه رمادية كبيره جات ووقفت على نخله عند بيتنا في الديره خمس ايام وبعدها مات عمي وكانت امي تقول ما جات هالبومه بخير وراح يموت واحد في البيت ويوم مات عمي قالت ما قلت لكم .
فيوم قريت اللوحة قلت في خاطري والله ما جده دلخ
وماالدلخ الا انا والشباب اللي معي يوم نطلع في ذا البرد في البيت سعه
ورجعنا البيت >>>رخوم
عودة الى الاطفال
معي ولد صغير في البيت عمره سنه وعليها
ملقوووووووووووووووووووووووووووف
ما يخاف من شي
في خبث غريب
من جد يمثل الطفل السعودي
متمرد على كل شي
يحب الزاد
   
ما يبكي الوصخ
ملسون
اوكلمه تعلمها (اقلع)
يقولها للكبير والصغير
مره وحنا نصلي في البر كان ينادي ابوه (طبعا يناديه باسمه) يا : امد (يعني محمد) امد امد امد
ما استجاب له ابوه
فصاح امد
فيوم سلم ابوه قال نعم خير وش تبي
ناظر فيه وقال
انقلع
مسوي في اخته الصغيره العجب
كل تجاربه عليها راح لامه مره بفنجال قهوه وقال مهوه يعني قهموه وصبت له شوي
ورد الفنجال وقال مهوه
قالت خلاص مو زين لك
فخاصمها اخوي وقال صبي للرجال قهوه وجع و انتي ساكته
المهم الام طفشت وهي تبرد للولد
فصبت له في الرضاعه قهوه وبردتها وخلته يشرب
وانبطح يشرب
ويوم قضت الخرمه حقت القهوه
خذ الرضاعه وحطها في فم اخته الصغيره
واخته ما كذبت خبر شربت الباقي
فقلت لاخوي عيالك اكبر مهايطيه
عان اوووووووووو
عان او يعني (اصوات السياره)
ومدري ليه مستغريبن كثرة الحوادث عندنا
اذا كان فن القياده عندنا بالفطره والهرمونات الذكره
يعني عط ولد سيارة صغيره
اول شي يسويه ويقوله
عان اوووووووو ويصكها في اقرب جدر ويضحك
عطه عقال يصير دركسون
عطه مفتاح غرفه يشغل به السيكل
عطه رموت التلفزيون يصير قير
عطه ذيك البطه الصفراء اللي اذا فغصتها تطلع صوت تصير بوري خكاريه
عطه موتر صدقي يعرف الموتر على اقرب صبه
طيب شكلي كثرت عليكم الليوم
لكم المايك >> هيه يا ايام الشات الصوتي | 