نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - || رابطة ♥ عشاق الملوك ♥ 2010 / 2011 ♥ ||

سليل السيف · #9138 23/12/2010, 04:01 AM

العود من أول ركزة ..
وموراتا واضح ان عنده امكانيات كبيره جداً ..
فيه دعم كبير من اللاعبين له .. شفنا فرحة بيبي اللى شاد شعر الضعيف

لكن الدعم الأكبر جاء من رونالدو وبن زيما اللى قررو يهدون لموراتا كورة المباراه مع تواقيعهم عليها ..
توه دخل بـ 18 سنه .. ويلعب جنب رونالدو واسماء كبيره شيء مهم لشخص مثله ..

اللى يهم ماهو وصوله للفريق الأول ..
اللى يهم كيف تعامل الإدارة ومورينيو وقدرة موراتا على استغلال الفرصه اللى جات له ..
مشكلة مدريد الأساسية إن زامر الحي لا يطرب ..
محد من خريجي الكاستيا اقنع الجمهور ..
الجماهير تبغى لاعب جاهز ، تناظر بسعر اللاعب قبل ما تناظر باللى يقدمه بالملعب ..
بيدرو ليون .. فزاع .. ارابيلوا .. نيغريدو .. سولدادو ..
كانو يحرقون انفسهم بالملعب عشان يثبتون انفسهم .. بس محد يعطيهم الفرصه ..
بمدريد .. انت عندك فرصه وحده .. إما تستغلها .. او بتروح عليك ..

هنا يجي التساؤل اللى ودي القى اجابه ..
اذا كان الحل الوحيد بنظر الجمهور بعد اصابة هيغواين هو التعاقد مع سوبر ستار بالهجوم " دزيكو مثلاً "
فمتى بتجي الفرصه للاعب من موارتا ..
سولدادو تألق مع اوساسونا وجابوه احتياطي رابع ولا لعب إلا مباراه وحده ..

دامي فتحت باب الكلام عن الكاستيا ..
ابسولف بشكل مبسط عنهم ..

ارابيلو جلس بالكاستيا ألين وصل عمره 24 سنه واضطر يدّور اول فرصه لنادي يبيه و
ينتقل لليفربول ويتألق معهم وبأول طلب من مدريد انه يرجع يلم شنطته بسرعه
ويجي ويقدم مستويات بطله وبالأخير ينطق احتياط بالدكه ..
الجمهور ولأن الولد ما شراه الريال بمبلغ ضخم مثل راموس
مايبغاه يلعب وانواع التسفيل فيه ، بالرغم ان مستوياته هالسنه
افضل عشرين مره من راموس بالباك الأيمن ..
وبالأخير يجيه الإنصاف من مورينيو اللى زهق من الدروب الكبير بمستوى راموس ..

ارابيلو موب وحده .. كثير من لاعبي الكاستيا
يخيسون فيها واذا وصلو للفريق الأول بسبب الظروف عندهم فرصه وحده
او فرصتين إما يكونون خالعين ويستغلونها صح او مصيرهم انهم ينتهون بالكاستيا ..

كامبياسو .. واحد من اشهر خسائرنا ..
مثله مثل قاقو حالياً .. موهبه كبيره .. عنده الإمكانيات ..
تنقصه الخبره .. جاء من الأرجنتين عام 1996 وعمره فقط 15 سنه ..
اعاروه كم مره .. الين وصل للفريق الأول ..
محد عطاه الفرصه ، كالعادة .. تفضيل النجوم على المواهب ..
محد يبغى يشوف كامبياسو بوجود ماكليلي وريدريندو ..
كلن كان يسبه !
2004 .. وبعمر 23 سنه .. راح للأنتر بعز ماكنا نحتاجه وياليت بمبلغ صاحي ..
ببلاش هههه .. طبعاً عشان نعرف كيف الإنحطاط ..
بنفس ذاك الموسم .. المحور كان شوارع ..
واضطرينا نجيب ساكي عشان يقترح علينا غرافسين ههههههه
وفي عام 2005 نجيب من بالمحور الدفاعي ؟!
نجيب بابلو غارسيا الله يلعنه من لاعب ..
لهالسبب اقول يا جماعه الخير .. قاقو كنز لا تفرطون فيه <-- ودك من يجلدك انت وقاقو حقك هههههههههههههههه

لويس غارسيا .. كابتن اسبانيول ..
لاعب بطل اول ما طلع ، لكن رموه لريال مورسيا الين وصل لأسبانيول ..

خافي غارسيا .. قدم مستويات بطله بالمحور الدفاعي ..
لعب كم مباراه مع الفريق الأول لكنهم ما لعبوه كثير وانتقل لأوساسونا
وبدّع معهم ورجعوه للفريق من جديد .. مالقى دقايق يلعبها ..
خلوه ينتقل لبنفيكا .. بعد سنه وبهالصيفيه .. يقولون مسؤولي بنفيكا لفالدانو ..
شكراً لأنك عطيتنا جوهرتين " غارسيا / سافيولا " ..

ماتا .. تألق مع منتخب الشباب .. هداف المنتخب ..
ابوه طلبه الوحيد من ادارة الريال تعطيه ضمانات بإن ولده يلعب بالفريق الأول ، قالو له معصي ..
راح لفالنسيا .. والآن كل مايشوفه الواحد يتحسر على موهبه ..

نتكلم عن مهاجم جديد الآن و ولدنا باشبيلية ..
وش اللى يحتاج يسويه نيجريدو عشان يقنع الجمهور فيه ..
انتقل من الكاستيا للعامريه وتألق ورجعناه عشان الدكه وخاس فيها
العام الماضي نبيعه ب 15 مليون ونشتري بداله مهاجم ب 35 مليون !؟
بالأخير ومع فارق قوة وسط الريال واشبيلية إلا ان ارقام نيجريدو افضل من بنزيما !؟
والآن الجمهور يبغون مهاجم ثالث وعينهم على دزيكو وفورلان ؟

سولدادو ..
يمكن هالولد اوضح مثال لمشكلة مدريد بالتعامل مع تصعيد المواهب للفريق الأول ..
سولدادو اعتبره افضل موهبه هجوميه جات لريال مدريد بس
عدم ثقة الجمهور فيه والمدربين ايضاً خلتنا نخسر مهاجم مهبول ..
من 2001 وسلدادو يلعب بالدرجات السنيه بالنادي ..
2005 يطلعونه للفريق الأول ..
بذاك الموسم .. لعب مباراة وحده اساسي و10 احتياطي وجاب هدفين !
ماااش ما اعجبهم .. اعاروه لأوساسونا بالموسم اللى بعده ..
لعب 21 مباراه اساسي وسجل 11 هدف ..
قالو لازم نرجع للريال ..
طيب ترجعه وانت عندك تكدس مهاجمين مشهورين بالهجوم ؟!
رجعوه للفريق الأول ولا لعبوه طوال الموسم إلا مباراه اساسي واربع احتياط ..
شيء طبيعي ما يسجل اهداف ..
باعوه لخيافي وهناك استلج .. من 24 مباراه سجل 13 هدف ..
اخذوه فالنسيا .. لعب 30 مباراه وسجل 20 هدف ..
هالموسم لعب 12 مباراه ومسجل 9 اهداف ..
موب خساره ؟!

لهالأسباب انا شعاري من اليوم ورايح :.

انتم بكيفكم .. ناقشو من تبونه بالهجوم ، و وقفو مع مورينيو يوم يطلب مهاجم
انا من قروووب فالدانو الآن ..
ابيه يستقعد لمورينيو وما يجيب مهاجم

عندكم موراتا صديقي الجديد .. وتدورون مهاجم .. والله وما قالت ههههههههه