|
لو قالت أن الدايرهـ مستطيله @@ قلت الدواير كلها مستطيلات
هذا هو حال أغلب مشجعين الأندية .. يسلم عقله ويردد كلام غيرهـ حتى لو كان ما أقنعه المهم أن اللي تكلم يشجع النادي حقي .. أجل خلاص كلامه صح  .. كلامي موجه للجميع هلالي ، نصراوي ، اتحادي ، الجميع بدون استثناء ..
يخرج رئيس النادي أو مدير الفريق أو صحفي محسوب على نادي معين - بميوله طبعاً - ثم تعال شف التطبيل من الجمهور كلهم يقولون كلامه صح .. طيب وين الصحة في كلامه الرجال قاعد يقول كلام خطأ .. يجيك الرد فيه كمية من العباطة تفهم منه أن التصديق على هذا الكلام كان حسب الميول وبس ..
وكأن أغلب المشجعين مالهم عقل يفكرون ولا يعرفون يميزون بين هذا صح وهذا خطأ .. وكأن هذا المتحدث استأجر عقولهم - على طاري استئجار العقول ترى ابي عقل مستأجر عندي مؤامرهـ - المهم بدون شطحات خلونا في موضوعنا .. يكون هذا المتحدث وكأنه مستأجر عقل هذا المشجع لدرجة أنك توضح له بالأدلة وبالأرقام بأن هذا المتحدث غلطان ويجيك بكل عباطة يقول لا كلامه صح حتى لو طلع شكله بايخ عادي المهم أكون معه في نفس كلامه
ما أعرف ما أسمع ما أرى @@ ما أرى ما أسمع ما أعرف <<< ماسكه على سعد علوش
قد يخالف بعض الجماهير شخص على ميولهم بس بشرط أنه يكون له مشكلة مع شخص آخر في النادي .. والأمثلة كثيرة والفضائح والمشاكل أكثر
مثلا جمهور النصر الآن يخالفون ممدوح لكن لان ممدوح له مشكلة مع فيصل بن تركي وخلافهم واضح ومعلن ومستحيل يوافقون ممدوح في شيء إلا إذا ذب على الهلال وقتها يكون ممدوح ذلك الرجل صاحب اللسان البليغ والعيار - وهذا موب موضوعنا _
جماهير الاتحاد ضد جستنيه ولكن ليش لانه صار ( لا منصور ) << الصرامي متلطم
وضد الرئيس وتتمنى رحيله بس ليش ؟!! .. لانهم يتمنون رجعة منصور البلوي لكرسي الرئاسة
جماهير الشباب بعضها تنتقد خالد البلطان وتشوف أنه ما يصلح يكون رئيس بالرغم من نجاحاته
لكن ليش الانتقاد ؟!! .. لانه كرش قريب ذلك الشخص المؤثر من النادي وصار ينشر مثل هالثقافة
وصل الأمر أنك تشوف نقاش في الاستديو ويجيك عضو يدافع عن تصريح معين ثم تجدهـ في منتدى ناديه ينتقد هذا التصريح .. يعني مستحي تقول الحق في المحلية وعادي تقوله في منتدى ناديك ؟!! .. طيب لو كنت تشوفه شأن داخلي ماله داعي تصير متناقض وتدافع هنا وتنتقد هناك .. خلاص لا تعلق في المحلية وانتقد في منتدى ناديك وكذا ما يطلع شكلك بايخ
زبدة الكلام : وش فيها لو طلعت وقلت ( الرئيس .. مدير الفريق .. لاعبنا السابق ) غلطان وكلامه يفشل ؟!!
وش فيها لو ضحك فلان وفلان على الشخص المتحدث مهوب أحسن من انه يضحك على عقليتك وعباطتك
ليش ما تكون راضي عن نفسك وراضي عن رأيك 100% ليش تقول كلام في قرارة نفسك ما أنت مقتنع فيه ؟!!
قليل هم الاعضاء اللي يكتبون هنا في المحلية رأي صريح يختص في ناديهم وحتى هؤلاء القليل
وحتى هؤلاء القليل تشوف اعضاء ثانية من نفس ميولهم تصنفهم تترك رأيهم وتصنف اشخاصهم
بأنك أنت ما قلت هالكلام إلا لانك تابع لفلان اللي ودهـ يصير رئيس ونسى نفسه أنه تابع للطرف الآخر
باختصار موضوعي يقول اترك لك شخصية مستقلة برأيها وفكرها وقناعتها ولا تكون شخصيتك شخصية تبعيه ..
واذكر أنك تكتب رأيك هذا وأنت تشوف أن فيه المصلحة لـ ناديك أو الرياضة السعودية عموماً
حتى لا يكون الطرح سامج والنقاش عقيم والشخص عبيط والمنظر بايخ
ولا أحد يصير مثل سعد علوش لما قال من زود الخقه :
لو قالت أن الدايرهـ مستطيله @@ قلت الدواير كلها مستطيلات
لان الدائرة عمرها ما كانت مستطيلة  | 