|
أقصى الشرق هناك حيث أنتمي
السلام عليكم
صباح الخير
أوهايو كزميشتا
انيوهسيوه
تحية عطرة للشعب القابع في أقصى الشرق  شعب المشاعر و العمل و تحية خاصة مني>>> طسي بس ........ لأحمد الشقير
طبعا اليوم عاشوارء إن شاء الله صايمين و ربنا يتقبل منكم صالح العمال و يمحو سيئتنا و تذكروا إستغفروا ربكم إنه كان غفارا
بتكلملكم عن نفسي و تجربتي و أكيد إنتوا عايشتم مثلها خصوصا و إحنا عايشين بنفس البلد 
يعني و الله عيييييييييييييييييييييييييب إنو نحتضن أقدس بقاع الأرض و أمورنا تمشي عكس النزاهة و الإخلاص و الطهر
اليوم أختي طلبت مني أقص لها شعرها طبعا أنا فرحت لي سنه مأخذه الدورة و تو تجيني وحدة فلازم أقص شعرها بإخلاص جلست أتفرج على مقاطع بيوتيب عشان أتذكر الأساسيات الحمد لله قصيت لها و طلعت القصة على ما يرام و عجبتني أنا أما هي ربنا وحده يعلم 
جلست أتذكر لما سجلت بمعهد الخدمه المدنيه بالمدينة و دفعت ألفين ريال عشان الدورة و لما جينا سألناها عن الأستاذه قالت رائعه و من هالكلام اللي أبسط ما يقال عنه إنه خرطي 
و قلتلها نتدرب على بواريك جمع باروكة ......قالت لي طبعا و من الخرط الزايد
لما جيت تفاجاءت إنو الاستاذه غير متعلمه لأصول المهنه و ماخذتها بالوراثه عن أمها و جدتها و أنا مو ضد هالشيء بالعكس هذي يخليها أمهر من غيرها و إنما تفاجاءت إنها مأخذتها كذا و ما علمتنا أي شيء
طبعا كعادتي رحت للإدارة و طلبت من مديرة المركز بواريك ممكن التسريحات نجربها على بعض و هذا الشيء عدم شعرنا لكن القص من وين نجيب
المهم كلمتها و قلتلها نبغى بواريك نتدرب عليها للقص إحنا دافعين 2000 ريال و الباروكه سعرتها مع المجسم ب 100 و بدونه 50 يعني أقل شيء وحده و علموا الطالبه عليها مو نظري
أعطتني محاضرة عن إن الفلوس هذي ما دخلت جيبها و إنها هيا ما لها شغل......... أجل ليش مديرة
هذا غير إنها اليوم الثاني إستأسدت و جت تهزاء عشان نفس الموضوع و إن الفلوس ما تدخل جيبها .....هنا شككتني
و هذا مو أول معهد نصب دخلته
دخلت قبله معهد كمبيوتر و نفس الحالة 2000 ريال و شهادة معتمده و أخرتها معروفه غير إنه ما يتناسب مع التطور الإلكتروني الحاصل بالعالم يعلموني ورد و رسام .......علموني كيف أبدع فيهم....... (تذكرون رسمتي بالمسابقه هذي عاهة وحده من العاهات اللي خرجنا بها )....مو تعلموني كيف أفتحه و أصكه
هذا غير معهد اللغه نصب الفلوس بقووووووووووة لغة أنجليزيه و جايبين مدرسه صراحة محترمه للي يعرف المدينه تراها مس نسرين
و لكن النصب هنا بالفلوس و بعدد الحصص
3 مرات بالاسبوع و ساعه وحده باليوم غير المنهج لما خلصت الكتب جابوا لنا منهج قديم و لما قرب الشهر يخلص طلبوا من المدرسه تخلص لنا الشهرين بشهر و نص .....وين الإتفاق و العقد
و الفلوس كانت 2800 و لا بعدين قفلوا و ما أعطوني شهادة المستوى الخامس جيت للمعهد بعد شهر لقيته محول مشغل مكانه و المعهد لا حس و لا خبر
و دورة الفوتوشوب ب 500 ريال أضف إلى أنها أسبوعين فقط
أنا اللي أعرفه إنا إحنا بالألفيه الثانيه و قد إجتزنا منها عشر سنوات للإمام و ليس للوراء كما يحصل عندنا
ليش الحكومه ما تفرض إجرات صارمه على كل معهد من حيث المنهج و الأساتذه و الفترة و مسماها و محتواها و أجور المعهد
ليش ما توحدها بحيث يختار الطالب الأنسب له مو حيث الجودة لانهم خلاص الجودة عاليه و لا من حيث المبلغ لنه موحد ...
يختار الأنسب له من حيث قربها من مكان سكنه أو مكان عمله .........
ليش ما يكون تفكيرينا إنو بعد سنتين راح يكون هناك 100 طالب و طالبة مبرمجين و 300 متعلمين كوري أو أي لغه
و إنو هؤلاء حيغطوا مكان 400 واحد أجنبي و يرفعوا مستواهم المادي بدل ما نبي بلبنان مدرسه و نعطي السعودين كيس رز و سكر
ليه ما نحاول نغطي الأيدي العاملة و نحولها لسعودين فقط .......مو إحتقار للأجنبي ......لاااااااا
بس و الله أنقهر لما اشوف وحده سعوديه مو قادرة تعيش و تلاقي لقمة عيشها رغم إن لها زي ما للأجنبي يد و رجل و عقل .......مو ناقصة شيء إلا العلم و التطور
زمان كان تفكيري محدود و كنت أقول لنفسي لازم يكون هناك فقير هذا إبتلاء من الله و كذا
ما في شيء إسمه إبتلاء لازم أحاول و أحاول و إذا فشلت أعرف إنو لربنا حكمه من هذا الشيء ووقتها أقول هذا إبتلاء و نصبر مع العمل
صراحة ودي نسوي حملة إحتجاج على معاهد النصب اللي تخرج أجيال أقل ما يقال عنها إنها مو دارية عن شيء
نفسي نقاطعها
و نعمل نوادي بأي مكان لو بالمساجد أو بالجامعات و نتعلم سوا
كل واحد يجيب معلومه و يكون المدرس أساسي و نأخذ دروسنا من النت أهم الغرب أحسن منا ينزلوا دروس بالنت و مجانا ...
بلا تضيع فلوس بلا هم
و بعضكم راح يقول كل واحد يبداء من نفسه و خلصنا
لكن صراحة احب الدروس الجماعيه لأنو فيها تطبيق
الأنجليزي اللي معي أخذته لوحدي و طالع نص كم ......مدري هوا إنجليزي و ألا لغه ثانيه 
في نقطة خاصة بالبنات
مو تحسون عمرنا ضايع لما تشوفوا كورية و ألا يابانيه
العالم كل وقتها برا البيت و تشتغل و تزور زيارة خفيفة يعني  مو ساعتين
و لما يجي وقت النوم كالملائكة مو زينا ننخمد
كل يوم يخرجوا بتجارب جديدة و ممتعه
ترا السعودية تعاني من نسبة رهاب إجتماعي 80% و هذا مو من عندي هذي إحصائيه بملازمه الطب سنه رابعه عشان محد يدرعم و يقول من وين جبتيها
و الرهاب هذا ما جاء إلا من عدم الإحتكاك المباشر بالمجتمع
هوا عمر واحد صح و إلا أنا يتهياء لي
اخر تعديل كان بواسطة » parrot في يوم » 16/12/2010 عند الساعة » 11:21 AM | 