طبعا انا توني صغير , لكن هالإضافة قريتها بمنتدى آخر وحبيت أشارككم فيها .


[ طبعا ببدا بالقناه الاولى اللي كانت تبدا بوشوشه تخبرونها اللي كنها قعص اسود مجتمع منول اخرب تلفزيوناتنا من كثر ما ارش الفليت عليها بعدين كان يجي الدائره الملونه اللي فيها ساعه الظاهر نص العالم مالبسوا نظرات الا من مراقبها ثم يجي السلام الملكي وقران ازين ماسوو ثم يجيبون افلام كرتون عاد افلام كرتون قبل تفتح النفس موب هالسبه اللي يشوفونها وراعيننا الحين سقا الله ايام كابتن ماجد وهداف كل ماخلص تحمست انا واخواني ورحنا نلعب كوره كانت عندي ضربه مميزه اسمها ( الضربه المالطيه ) ليا جيت اشوت قلت الضربتو المالطيه واشوت لينها في راس ام ملفي جارتنا وتدعي علي عساتس بالمالطيه لارحم الله ذالعصاقيل عاد من القهر اتقمص شخصية الرجل الحديدي واقوم اعدي واقول الى الرجل الحديدي واطب في بطنها لاني كنت اتخيلها ديناصور ..

ولا ماوكلي ياكره هالوجه هو وسرواله اللي من سعف ياعيال حارتنا تأثرو فيه مرتن مات ذيب مدري اسد في ماوكلي وقام يعوي هو والذيابه عيال حارتنا ذاك اليوم سرى ليلهم يعوون في الشارع حتى يوم خلصنا من العشا قامت جدتي تجمع العظام وترميه في الشارع تقول يمكنهم جواعا ..

حتى في وقتنا الحاضر مازال فيه ناس يحبون ماوكلي ومتأثرين منه يعني ابدن ماعندنا واحد حاط صورته الرمزيه باقيرا

ولا سانشيرو مره خربت لعبته جوماروا واقوم ابتسي ذيك الليله يسألوني اهلي فيك شي اقول ضرسي يعورني مادروا انه على قرطاس ..

اما برامج الاطفال يالله اني داخله عليك مدري تجنيد يجيك الورع ينشد وهو يبرطم ولا متخشب مايتحرك فيه الا عيونه والاورق كل اناشيدهم نفس الموسيقى الظاهر نفس المصري اللي يعزفها واللبس الحين بنت مسويه مشهد بتروح المدرسه لابسه ثوب عرس ليييه !!!!

بعدين المسلسلات الظاهر ذيك الحقبه ماكان يشتغل في القناه الاولى غير سعد خضر وماجد العبيد

.. حـــقــيـــقــه ..

( هل تعلم ان القناه الاولى هي اول قناه في العالم تقيل في الظهر )

نعم قبل اذا جاء الظهر شطبوا وصكوا القناه وراحوا يقيلون المذيعين والممثلين وليا جاء العصر فتحوا القناه ورشوا ماء وبدو البرامج

ايه صح وكانو يجيبون المسلسلات السوريه البدويه ياكانت جدتي مدمنتها ماتفوت حلقه واذا جاء الصبح قامت تقص القصه لربايعها تقول البارحه ماامرحت غبني الملعون اللي رمى اخته في البير اقول ياجده مهوب صدق تمثيل تقول تعقبين انا واقفه جمبه يوم حذفها

وال wwf قبل ايام هوق هوقن وواريور وماتشو مان كنت معجبه بواريور واقلده وانفش شوشتي مثله واطبق حركاته في وراعين اقاربي احطهم في النص واجي طايره من اول الصاله لاخرها واهبدهم عقبها كوتني مداويه ثم تسني طخيت


.. شـــطـــحـــه ..
كان يعجبني ماجد الشبل ونطقه لحرف الجيم واقلده اذا قريت مطالعه لين خلتني مدرسة المطالعه اكتب حرف الجيم 150 مره..

اما القناه الثانيه وش اتكلم وش اقول ياحليلهم والله كنت احبهم من قلب صدق صحيح كانو يعيدون الفيلم 3500 مره بس رهيب وصحيح احنا ماندري نتفرج على الفيلم ولا نلحق الترجمه بس روعه وصحيح كنا نشوف اغنية البدايه للفيلم بعدين البطل يعدي في النص ثم اسماء الممثلين في النهايه لكن ممتع ,,

القناه الثانيه كانو يجيون برامج منوعه زي ليلة خميس thursday night يااني عاقبتهم جابو مره عازف اورق والناس يدقون يطلبون مقطوعات اجنبيه اذكر دقيت قلت i wana something for abu hanan قلت ابي شي لبو حنان قال من ابو حنان قلت فيه احد مايعرف خالد الملا <<< ايام مراهقه معفنه ..

القناه الثانيه كانو يجيبون برامج طبيه وانا صغيره شفت رجال يطلع رجله الصناعيه واقوم اجر ساقي الليل كله لين انمصعت رجلي ياكنا نتأثر باللي نشوفه ..

الا بالله ماتذكرون فديو كليب الظاهر ماكان عند القناه الثانيه الا هو رجال يسوق دباب وحرمه فوق حصان وتطمر فوق شجره

اما الدعايات الحين ثوب الدفه سعودي يسوون الدعايه عليه مصاريه شلون !!

ولا دعاية مازولا يوم الطماط والبصل والخضروات ترقص ياهم لعبو علينا كنت اقوم نص الليل وافتح المطبخ بشويش بشوف هم يرقصون صدق اثرهم يكذبون

اما برامج السلامه والتحذير يجيبون واحد يلف سيقاره ويطق ابره وهو مرررره مستاااانس ومنتعش ويشهون الواحد في المخدرات ويعلمونه من وين يجيبها ومنهم الناس واشكال اللي يوزعونها بعدين يقولون لا للمخدرات

الا تذكرون اغنية منى يامنى يااني حقدت عليها بشكل واتوقع مابقى بنت ماحقدت عليها عشان محمد ثروت غنى فيها من زينها عاد محمد ثروت يقول اصحابها بيحبوها كنت اقول تعقب ماندانيها

مع كذا والله كانت القناه الولى والثانيه من اروع مايكون وحتى وان كانت غصب واحد وغصب اثنين ياحلوها بس ..
]