السلام عليكم ورحمة الله وبركاته



في هذه الأيام التي تصل درجة الحرارة بالجبل اللي أداوم له صفر أو ثلاثة إذا كان الجو حار مرة وأخوكم من كثر ماصفق البر بسيقانه صار يسحب على الطابور ويسوي نفسه مشغول بأوراق ولا يدور أي شغلة عدا اليوم اللي بيكون مشرف فيه فهنا غصب عن سابع جد له راح ينقرص من البرد


بصراحة لا أخفيكم إني إكتشفت اكتشاف خطير مرة إن السروال اللي نلبسه تحت الثوب أي كلام ويؤدي لدخول البرد من جميع الجهات وأمس وأنا جالس مع واحد من المعلمين قلت ياخوي شكلي بلبس جنز تحت الثوب على الأقل الجنز يحميك من البرد لكن هالسراويل اللي نلبسها والله ماوراها إلا تكسير العظام والبرد يدخل وانت تتنافض

عاد انتم تخيلو ثوب وتحته جنز وش بيكون شكله لاجد أتكلم

لاحد يلوموني ويقول وشب راسك يالقحماني صاير مهستر وتجيب افكار مخبولة صدقوني من البرد القارص اللي بعاني منه .

وبما إن الحديث عن البرد وبما أن أخوكم ساحلي المنشيء وترعرع بأجواء حارة لقربه من خط الإستواء حتى كان اذا صفقته الشمس يغني دستور يالساحل الغربي .. فليت في بحرك شراعي . فتحس أن اللي جاي من منطقة حارة لاصار بمنطقة باردة مرة مرة زي هذي اللي انا فيها يصير زي البسة اللي جاها كلب يبي ياكلها تعرفون كيف يصير شكلها

واحد من أخوياي عيا يتروش من يوم جينا وكل ماقول يابن الحلال ترا فيه سخان قال مابتروش الا ببيت امي وكفاية حتروش يوم الاربعاء والخميس والجمعة بدق عليه بعد العصر وبقوله خذ شاور وطلع حق الأسبوع كله


ترا قسم قسم لاحد يشك ويقول يعنني معاي بلاك بيري لا والله صدقوني بس مير إني أمس نسيت اشحن البطاقة ( كذاب مانسى بس مطفر )وجاي عند واحد من زملاي وقايله هات جوالك ابتصل ماعندي شحن قال الله يالدنيا بلاك بيري ومدري وشو وآخر شي بدون شحن قلت انت خابر آخر الشهر والشعب السعودي يوم 24 مايكون معه إلا السروال ( ماسكه معه ) كلمة خويي ذكرتني بواحد معه لكزس بأبها كنت واقف بالشارع ووقفلنا انا واخوياي قال وين قلنا للقهوة قال اركبو كل واحد بثلاثة ريال ههه استغربنا وش لون معك لكزس ومامعك قروش أجل بتأكسي اللكزس


ماتلاحظون اننا شعب مانعرف ندير أمورنا الإقتصادية وأكبر دليل محدثكم مطفر آخر خمسة ايام بسبب سوء تصريف الراتب بصراحه هالراتب ماجا الا بعد مانشف ريقي وخلال أيام الطفرة الماضية قعدت أفكر بخطط استراتيجية لتدبير أموري في بقية الشهر عشان ماتعرض لموقف مشابه لماتعرضت له بالأيام الماضية . لكن هذا مايعني اصير جلدة ومادلع نفسي وبعدين ياناس انا من الناس اللي اذا صار بجيبي فلوس مارتاح لين اغرقها لازم اصرفها عشان كذا معذور لو أقولكم اني كنت على الحديده من رابع يوم بعد الراتب تقريباً بس على الحديدة يعني كانت أهون من التطفيرة
تصدقون وانا راجع من الدوام ركبت واحد بخمسة ريال لكنه سحب علي وانا حنيت عليه يوم وصل قال ياخوي اعذرني والله حالتي حالة ان كان بتعفيني فانت كريم وان كان تبي حقك تفضل عاد أنا أخذتني النخوة والأصالة العربية وموبس اصالة حتى نجوي كرم اللبنانية وقلت روح الله يستر عليك ورجعت البيت ونمت وبالصبح لقيت بالكوت حقي سبعين ريال قلت ياربي وش هالحظ اللي يفلق الحجر ياعيني على الكوت اللي يشتغل من ورا صاحبه ويجيب قروش وبعد ماوصلت لنص الخط واحد من اخوياي المطفرين قال هي ترا نسيت بكوتك 70 ريال لأني خذته البارح وانت نايم قلت يصير خير .

لما رجعت البيت رجعت بخمسين وقلت تفضل فلوسك نقصت لأنها دوامت معي بعشرة ورجعت بعشرة حق الخط مانصبت عليك ولاشي

بس عن جد لي متى واحنا نعاني من سوء التنظيم الإقتصادي وعلى الطاري انا كنت منظم كثيرا بهالجانب وكنت متزن اقتصادياً لكن حاليا مبذر ومسرف وكريم بدجة فوق المعقول وهذا خطأ

من منكم يملك إتزان اقتصادي ؟



وبس ماودي أطيل فاضي وشايفكم معشقين قلت نسوي موضوع خفيف على قلوبكم وعسا مايكون سامج شوي