|
حضور العائلات للمباريات
قبل بضعة أيام اتصل بي أحد الأصدقاء وقال إذا تبي تشوف مباراة الليلة بين الهلال والنصر
تعال للملعب بس لازم تجيب الأهل معاك..! قلت له وين ياعم رايحين للملاهي قال لا
سمحوا للنساء حضور المباريات وصار الدخول للعائلات فقط !
قلت فرصة الأهل يشوفون مهارات ياسر على الطبيعة وتسحيبات ولهامسون
ومراوغات الفيلسوف الصغير (الفريدي)
وفعلا توجهنا للمعلب ولقينا حراس الأمن لايسمحون بالدخول إلا للعائلات فقط
دخلنا وتجمعوا الحريم مع بعضهم وكالعادة كل وحدة جابت معاها صينية حلا
ومكسرات وقهوة وشاهي وبدأت حوارات ساخنة أظن إن مالها علاقة بالمباراة
بدأت المباراة بشوط ناري انتهى سلبيا وفي الشوط الثاني سجل الكاسر
هدفا خرافيا بتمريرة ماكرة من السويدي ..وشوي ويجي الهدف الثاني
الغريب إن اللي سجله يوسف الثنيان وهو معتزل !
وخذ ذاك التصفيق الحار والإعجاب من جهة مدرجات النساء ..قلت لصاحبي
معقولة كل الحريم يشجعون الهلال قال لا الظاهر لأن موضة السنة
الحالية أزرق فكل الحريم يشجعون الأزرق ..قلت الحمد لله إن الرجال
ماعندهم تعدد بالألوان..
وشوي ويجيك السهلاوي منفرد بالحارس الهلالي وحاول يعدي
إلا جايك رادوي يمشي ألفين ويسحبه ويحتسب الحكم ضربة
جزاء للنصر وينذر رادوي ..
تقدم لتنفيذ ركلة الجزاء المحترف الروماني حقهم الجديد مدري وش اسمه
وقبل لايبدأ بالتنفيذ إلا ويسمع ذاك الصوت بدأ منخفض وكل شوي يزداد
سكت الجمهور واللاعبين وأصاب الناس صمت عجيب كلهم يبحثون عن
مصدر الصوت قمت أنا أبحث .. وتفاجأت إن الصوت من منبه ساعة جوالي
أثاريني كنت موقته على الساعة سبع ونص موعد الدوام..
وصار كل اللي راح أحلام في أحلام قلت الحمدلله إن مازال للشباب فرصة
بحضور المباريات قبل لاتصير للعائلات... بس لما أعيد الحلم راح أقول لكم
نتيجة المباراة..  | 