كل ما اشوف قناة رياضية اشوف الدختور مدني جالس يتفنجل مع الشباب ويخرط بكلام لايودي ولا يجيب (سوالف مجلس) اي واحد تسحبه من الشارع عشوائي يقدر يقوله خصوصا لما يكون مستانس وفاضي ،،، طيب ليش السيد مدني كلف نفسه واخذ دكتوراة ووش اخذها فيه واخذها من وين ؟؟؟ مادام نصف اللي معه في كل مجلس رياضي حدهم المتوسط والنصف الثاني (المتعلم جدا) حده الثانوي او درس جامعة بس ما كمل لانهم غالبا قضوا حياتهم في لعب الكرة.

اللي ابغى اوصل له هو ليش مدني يشتغل شغلة المؤهل العلمي المطلوب لها متوسط او ثانوي وهو يقول معه دكتوراه وليش ما دام معه دكتوراه ما يشتغل زي اللي معهم دكتوراه بأبحاث ومؤتمرات وتطوير وابتكار اساليب ومنتجات وطرق جديدة ،،، انا كل اللي اعرف مدني ابتكره هو طريقة لف غترته وهذي برضه وان كانت صعبة شوي بس ماتحتاج دكتوراه .

تدرون ليش اسأل هالاسئلة عن الاستاذ مدني ،، لاني قريت مقاله الاخير عن البطولات والاتحاد الدولي واقسمت بالله بعد قرائته وبشكل تلقائي لاشعوري وبسبب خلو المقال من ابسط اساسيات المنطق الانساني ناهيك عن الجانب المعرفي اقسمت ان هذا الرجل لم يحصل حتى على بكالوريوس (حقيقي من جامعة معروفة) ناهيك عن الدكتوراه ،، والان اما ان يثبت اني على خطأ وامري لله اصوم ثلاثة ايام في حال عرفت ان الرجل حاصل على شهادة دكتوراه من جامعة معترف بها او ان اكون على بينه من امري واتعامل مع لقب دكتور لديه كما اتعامل مع القاب العالمي والمونديالي والدولي وفارس مدري ايش وغيرها من الالقاب اللي يطلقها عوير وزوير على انفسهم وتلاقي شكلها عليهم مثل السرج على البقر.