( تلفيق) !!


التعبير الأمثل لوصف واقعنا الرياضي !! الذي يعتبر جزء لا يتجزأ من واقعنا اللي (مهوب رياضي) !! وأدري إنكم فاهمين كلمة مهوب رياضي غلط وتحسبوني أقصد .. إن الأخلاق فيه (من جنبها) !! فأحب أقول لكم يا ويلكم من الله !!


- أسهل شيء بالدنيا (التلفيق) !! جب لي طيارة آيرباص أعقد موديل وعطني (عدّة) ومفكــّات و أبو جلمبو لأن اللي ما أقدر أفكه أبكسره .. وجب لي شلة من شباب هالوطن الأشاوس .. اللي ماغير يتبطحوّن لا شغل ولا مشغلة .. ولا أحد طقّ لهم خبر وفي هالجرايد ماغير طقاق في طقاق .. ووظفنــّا وفعلنا وتركنا ولا شفنا شي !! ومستعديّن نفكك لك هالطيارة مسمار مسمار !! لكن تجي تقول ربطوهــّا من جديد .. فـ أسمح لنا !!


هذا اللي حاصل بالضبط بمجتمعنا الرياضي !! نفس الوجيه !! نفس الشوارب !! نفس التلفيق نفس التفكيك !! حتى شف تحليقات دقونهم ونسفات شمغهم ما فيه أمل تتغيّر .. المصيبيح أذكر واحد قد زاره وهو مصخّن ويقول (بنت البكار) على حطـّة يدك ما تغيّرت وبيده المغذي وطاق ذاك القميص الأزرق حق المستشفى .. الحمد لله إن اللي يحج ما يلبس المخيط وإلا والله إن تطلعه الهيلكوبتر بين الجمرات يرّجم ويوزان شماغه !! وبعدين عندي لغز قاهرني كل شيء قدرت أحله .. إلا (وظيفة حافظ المدلج ) ؟! عجزت أعرف وشّي بالضبط !!؟ والله لو يحطون جيبين لاندكروزر ولاند قريح .. والله ما أحد يعرف الإجابة !! وسامع إنهم يبونه مؤذن لمسجد الرئاسة و إمام لملعب الملز بس هو معيّي يقول أبي مسجد ملعب الملك فهد أوسع وأرسم !!


* تخيلوّا لجنة (عقوبات) مافيها شخص قانوني زي الناس ؟!
* تخيلوا لجنة (احتراف) مافيها أحد (محترف) !! وملتزم بوظيفته ومركّز فيها !!
- بالله هذا " تلفيق وإلا مهوب تلفيق " ؟

* عندك عمّة وإلا خالة حول تقاعد وتشتغل وكيلة بمدرسة!؟ بالله أسألها وشلون يسّوون (جدول الحصص) ؟! ( ما يبي لها شي .. كرّاث + فجل أحمر (بالنسبة لخالتي تموت عليه مع الخبز .. ما أدري عن خالاتكم عاد) !! + شوي جرجير + حب شمسي + جيك موية من أي برّادة تعرفون الحب فيه ملوحة !! ويجاملون (أبله حصّة شوي لأن بها قلب وتزعل ) وكارفين (أبله موضي لأنها مهيب معهم بالجمعية ) و راصيّن حصص أبله نجلاء بالبداية لأن ابوها مرّكب لهم مكيـّفات المدرسة .. وحايقين السالفة .. و فاليّن أبوها !!
- بالله وش الفرق بينهم وبين (ربعنا) ؟! جيبوا لهم فجل يمكنها من الفجل !! كل سنة نفس الـ(تلفيق) !! ونفس الأخطاء الشنيعة !! لا احترافية ولا دقة ولا قياس للمسافات ولا الأبعاد الجغرافية ولا المشاركات الأقليمية !! لا ومن الثقة الزائدة مايبون يعتمدون على (مستشار أجبني) .. بزعمهم ( قدّها وقدود ) !! قسم بالله إن العالم كلهم (دارين إنكم من جنب القدة) !!

* عندكم بنغالي ؟! نيبالي ؟! سوّاق أندونيسي ؟! شغالة سبيـّكة توّها جاية ؟! جب أي واحد من المذكورين آنفا .. وقل له ( وش قصد جمهور نجران في مباراة الهلال الأخيرة .. يومه يرفع الدراهم ويهزهــا ؟! ) !! وش تتوقعون تصير الإجابة ؟!
- لذلك بعض الأخطاء إذا جاك واحد يبررها ؟! تقول في نفسك يا إنه (أفدغ) صدق !! وإلا إنه (يستغفلنا) ؟!
- طيب دام الجمهور معه (عشرات وخمسات) ؟! ليه ما سوّوا "لوحة بعشرة أريل" !! وكتبوا عليها اللي يبون !!
- طيب إذا جمهوركم والله (يحب الأكشن) .. ليش ما طلعوّا (قماش المخباة ) وهذا أبلغ تعبير عن (الضائقة المالية اللي يتحجج بها رئيس النادي ) ؟! لكن دام الدعوى (تلفيق وانتقائية ) فعادي جدا تمشي مثل هالأمور !!



-----------------------------------------------
-----------------------------------------------


- و بما إن (التلفيق ) له أكثر من وجه :/

فمن أمثلته .. إدعــّاء المثالية في العلاقات .. و الإصرار والتأكيد على أنها علاقة بعيدة كل البعد عن (التكتل) ضد (آخر) !! أو إستغلال ظروف طرف على حساب الآخر !! وعايشين أحلامهم الوردية المقلــّمة بأصفر و لاعب فيهم النقاء والوئام .. ومن قوّ التلاحم صايرين طفلين سياميين ما عندك بأزين منهم .. بس الفرق واحد راسه كبير ومزعج العالم هو وبراطمه !! والثاني عايش على صراخ وزعاق توأم (راسه) !! لكن بما إن ( قدر الشراكة ما يفوح ) !! ودام فيه طرف خاسر .. طرف (ملعوب عليه ) !! فـ (البقوس) اللي صارت في المباراة الأخيرة و التشويت وذا الطراقات اللي أنتم شفتوا صحتهم من سباتهم العميق !! وعطت درس للي مسلم جلده كل هالسنوات (للجرب) يلعب فيه !! تخيلوا كل هالسنوات عايشين علاقة " طفيلية حميمية " !! كوّيس إن الإنسان له إحساس وإذا تأزم الموضوع اتخذ قرار وبدأ بالعلاج .. إلا عاد إذا ما توفرّت المادة (فراح يستمر هالمرض) وتشوفون !!



-----------------------------------------------
-----------------------------------------------

- من أسرار علماء النفس (المكشوفة حاليا ) : مقياس للذكاء يسمى (مقياس وكسلر ) ؟! على اسم العالم النفسي اللي وضع قوانينه .. وهو قائم على التقليل من ( التلفيق ) قدر المستطاع !! ومعرفة نسبة الذكاء أي نسبة الشخص (للكمال العقلي واللفظي والآدائي) !!

بحيث يخضع الشخص المفحوص للاختبار وفق أسئلة وأجوبة محددة لا تحتمل أي نوع من (اجتهادات الفاحص) و لا (تلفيقات المفحوص) .. وكل سؤال يحمل في طياته (ثلاثة احتمالات يجيب عليها المفحوص) وبناءا عليها يكون (التقييم) وإعطاءه الدرجة !! إما جواب (منطقي واقعي يحمل كل الصواب ) فله الدرجة الأعلى !! و إما أقل منه صوابا ويحمل الدرجة الأضعف !! وإما إجابة (خاطئة) لن تشم عن طريقها أي درجة أنت وراسك !!

** دايم أتساءل بما إننا في ( التلفيق ) و هالـ( عشوائية ) اللي لاعبة في حسبتنا !! تخيلوا طبقنا هالاختبار في واقعنا الرياضي !! وبدأ يفكّر كل شخص منا بكل (تصرف) واعتقاد و معلومة يعرفها !! ويرجعها للمقياس (العقلي"وفق ضوابط كثيرة") ويبتعد عن (التلفيق قدر المستطاع) !! وش راح يكون حالنا ؟!


** أحيانا أقول مشكلة الوسط الرياضي !! إنهم عالم ( متفضين للتفريغ والتنفيس ) !! وأحيانا أقول ( ندرة و شح قادة وموجهيّن ) !! وأحيانا أقول ( قل دبرة وقل وعي ) و مالك إلا خشمك لو هو أعوج !! تخيلوا مجتمع تستحي تستخدم ( عقلك ) بالله ذا وش تسميه ؟!

** ماشين بالبركة .. مدرعمين ما ندري وينها رايحتن بنا !! أتحدى واحد يعطيني .. طموحات 10 سنوات قدام !! 5 سنوات قدام !! مافيه أي بوادر !!

- لأننا ما تفضينــّا (للتغيير و الاستفادة من أغلاط سابقة ) !!
- لأن الطموحات شخصية وفردية و (وقتية) فـ تشوفون الأخطاء بالجملة !!
- لأن ( المبادرة غائبة ) !! والترحيب بـ (المبادرة غائب) !!
- لأننا ( ما نحب نسمع ولا نحب نقرأ ولا نحب نتغيّر ) نحب ناخذ بدون ما نبذل أي مجهود !!
- لأن المحفز منشل لاستقبال (عقليات ) في المجتمع الرياضي !!




** تخيلوا ما فيه (تلفيق) !!
- هل بتشوفون (نص هاللي في اللجان موجودين إلى الآن) !!
- هل بتشوفون (نص هالصحفيين والإعلاميين ) ؟!
- هل بيطلع (الغشيان بلقاء مثل اللي طلع فيه ) ؟! وسط فوضى وتغييب للمنطق من قبل (فهد نفسه) و إقحام (هذا اللقاء التلفيقي) و إذاعته وبثه على أساس أنه (مادة إعلامية) !!؟
- أخطاء وقرارات وتلاعب بالعقود !؟!
- غياب (الحكمة والمنطق) في مواطن لا تعد ولا تحصى ؟!
- أحادية في التفكير وأحادية في القرار !! والمشكلة أن من يتحملها " جيش من البشر " والسبب ( حينما يكون للتلفيق حضوره و مكانته ) فـ (شكرا) يا تلفيق بيه !!