|
(( يامن بعمره صاد قوبعه )) !! هذا حال التعاونيين هاليوميين !!!
بسم الله الرحمن الرحيم
(((( يــامـــن بـــــعـــــمــــره صـــاد قـــوبــــعــــه )))
كنت جالسا يوم أمس مع رجل كبير في السن وكان يتحدث لي عن شخص ما
فقال هذه المقوله (( يامن بعمره صاد قوبعه ))
فقلت له أطال الله بعمرك مامعنى وقصة هذا المثل
فقال :
قبل سنوات كان فيه رجل يحب الصيد واجد واجد واجد << مثل مايحب الفريان ملاحق الكاميرات
وكان رعاه الله ( الرجل ) كل يوم يطلع من البيت ويشغل (( الددسن ))ويروح بعد الفجر إلى الظهر برا الديره
وهو ماغير ملاحق ورا هالطيور ومن شجره لشجره ومن شعيب لشعيب
لكنه كل يووم يرجع لبيته وهو ماصاد شي أبد (( نيفر )) << ترجمه بالإنجليزي لغير العرب
ومرت سنوات على الرجال وهو على الحال (( يرجع والكيس مليان هواااء ))
وبعد عدة سنوات
كان طالع في ذالك اليوم (( كما هي عادته ))
فشاهد طير من بعيد
فالرجال انبسط انبساطن عظيم
يقولون إنه شقق فنيلته من الفرحه (( تقل مسجل هدف بالشامبينز ليق ))
المهم إنه رمى على الطير وصاده وتبين إن الطير اللي صاده هو (( قوبعه ))
فاستانس الرجال وناسه لايعلم به إلا الله (( مثل وناسة واحد من العيال يوم صعد فريقه اللي متنبل بالدرجه الأولى اكثر من 15 سنه ))
ورجع الرجال لبيته وهو مبسووط وبشرر كل أهل الديره ( القاصي والداني )
وكلن عرف بالسالفه (( يقولون حتى مجلس الأمم المتحده عرفوا بالسالفه ))
وباركو له أهله وجيرانه وجيران جيرانهم
ويقولون بعد أن الرجال من بعد ماصاد القوبعه وهو كل يوم يقعد بجنب البيت فوق كبوت (( الددسن )) وماسك بيده القوبعه
عشان لاسمح الله يمكن أحد مادري بالسالفه فيسأله وش قصة القوبعه (( عشان يقعد يقص له القصه ))
(( طبعا القوبعه قطنت وصار به دوخه براسه لأنه كان يحط راس القوبعه بين اصبيعين من اصابعه ويقعد يدور به (( كأنه سبحه ))
أو مثل مايسوي القصبي بالسلسله (( تقدر تسوووي كووذي ))
المهم إنه كان فيه بالديره اللي جنبهم شخص يعتبر قناص (( كأنك تشوف الدعجاني )) ومشهود له بأنه راعي الطيور
فاستغرب هالقناص هذا من هاللجه هذي وقال :
(((( يامن بعمره صاد قوبعه ))))
إنتهت السالفه
..........
وبحكم إني أعيش هالأيام في وسط اللجه والهياط اللي صاير هوووني
فنقدر نركب هذا المثل على إخواننا التعاونيين
بتقولون كيف ؟؟
الرائد كان دائم مسيطر على نتائج الفريقين
والرائد ( مل ) وهو يفوز على التعاون
لاسيما إن أخر فوز للتعاون على الرائد بالدوري اتوقع إنه 1422
الرائد فاز على التعاون من عام 1400 تقريبا 15 مباراة مقابل 5 مباريات
الرائد فاز على التعاون منذ تأسيس الفريقين 41 مباراة مقابل 25 مباراة
وأول مباراة بين الفريقين فاز فيه الرائد (( تعتبر أولوية )) لا يمكن إنكارها
والرائد أول نادي قصيمي صعد للممتاز (( كمان تعتبر أولوية لايمكن إنكارها ))
فبعد كل هالتقرير البسيط عن تاريخ الفريقين
تدور الدنيا ويفوز التعاون مباراة !!!
وتتقتلب الدنيا لجه وهياط (( وحنا احسن منكم )) ( وحنا كل عمرنا نفوز عليكم ) و و و .....
باختصار
بعد كل هالسنوات هذي وبعد كل هالسيطرة الرائديه على التعاون
يطلع لنا ناس وينسون التاريخ هذا كله عشان مباراة واحده
فحتما ينطبق على التعاونيين هذا المثل اللي يقول
(((( يـــــــــامـــــن بــــعــــمــــره صــــاد قــــوبــــعــــه ))))
تحياتي خيوووووو
 | 