فكرة: سندريلا الهلال
اعداد وتصميم : الهنوووف + عسيريه

لنا من كل عام شهر فضيل ..

أعاده الله علينا وعليكم وجميع المسلمين بالخير واليمن والبركات

وكل عام وانتم بخير

**][يوميات رمضانية 1431 هـ ♥][ **

لقد عدنا اليكم .. تحملنا الاشواق للقياكم .. ونسعد ان نعيش معكم

. في سلسلة تحمل بين طياتها يوميات الأعضاء الرمضانية من كل عام
هذه السلسلة أنتم أهل بيتها ونحن ضيوفا في حضرتكم ،،،

♥

أهلا وسهلا بكم أحبتنا
ودعونا نرحب سوية بالضيف" الخامس
المصور الفوتوغرافي MaLik74
لكي يحكي لنا احداث يومه مع شهر رمضان المبارك

قبل أن أبدأ بالإجابة ع الأسئلة , أحب أن أشكركم على إستضافتي
وأشكر الطاقم العامل بالمجلس العام المشرفين منهم والإستشاريين
وأرحب بكل زائر وعضو ومشرف ليقرأ يومياتي الرمضانية المتواضعه , وهذا شرف
لي بإني شاركتكم بشيء هذه السنة , وأول لقاء لي بهذه الشبكة الرائعة.
وأتمنى بأن أكون ضيفاً خفيف الظل , بسيط الكلام ليس فيه أي تكلف .

ماهو رمضان بالنسبه لك ؟
رمضآإن شهر أحبه كحب قيس لـ ليلى , شهر عزيز وغالي أنتظره كل سنة وأنا على أحر من الجمر .
يأتي فيه رآحت البال ,طمأنينة النفس, الخشوع , الإيمان ,تعاون المسلمين وتعاطفهم وتسامحهم
الجو في رمضان غير , احساس إيماني راقي , تشوف الناس تصلي وتقرأ تعيش الجو الإيماني
الذي نفتقده غالباً في غير هذا الشهر المبارك , اللهم إجعلنا من المخلصين في طاعتك .

برنامجك اليومي في رمضان ؟
برنامجي اليومي , أبدأ يومي بعد صلاة العصر بقراءة جزء من القرآن الكريم
وبعدهآ أجلس ع الكمبيوتر , أدخل شبكة الزعيم ووأقضي وقتي بمتابعة الفلكر ومتابعة بعض الرسائل الخاصه
ومتابعة الردود ع الصور بالمعرض وإذا كان عندي تصميم لشيء معين أبدأ به أو صورة معينه, وأدخل المسن أسولف مع
الجميع وبعدها أذهب للفطور ومن ثم بعد صلاة المغرب أشاهد مافي التلفزيون من برامج وغيرها , وبعدها اذهب لصلاة
العشاء والتراويح ومن ثم أرجع للجلوس ع الإنترنت لمتابعة ماذكرته سابقاً , إلا إذا كنت مواعد أي أحد من أصدقائي ممكن أطلع معه
طبعاً مافيه عشاء ذذ , أتعشى مع السحور , وبعدها أصلي الفجر واجلس ع النت شوي وأنام وكذا بس .

ماهي أكلتك ومشروبك المفضل في رمضان ؟
أكلتي المفضلة , السمبوسه واللقيمات والبيتزا أحبها ومشروبي أكيد فيمتو ق1 .

متى أول مره صمت فيها ,وإذا عندك مواقف مع الصيام أذكرها ؟
والله صمت قبل ما أدرس الوالد ماشاء الله عليه حريص وكان متحمس ذذ
لأني أكبر واحد , لا يوجد أي موقف ولله الحمد

موقف لاينسى حصل لك بـ رمضان ؟
أما موقف حصل لي برمضان فهي مواقف كثيرة .
منها موقف لي أنا وصديقي كنت باول ثانوي ض1
المهم صديقي هذا يختم القرآن ماشاء الله بسرعه بس والله ماوراه الا الدجة
ابي اعرف وشلون يختم بسرعه للحين ماعرفت ماشاء الله عليه , قلت بنافسه
وأجلس أقرأ وأقرأ جاء نص شهر رمضان وأنا مابعد ختمت وأقرأ بعيوني وهذا خطأ كبيير
لازم تنطق اللي تقراه , ختمته مرتين وأروح أقول لأبوي ختمت القرآن مرتين قال ماشاء الله
وشلون ؟! , قلت قريته بعيوني بسرعه قال مايصلح وأنا أبوك رح اقراه بصوت واضح , قلت اما عاد !!
تحطمت بقوووه .

وموقف ثاني خاص بالإعتكاف , جاء ابن خال الوالد وقال له قل لعيالك يعتكفون معي
هذا الكلام قديم قبل 4 سنوات , قلنا لأبوي مافيه مشكلة طبعا أنا وأخوي ( TaMeeMo )
والله استغفر الله ذاك مهوب إعتكاف لو إننا جالسين ببيتنا أحسن , إعتكفنا بجامع الراجحي الكبير
اللي بمخرج 16 , كان معنا واحد اسمه محمد وجبنا بطانياتنا وحركات , المهم يقول لنا ولد الخال
اقرأو قرآن نقول طيب نقرأ شوي ونقوم نلعب بهالبطانية ولا ندور في الجامع عشانه كبير ولا نايمين
اذكر رحنا للساحة الخلفية كلها رخام وجلسنا نلعب بالبطانيه واحد يجلس عليها والثاني يفحط بها
والله أشوف المقطع للحين ما ادري وكنا نحس به , المهم جاء الحارس وكرشنا وقال لأشوفكم هنا ثاني مره
رجعنا للبيت وقال لي أبوي كيف الإعتكاف قلت والله ما اعتكفنا مثل المسلمين وشرحنا له وضعنا المزري
وقال مايصلح تسوون كذا وانتم جالسين 3 ايام المفروض إستغليتوها وجلس ينصح فلذلك أقول يعني لا أحد
يروح لشيء فيه خير ومعه ناس يهيضونه انه يتركه .

طيب فيه موقف ثالث بس هو بعد رمضان بفترة بسيطة ,طبعاً هالموقف أكششن بقوه
إتفقنا أنا وولد خالتي ( بسام ) يكبرني بـ 3 سنوات وأخوي عبدالله وولد خالي ( أحمد )
إننا نروح للخرارة انا والله ما أحب الرمل ولا البر بكبره يوسخ ملابسي وجوالي وموتري ونعالي
الله يكرمكم من النوع اللي يحافظ ع الشيء .بس كان وقتها نبي نغير جو وكذا , حركنا قبل نهاية
العصر ووصلنا هناك المغرب دخلنا الخرارة طبعا فيه قبلها محطة وناس تبيع حطب , ولد خالتي بسام قائد الرحلة
راح لراعي الحطب بيشوف أسعاره , كل ماقال له هذي بكم قال بـ 400 ريال
بـ 200 ريال , طولنا عنده وحنا نحاول فيه إنه يرخص لنا لأن الحطب قليل وغالي
قال له ولدخالتي ماشاء الله العثيم وأنا ما أدري كل شيء مسعّره , عصب البدوي قال تبي حياك ماتبي بكيفك .
مشينا بسسرعه واخترنا المكان اللي نبيه وجلسنا فيه وشبينا النار وسعة الصدر
والجو بارد , نقصنا كم شيء مثل الحلا والفطاير عشان تكمل الجلسة , راح بسام وأخوي عبدالله
يجيبون الأغراض الناقصه وهم رايحين تذكروا إن الحطب قليل ووقفوا عند نفس راعي الحطب
وحاولوا فيه ماوافق ورفعوا ضغطه , ركبوا الموتر وفحطوا بوجهه وهم يمشون شافو راعي كامري ليموزين
يكبس لهم قالوا وش فيه ذا ؟ ! , وصار يتمحرش بهم ويحدهم ويلف عليهم وقفوا يبون يعرفون السالفة الا ويشوفون
راعي الحطب نازل ومعه سكين , وينحاشون ويطاردهم ,و أنا وأحمد جالسين وتأخروا علينا وكل شوي يمرون ناس ويناظرونا
وحنا جالسين بلحالنا لا موتر ولا شيء ونخاف لأن ذاك اليوم مافيها احد كلن يجي يطعس شوي ويمشي , وصار يطاردهم
ودخلوا الرمل وغرزوا وجاهم يركض وسبحان الله يطلع الموتر وانحاشوا مره ثانيه ويلحقهم لين طلعوا على المزاحمية وراحوا لمركز
الشرطة طبعا ً شكله من جماعتهم مافزعوا عيال الذين ,اتصلوا على ولد عمتي وجاهم وراحوا معه عشان مايعرف الموتر وبكذا
رجعوا لنا بسلام , طبعا هالقصة بإختصار .

كيف نظامكم واجوائكم في رمضان ونظامكم بالفطور والعشاء والسحور ؟
والله لا إختلاف عن الناس , نظام متواضع جداً , الفطور شوربة وسمبوسه ولقيمات
وفطاير , وأهم شيء البيتزا لأني أحبها موت وأبي أروح لإيطاليا عشانها ذذ
وأما العشاء مثل ماقلت لك مانهتم بالعشاء لأني أكون أنا وأخواني غالباً برى البيت خارج
البيت من بعد صلاة التروايح ومانرجع الا على وقت السحور ,والسحور كبسة أو فطاير وحركات ض1 .

هل ترى إختلاف بـ رمضان في السنين الماضيه عن السنوات الأخيره وإذا نعم وش الأشياء اللي افتقدتها ؟
أوووف فرق كبيير , والله إفتقدت الشتاء وأيامه الرائعه .
افتقدت التنافس مع أصدقائي في ختم القرآن لأن رمضان كان في أيام الدراسه أما ألحين في الإجازة
وافتقدت التمثيل والإخراج في رمضان كنا دايم نمثل أنا وأقاربي سعة صدر , ألحين كبرنا وانشغلنا الله لا
يشغلنا إلا بطاعته لكن إن شاء الله نرجع مثل أول وأحسن وأوريكم الأفلام .

هل تفضل الصلاه في المسجد القريب من بيتكم او تميل للتنويع ومن القاريء الذي تحرص على الصلاه خلفه في رمضان ؟
في التروايح أحب أنوع والصراحة ما أصلي في مسجدنا التراويح لأن صوت الإمام مايعجبني
فلذلك أحب التغيير والتنويع, وأحب أصلي مع إمام يقلد صوت ماهر المعيقلي ( صوت هادىء وترتيل رائع )
وهذا لي سنتين معه حالياً , وأحب القارىء أحمد العبيد وأصلي معه بعض الأحيان
وإن شاء الله راح أحاول أصلي مع القارىء خالد الجليل .

أجمل رمضان عشته حتى الآن , متى ولماذا ؟
رمضان سنة 1429 هـ , كان عندي منتدى
وأعضاء ومشرفين ينشرون بملايين الريالات من حبي لهم , كنا متعاونين سوا
وكأننا عائلة وحده , وفوق كذا قابلت ناس تعرفت عليهم بالنت
من أفضل الأشخاص اللي تعرفت عليهم , والله يرحم اللي توفى منهم
وكانت بدايتي في عالم المنتديات الرياضية , والحمدلله اللي جابني عندكم .
ورمضان سنة 1422 هـ , كنا نروح لمزرعتنا ونلعب وننبسط مع عيال جيرانا (طبعاً هم جيراننا بالمزرعة مهوب بالحارة )
ووقتها كان برد , وبعدها نجلس مع الشياب سوالف وجلسة سمر لين الفجر وتوفى أبوالجيران الله يذكره بالخير
كان وقتها يجيب لي حلويات وحركات ,والله فقدته وفقدت أولاده الله يذكرهم بالخير .
أما ألحين الدنيا تغيرت, الجدول خربآن مافيه الا الإنترنت أو التلفزيون وصراحة ما أحرص ع التفلزيون أبداً.

نبي صوره تلتقطها لنا من يومك الرمضاني المجال مفتوح لك ؟



هذا منظر عآإم للغرفة اللي أحب أجلس فيها ( أذكروا الله إذا اعجبتكم ) .



وهذي صورة للاب توب + الأكل الديكوري <<< يعني شكل بس + التلفزيون .



وهذي زاوية أخرى للأكل واللاب توب .



وهذي صورة قريبه للتلفزيون والشيخ الدكتور / سلمان العودة .

طبعاً الصور كانت ع السريع والزوايا والإضاءة والإخراج كان سيء
لكن المرات الجاية إن شاء الله في لقاءات قادمة نرتب الوضع
<<< وآإثق إنه بيطلع في لقاءات ثانية أحترني بعد
اللطعه اللي سويتها للمنتدى الإستشاري .


رسالة في هذا الشهر المبارك .. لمن تبعث بها وماذا تقول فيها ؟
آبعثهآ لأعضاء هذه الشبكة وزوارها , وخآإصه أعضاء المجلس العام
أقول لهم , أتمنى من الله أن يجعلكم من المقبولين ومن المقربين له
بأعمالكم وطاعتكم له , والله يوفقكم لما فيه الخير والهداية .
حاولوا بإن تجعلوا أنفسكم عائلة واحده متكاتفه في هذا القسم المبارك
وتعاونوا على البر والتقوى , ولا تقولون هذا فلان نعرفه نبي نرد عليه وفلان اللي
ماتعرفه ماترد عليه , نبي نجعل هالمجلس مثل البيت الواحد متعاونين متحابين
متهادين , وأتمنى من الله ان يبارك في المشرفين والإستشاريين القائمين على
هذا القسم المتميز , وأقول لهم بورك فيكم وفي جهودكم , جمعنا الله واياكم في جناته
دار المستقر .
استمعت بهذا اللقاء الممتع والمتميز , إلى ذلكم الحين ألقاكم على خير بإذن الله
أستودعكم الله الذي لاتضيع ودائعه إلى اللقاء ق1 .

اليوميات الرمضانية


اليوم الأحد الساعه 5 صباحاً التاريخ 5 / رمضان

جلست ع الكمبيوتر أتابع مثل ماقلتكم الزعيم ورسائله عشان المسابقة , وبعدها في الساعه 5 ونص جلست أصمم
شعار مجموعتنا الضوئية [ مجموعة بانوراما الضوئية , رؤية أوسع ] <<< تحت الإنشاء .
وبعدين تركت التصميم وطفشت بعد ماطلعت بشعارين متواضعين
وأرسلتها لرئيس المجموعة وياشين الواحد إذا جلس يصمم قرووووشه .
في الساعه 6 وربع , مسكت فراشي ونمت وقمت الظهر وصليت ورجعت أنام الساعه 1 وربع .
قمت العصر وجلست ع الإنترنت الساعه 4:00 أشاهد مثل العادة الفلكر + الزعيم + الفورم سبرنق + المسن .
بعدها قمت أودي أغراض في الساعه 5:30 , وأنا راجع جلست
أعلم أخوي الصغير أحمد السواقه والولد يعني على خفيف صار يعرف شوي أبشركم <<< وش دخلهم ههههههه .

بعدها في الساعه 6 رحت لخويي عازمني في الشرق مخرج 17 , يوم دخلت المخرج والله كنت مفهي
امشي بسرعه 100 كيلو بالساعه والسرعه 70
غمز لي بالإشارات راعي هوندا أكورد وحدني شوي
حسيت إن فيه كاميرا , بس والله مفهي ماادري ليه سبحان الله
ادور يمين يسار مافيه شيء المهم رجعت مره ثانية بشوف
فيه كاميرا ولا لا ههههههههههه <<< والله من اللقافه
لا بس عشان أعرف ثاني مره ما أسرع وأرجع وأنا أمشي 120
زدت الطين بله وأشوف ذاك الفلاش قلت يالله تهي تهي تهي صارت مصورتني مرتين هههههههههههههه يقطع اووووم الفهاوه واللقافه اللي فيني
دقيقه خلوني أصيح , وقسسسم بالله إني منقققققهر
وقلتها لخويي جلس يضحك طيب يامفهي ليه ترجع
قلت ياخي عشان أعلم الخلق إن فيه كاميرا <<< شفتوا الطيب ينظلم .
دقيت على اخوي تميمو وقلت له صادتني كاميرا ساهر الله يحفظها قال والله إني داري كم مره أقول لك إنها صادتني أنا بعد هههههههههه
ليه ماتستفيد مني وأنا اخوك الصغير قلت وش عقبه
طاح الفاس بالراس طال عمرك ويسكر السماعه .

أفطرنا سوا وضحكنا وإنبسطنا ورجعت ع الساعه 11:20
وصلت البيت الساعه 11:49 ليلاً وجلست أشتغل
على صور المرحلة الأولى وأرسلها للإستاذه عسيريه
بعد قروووششه وضيقة صدر في تجميع الصور وترتيبها

وهذا انا أكتب لكم يومي الرمضاني المتواضع والمحيوس
شكراً لكم ولإهتمامكم , أتمنى لكم أوقاتاً سعيدة في ظل هذا القسم الذهبي
شكراً لطاقم العمل , الهنوف وعسيريه .

أخوكم / مـآإلـك ,

كل الشكر

لـلمميز **][ " MaLik74 " "♥][ **

وانتظرونا غداَ

مع المتميزة باسكن روبنز .

أرق التحايا وأطيبها من

مشرفي واستشاري

المجلس العام