بسم لله الرحمن الرحيم
السلام عليكم ورحمة الله وبركاته
دقات قلبي تزيد بحرة فيها ××× و الدمع من مهجتي بالحزن ذرافي
من لوعة يا عسى ربي يجليها ××× حمى غشتني بغم وتنفض أطرافي
ليت الليالي تعود بحلو ماضيها ××× هيهاتِ ترجع بما روَّح وما طافي
كل(ن) يعزي وأنا روحي أعزيها ××× رحيل أبوي اللي بالأفضال معطافي
آهـ من الوقت والدنيا أثنِّيها ××× دنيا تفرق شمل بالحيل تنعافي
بسمتكـ يا والدي ما ني بناسيها ××× تضحكـ إذا شفتني بالخير متعافي
ليت العمر ساعة تنباع واشريها ××× باغلى ثمن يايبهـ للعمر تنضافي
علمتني المرجلة بأبهى معانيها ××× وأرويتني المعرفة من منبع صافي
مسجدكـ مشتاق للآية وتاليها ××× و منبركـ من عقب ما فارقت لهـ طافي
غرشة دهن عودكـ بدرجكـ أغطِّيها ××× أشم ريحهـ وكنك مقبل(ن) لافي
نظارتكـ شلتها حزني يبكِّيها ××× حتى المساويكـ ناحت بين الأرفافي
و عصاكـ مسنودة(ن) جيت أبحاكيها ××× تقول يكفيني ما فيني ترى كافي
و بستانكـ اللي بهـ النخلات تسقيها ××× يبست سواقيهـ تمرهـ دون خرافي
يبهـ .. يبهـ .. يا يبهـ لمن بأطرِّيها ××× هني من لهـ أبو حي(ن) وينشافي
أفز مشتاق والأشواق ناسيها ××× إلى شفت شايب شبيه(ن) لك بالأوصافي
فنجال قهوة معاكـ أوقات نغليها ××× ويضمني بالشتاء في مشلح دافي
همزت رجليكـ أنا أفدى مواطيها ××× أرجي لبرِّكـ عسى ما تشكي خلافي
الأرض ضاقت علي باوسع فيافيها ××× ماذقت نوم هني والأنس متجافي
فضايلكـ يا يبهـ عجزان أوَفِّيها ××× لو وصلت بالشعر بيت الألف من قافي
ياربي تجعلهـ للفردوس ناصيها ××× ومن ثمار الجنان الخضر قطَّافي
