المهم رحت بلحق الصالون وأنا منرفز على الأخير من إلي صار.. شي ماله داعي قسم.. المهم وصلت الصالون
2.35 يقول لي انتهى يومنا.. تعال لنا باكر بعد صلاة الجمعة على طول.. يالله بس وش السواه..
قلت يالله إن شاء الله خير.. وأنا خلاص مالي خلق بشي نهائي..
رديت البيت اخذ لي دش على السريع.. واطلع أدق على الشباب.. رحت لهم بالمكان المتواعدين فيه..
جلسنا شوي الى
3.30 ورديت البيت..
رحيمي وأختي عندنا بالبيت.. جلسه معهم ما تمل.. فله ووناسة على الأخير..
تسحرنا وراحوا هم على الأذان.. جهزت للصلاة وخرجت بصلي بمسجد من زمان عنه بالسيارة طبعا لأنه بعيد شوي.. هدموه وبنوه من جديد.. خيااال ما شاء الله تبارك الرحمن.. يفتح النفس ما ودك تطلع منه..
صليت وجلست شوي وخرجت على البيت.. دخلت وأمي كانت موصتني قبل لا اخرج للصلاة..
سويت إلي وصتني عليه.. ويوم رديت إلا هم متغيرين وما هم على بعض.. جيت بعطيهم حل للي صار جبت العيد.. وبغوا ينحروني..
رحت أنخمد وأنام.. سريري العزيز ينتظرني..
تقريبا على الساعة 6..
حست لين نمت..
.. وما كملت ساعتين إلا وأنا صاحي.. ما فيني نوم.. وش السواه مدري.. ومحلي من 9 الى 12 منبه الجوال يشتغل.. وأنا مو نايم من الأساس.. قفلت المنبه باقي بعد توى الناس..
الساعة
12.20 أمي تطق الباب.. يمه خليني أنام شوي بس..
ما سمعتني وراحت.. دقيت على اخوي اصحيه على أساس نروح الصلآة أنا واياه دايم.. قبل أجهز رحت شغلت السيارة..
جهزت وخرجنا
12.40 تونا لحقنا الجمعة بالخطبة الثانية..
صلينا وخرجنا قابلنا عيال عمي والشلة.. سلمنا عليهم ومشينا.. وصلت اخوي البيت ورحت الصالون على الموعد..
خلصت من الصالون رحت أخذت الاسطوانة أبدلها.. هذه الاسطوانة بنت الذينا سالفتها سالفة.. أمي صار لها سبع أشهر تقريبا وهي تقول لي روح بدلها.. وأنا أقول لها زين.. وما بدلتها قلت مالها داعي أصلا..
أول ما تنتهي الاسطوانة الأساسية أروح أبدلها بنفس الوقت.. اليوم رحت بدلتها لأن في شي يصير كل سنه تقريبا.. وشلون وليه وكيف مدري.. المهم انه يصير.. هذا طال عمركم اسطوانتنا العزيزة يوم العيد الفطور في بيتنا.. كل العايلة الكريمة عندنا.. ومن فتره نصلي العيد وأول خبر يوصلنا يوم نوصل البيت الاسطوانة خلصت.. وش قصة أمها على اليوم ذا مدري.. وأروح أجيب من إخواني وأرد مع أحلى تهزيء من أمي..
اليوم قلت أبدلها قبل العيد أفضل.. أمي تقول غريبة وش صاير اليوم.. قلت أبد ولا شي.. إذا ما تبينها أردها الحين..
شيكت على كذا شي وأشغل الجهاز على 2 .. تسجيل دخول بالشبكة وأشوف وين وصلنا بعد أمس..
فتحت المسن وأشوف صاحب السعادة موجود..
سوآالف لين أذن العصر.. راح يصلي وأنا شوي وأقوم أروح أصلي العصر وبعدها الورد اليومي بالقرآن..
خلصت وشيكت على الموقع وكل شي تمام التمام مثل ما أبيه..
دقيت على ولد عمي على
6.00 قلت له نبي الستين الآن..
قال تم دقايق وأكون عندك.. انتظرته شوي ما جاء وسحبت عليه.. قلت إذا دق بصير خير إن شاء الله..
فرفرة شوي.. معزوم عند أختي.. رحت لها قريب الأذان.. كالعادة فطور خفافي.. رطب وقهوه وسمبوستين وعصير.. صليت المغرب ورديت.. جلست شوي مع أختي وتكملة عدد على السفرة..
بعدها على النت أشيك على الوضع..
وأكمل الاستمارة العزيزة.. ض1
أذن العشاء.. صليت العشاء والتروايح.. بعدها فرفره شوي وأقص اظافري صار لها أكثر من شهر ما قصيتها.. أمي كل يوم تقول قصها لا أوريك.. ان شاء الله اذا فضيت..
وقلت أروح أكمل الاستمارة باقي كثير خفت أتأخر..
من 11 الى 12 وأنا اكتب التقرير..
وقبل النهاية هذه اكشنات خفيفة..