نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - Excuse me Taxi تاكسـي يالأخو ؟؟ تـاكسي يالطيب ؟ تبي تاكسي ؟

F.C.H · #1 02/08/2010, 01:28 AM

السلام عليكم والرحمه
مساكم / صبحكم الله بالخير جميعاً
,
,
يمكن هذا اول موضوع لي في المجلس ف حبيت اطرحه لكم واعذروني لو حصل تقصير
الموضوع ومافيه من يومين رايح للمطار استقبل شخصاً ما .وصلت للمطار الساعة 11 والرجال بيوصل على الساعة 12:10 بالضبط ف قلت خلني اتمشى بالمطار شوي كود تغير الوضع وصار مطارنا مثل هذا

او هذا مثلاً

لكن للأسف يوم وصلت للرحلات الدولية لقيت الوضع كما هو على حطت يدك

فلة حجاج

عاد ضاق صدري واديور للرحلات الداخلية يوم وصلت واثاري خويي وصل ويدورني وانا ادوره وزحمه وحوسه

المهم بالاخير لقيته بوسط 12 واحد كلهم يطلون بوجهه ويقولون له تاكسي يالاخو تبي تاكسي معي كامري والثاني يقول معي صالون وانا الي احشر نفسي بينهم واتله من يده واسحبه عاد كلهم قاموا يطالعون بنص عين ( حقدوا ) يحسبوني راعي تاكسي واخذت الصيده منهم . والرجال خويي مسيكين مفجوع وحالته حاله والمرزام بجهه والعقال بجهه .

هذا غير الأجانب الي يجونا ويصير معهم كذا فعلاً منظر المطار صاير " قرف " كأنك بالبطحاء .

يعني من فتره قبل السعودة اذكر كنت اشوف التكاسي او الليموزينات نظيفه وحلوه كابرس او فكتوريا حتى اول ما تشوفها تعرف ان الي راكبها توه جاي من المطار ,
لكن الحين لا اي شي تحصله ونصها يبيلها سمكره وتوضيب مكينه وفريون مكيف

انا مو طماع ما قلنا نبي مثل كذا عاد

بس فعلاً احيانا تمنى لو يلغون سعودة المطار ويرجعونا مثل أول . دايم المطار هي الواجهه للمنطقة او المدينة الي متوجه لها انا واحد من الي يتمنى يشوف ديرته مثل الدول الي حولنا او احسن منهم وش الي يمنع اذا ان السعودة بترجعنا لـوراء مانبيها والله .

انا مقدر الأشخاص ووضعهم وحاجتهم للوظايف لكن لابد انهم يقدرون (ولو اني ما أظن) على الأقل الأخوان المسؤلين يلتفتون للنقطة هذي ويصححونها .يعني يكون في مكاتب والأخوان وتكاسيهم لهم أمكان مخصصه مو كذا بكل مكان تلقى لك واحد متعلق فيك تاكسي يالأخو . بكره تلقاهم عند باب الطيارة .

لكم الحرية المطلقة تناقشوني وتصححون لي وتبدون وجهات نظركم في الموضوع الي يعبر عن رأيي الشخصي .

دمتم ب خير